Le Bible Ufundijanga Lufundijo lwa Bungudi?
Bilondolola Bible
Aa, kafundijangapo luno lufundijo. Kadi kishima “bungudi” ne mulangwe wa kino kishima kebidipo mu Bible. Lukulupilo lwa bungudi i lutambe ku lufundijo lwa muya keufu.a Ino aye Bible ufundija’mba muya i muntu mwine, kadi ufwanga. (Ngalwilo 2:7, kunshi kwa dyani; Ezekyele 18:4) Shi muntu wafu, kakidi’kopo.—Ngalwilo 3:19; Musapudi 9:5, 6.
Le bungudi ne Lusangukilo i bishile pa bika?
Byobya bifundija Bible pa lusangukilo kebimaninepo pa kubulwa kufwa kwa muya. Pa lusangukilo, bantu bafwile bakekala’ko monka kupityila ku bukomo bwa Leza. (Mateo 22:23, 29; Bilongwa 24:15) Lusangukilo luleta lukulupilo lwa kukekala’ko monka pano pa ntanda na dyese dya kuleka kufwa monka.—2 Petelo 3:13; Kusokwelwa 21:3, 4.
Milangwe ya bubela pa lufundijo lwa bungudi ne pa Bible
Milangwe ya bubela: Bible unena’mba Yoano Mubatyiji wādi ngudi wa mupolofeto Ediya.
Bubine: Leza wālaile amba: “Nsa kwimutumina Ediya mupolofeto,” kadi Yesu nandi wālombola’mba Yoano Mubatyiji wāfikidije buno bupolofeto. (Malaki 4:5, 6; Mateo 11:13, 14) Inoko kino kekishintululapo amba Yoano Mubatyiji wādi ngudi wa Ediya. Yoano aye mwine wānenene amba kādipo Ediya. (Yoano 1:21) Shako Yoano wāingile mwingilo na wāingile Ediya, wāsapula musapu wa Leza wa kwita bantu besāse. (1 Balopwe 18:36, 37; Mateo 3:1) Kadi Yoano wēlombwele amba wādi na “bukomo ne mutyima’nka bwa mufumiki Edia.”—Luka 1:13-17, Myanda Miyampe.
Milangwe ya bubela: Bible utelanga bungudi bu “kubutulwa dipya.”
Bubine: Bible unena’mba kubutulwa dipya i kubutulwa ku mushipiditu, kubutulwanga muntu aye papo mūmi. (Yoano 1:12, 13) Kuno kubutulwa, ke kulekapo kufikilwa na bibi pa mwanda wa bilongwa bya pa kala, ino i madyese a Leza, aeselanga boba badi na lukulupilo lwa pa bula lwa mu mafuku a kumeso.—Yoano 3:3; 1 Petelo 1:3, 4.
a Kukulupila mu kubulwa kufwa kwa muya ne mu lufundijo lwa bungudi i kwa tamba mu Babiloni wa kala. Mwenda mafuku, bafilozofe bene India nabo bashilwile lufundijo lwa Karma. Dibuku dimo (the Britannica Encyclopedia of World Religions) dinena’mba, Karma i “kijila kya dyodya kyula kumenwapo na mpusu, kishintulula’mba ku byobya bilonga muntu dyalelo mu būmi, ukangula’ko kintu kampanda mu būmi bwa kumeso.”—Paje 913.