BIPANGUJO BYA BANKASAMPE
Mwanda Waka Mfwaninwe Kulombela?
Mungya bubandaudi bwalongelwe mu Amerika, pa bankasampe 100, padi bankasampe 80 balombelanga. Kadi pa bano napo, enka 40 bo babwenye kulombela difuku ne difuku. O mwanda mwine bamo beipangulanga’mba: ‘Le milombelo i kintu kinkwasha’tu mu ñeni’ni nansha’ko idi ne na kamweno kakwabo?’
Le milombelo i bika?
Na bubine milombelo i kwisamba na Umpangi wa bintu byonso. Langa’po bidi! Yehova udi peulu kupita bantu mu bintu byonso, nansha nankyo kadipo “bine kulampe na batwe bonso.” (Bilongwa 17:27) O mwanda mwine mu Bible mudi luno lwito lwa kutendelwa lwa amba: “Fwenai kudi Leza, nandi ukemufwena.”—Yakoba 4:8.
Le ukafwena kudi Leza namani?
Muswelo umo bidi i kupityila ku milombelo—muswelo owisamba na Leza.
Muswelo mukwabo i na kwifunda Bible—muswelo “wisamba” Leza na abewa.
Kuno kwisamba kwa banwe bonso—polombela ne powifunda Bible—kukakukwasha ukomeje kipwano kyobe na Leza.
“Kwisamba na Yehova—Mwine wa Peulu Mwine—i dyese dipite onso ku muntu.”—Jeremy.
“Kusapwila Yehova tumyanda twa mu nkulwe ya mutyima wami kulengejanga neivwane pabwipi bininge nandi.”—Miranda.
Lelo Leza utejanga milombelo?
Nansha shi witabije mudi Leza—ne ulombela kwadi—kyaba kimo bikalanga bikomo kwitabija mulangwe wa amba aye utejanga. Nansha nankyo, Bible utela Yehova amba i “Mwine wivwananga milombelo.” (Ñimbo ya Mitōto 65:2) Ukwitanga’nka ne kukwita wele “kuzumbazumba [kobe] konso kwadi.” Mwanda waka? “Mwanda aye [ukutele] mutyima.”—1 Petelo 5:7.
Vuluka: Le wisambanga kyaba ne kyaba na mulunda nobe wa pa mutyima? Ye mokokeja kulongela ne na Leza. Mwite kyaba ne kyaba mu milombelo, ne pomwita, tela dijina dyandi, Yehova. (Ñimbo ya Mitōto 86:5-7; 88:9) Bine, Bible ukwita’mba, ‘Lombela kitatyi kyonso.’—1 Bene Tesalonika 5:17.
“Milombelo i mīsambo yonesamba na Tata wami udi mūlu, mwine onombolanga byonso bidi mu mutyima wami.”—Moises.
“Nsapwilanga Yehova ne bifyame bine, monka monsapwilanga’byo mama ne mulunda nami wa pa mutyima.”—Karen.
Le mbwanya kulombela pa myanda’ka?
Bible unena’mba: “Mu byonso, yukijai Leza byomulomba mu milombelo ne kuzenza pamo ne kufwija’ko.”—Bene Fidipai 4:6.
Le ko kunena’mba i byendele’mo kutela’mo bikoleja byobe? I amo! Mwanda Bible unena’mba: “Ela kiselwa kyobe kilēma padi Yehova, nandi ukakukwasha.”—Ñimbo ya Mitōto 55:22.
Shako polombela kudi Leza, kokemanina’nka pa kutela bikoleja byobe kete. Chantelle, nkasampe umo mwana-mukaji wanenene amba, “Kwimanina’nka pa lulombo kudi Yehova, bwabo ke bulundapo buyampe. Ami mona’mba kintu kibajinji i kumufwija’ko, kadi mulongo wa bintu byomufwijija’po ufwaninwe kwikala mulampe.”
Vuluka: Le i bintu’ka mu būmi bobe byobwanya kumufwijija’ko? Kimba bintu bisatu byobwanya kumufwijija’ko Yehova dyalelo?
“Bintu bipēla, kimfwa diluba diyampe, bikokeja kwitutonona tufwije’ko Yehova mu milombelo.”—Anita.
“Vuluka’tu kintu kimo mu bupangi kikutulumujanga nansha vese umo wa mu Bible ukuteñanga bininge, kupwa fwija’ko Yehova pa kyakyo.”—Brian.