Le Bible Unena Bika pa Mwanda Utala Kwisanswa Abe Mwine?
Bilondolola Bible
Bible ulombola’mba i biyampe ne amba i byendele’mo kwisanswa abe mwine na bujalale. Kuno kwisanswa i kwikwatakanya abe mwine, kwilēmeka, ne kwimona na mvubu. (Mateo 10:31) Pa kyaba kya kutembaula kwisakila, Bible utūla kwisanswa abe mwine pa kifuko kyako.
I bāni botufwaninwe kusanswa dibajinji?
Tufwaninwe kusanswa Leza dibajinji mu mityima yetu. Bible ufundija’mba mbila mikatampe i ya amba: “Sanswa Yehova Leza obe na mutyima obe onso.”—Mako 12:28-30; Kupituluka mu Bijila 6:5.
Mbila ya bubidi mikatampe i ya amba: “Sanswa mukwenu mowisanshilwe abe mwine.”—Mako 12:31; Bene Levi 19:18.
Nansha mu Bible byokemudipo mbila ya kwisanswa abe mwine, inoko mbila ya amba “sanswa mukwenu mowisashilwe abe mwine” ilombola’mba kwisanswa abe mwine ne kwilēmeka abe mwine na bujalale i kwendele’mo kadi kwa kamweno.
Le Yesu wādi usenswe dibajinji bāni?
Yesu wālombwele mwa kusanshilwa Leza, mukwenu ne abe mwine, kadi wāfundije bandi bana ba bwanga balonde kimfwa kyandi.—Yoano 13:34, 35.
Wādi usenswe dibajinji Yehova Leza, wēpāna ne aye mwine mwanda wa kuvuya mwingilo wa Leza. Wānenene amba “mwanda wa ino ntanda iyuke amba nsenswe Tata, noñanga monka munsoñaninye Tata kulonga.”—Yoano 14:31.
Yesu wādi usenswe bakwabo, wālombola buno buswe na kuvuija bisakibwa bya bakwabo, enka ne kupāna būmi bwandi pa mwanda wabo.—Mateo 20:28.
Wālombwele amba wisenswe aye mwine na bujalale na kwitūdila’ko kitayi kya kukōkolokwa, kudya ne kya kwikala pamo na balondi bandi ne na bantu bādi bakokeja kwikala bandi bana ba bwanga.—Mako 6:31, 32; Luka 5:29; Yoano 2:1, 2; 12:2.
Le kubadikila kusanswa bakwenu pa kyaba kya abe mwine, kukatyepeja nsangaji yobe nansha bulēme bobe?
Aa, mwanda twi bapangwe mu kyelekejo kya Leza, mwine udi na ngikadila mibajinji, buswe bwampikwa kwisakila. (Ngalwilo 1:27; 1 Yoano 4:8) Kino kishintulula’mba twāpangilwe mwanda wa kulombola bakwetu buswe. I byendele’mo kwisanswa batwe bene, inoko twikalanga na nsangaji bininge shi tusenswe dibajinji Leza ne kuta mutyima ku kulongela bakwetu bintu biyampe. Bible unena’mba, “nsangaji ya kupāna itabukile ya kupebwa.”—Bilongwa 20:35.
Bantu bavule dyalelo balañanga’mba bakekala na nsangaji shi belangila bidi abo bene. Kobadi, mbila ya amba “wisanswe abo bene” i mipingakane pa ya amba “sanswa bakwabo.” Inoko myanda imweka dyalelo ilombola’mba, bantu ba nsangaji kadi badi na bukomo bwa ngitu buyampe i boba balonda madingi a tunangu adi mu Bible a amba: “Muntu ne muntu kakikimba kamweno ka aye mwine, ino akimbe nyeke kamweno ka mukwabo.”—1 Bene Kodinda 10:24.