Yesu Upandijanga—Namani?
Bilondolola Bible
Yesu wāpandije bantu ba kikōkeji kitatyi kyaāpēne būmi bwandi bu kitapwa kya kinkūlwa. (Mateo 20:28) O mwanda Bible utela Yesu bu “umpandiji wa ino ntanda.” (1 Yoano 4:14) Kadi unena’mba: “I kutupu lupandilo mu muntu mukwabo nansha umo, mwanda i kutupu dijina dikwabo munshi mwa diulu dipelwe bantu motufwaninwe kupandila.”—Bilongwa 4:12.
Yesu ‘wātompele lufu pa mwanda wa muntu ense’ ulombola lwitabijo mudi aye. (Bahebelu 2:9; Yoano 3:16) Kupwa, “Leza wamusangwile mu bafwe,” ebiya Yesu wājokela momwa mūlu bu kipangwa kya ku mushipiditu. (Bilongwa 3:15) Mwine’mwa, Yesu ubwanya “ne kupandija lonso boba bafwena Leza kupityila kwadi, ke-pantu i mūmi mafuku onso mwanda wa kwibanenena’ko.”—Bahebelu 7:25.
Mwanda waka Yesu ufwaninwe kwitunenena’ko?
Batwe bonso twi babipya-mambo. (Bene Loma 3:23) Bubi bwitukalakanyanga na Leza, kadi bwitutwalanga ku lufu. (Bene Loma 6:23) Ino Yesu i ‘wa kunenena’ boba balombola lwitabijo mu kitapwa kya kinkūlwa kyandi. (1 Yoano 2:1, kunshi kwa dyani) Wibanenenanga’ko, ulomba Leza evwane milombelo yabo ne kulekela bubi bwabo pa lufu lwandi lwa bu kitapwa. (Mateo 1:21; Bene Loma 8:34) Leza ulondololanga kuno kulomba kwa Yesu mwanda kukwatañene na kiswa-mutyima kyandi. Leza wātumine Yesu pano pa ntanda “mwanda wa kupandija ino ntanda kupityila kudi aye.”—Yoano 3:17.
Le pa kupanda bilomba’nka kukulupila mudi Yesu kubapu?
No. Nansha byotufwaninwe kukulupila mudi Yesu pa kupanda, ino bilomba ne kulonga bintu bivule. (Bilongwa 16:30, 31) Bible unena’mba: “Monka mwikadile umbidi wampikwa mushipiditu i mufwe, ne lwitabijo lwampikwa mingilo nalo i lufwe.” (Yakoba 2:26) Pa kupanda, tufwaninwe:
Kwifunda myanda ya Yesu ne ya Shandi, Yehova.—Yoano 17:3.
Kwikala na lwitabijo mobadi.—Yoano 12:44; 14:1.
Kumwekeja lwitabijo lwetu na kukōkela misoñanya yabo. (Luka 6:46; 1 Yoano 2:17) Yesu wāfundije amba ke muntupo ense wa kumwita’mba “Mfumwami” ukapanda ino i enka boba balonga “kiswa-mutyima kya [Shandi] udi mūlu.”—Mateo 7:21.
Kulombola nyeke lwitabijo nansha ke mu masusu. Yesu wālombwele kino patōkelela kitatyi kyaānenene amba: “Yewa wa kūminina kufika ne ku mfulo kwine ukapandanga.”—Mateo 24:13.