BUKWASHI KU BISAKA
Mwa Kutaleja Bulobo Bobe
Mwinē pobe wanena nansha kulonga bintu bikulobeja, ino abe ubaleka kumwekeja bulobo bobe. Penepa mwinē pobe wamone amba kudi bintu kebyendekapo, ebiya washilula kukukokweja. Po pene bibakulobeja bininge. Le ubwanya kutalaja namani bulobo bobe mu myanda ikulobeja?
Byofwaninwe kuyuka
Bulobo bubwanya kukuletela misongo. Bukimbi bulombola’mba bulobo bupitepite buletanga kyaka kya kubela tansho, misongo ya dityima, njia, ne luba lwa kifu. Kadi bulobo bubwanya ne kukupwa tulo, kuvudija kuzumbija mutyima, misongo ya lukoba, ne bulebe. O mwanda Bible udi na bubinga bwa kunena’mba: “Leka bulobo . . . , mwanda [bubwanya’tu] kutwala kubi.”—Ñimbo ya Mitōto 37:8, kunshi kwa dyani.
Kululuma bulobo mu mutyima nako kuletanga makambakano. Kwikala nyeke na bulobo kubwanya kudingakanibwa na misongo ikudya munda. Kimfwa, ubwanya kuleka kukulupila bakwenu ne kwibafutulula. Uno mwikadilo ukalengeja bantu baleke kukufwena kadi ubwanya kona busongi bwenu.
Byobwanya kulonga
Tá mutyima ku ngikadila miyampe ya mwinē pobe. Lemba bintu bisatu byosangelanga ku mwinē pobe. Kitatyi kikwabo kyokaloba mwanda wa kintu kampanda kyaalonga, vuluka ngikadila yowalembele’ya. Kino kibwanya kukukwasha utalaje bulobo bobe.
Musoñanya wa mu Bible: “Ikalai na mutyima wa kufwija’ko.”—Kolose 3:15.
Ikala na mutyima wa kulekela. Dibajinji, tompa kumona bintu na mwibimwena mwinē pobe. Kino kikakukwasha witūle pa kyandi kyaba—ngikadila itelwa na Bible bu “mutyima wa kulangila bakwenu.” (1 Petelo 3:8) Kupwa, wiipangule amba, ‘Le kintu kine kyondobēle i kikatampe kyonkibwanyapo kulekela?’
Musoñanya wa mu Bible: “Kusūla kilubo i buya.”—Nkindi 19:11.
Mulombole milangwe yobe na kanye ne na bunwa. Ingidija kishima “ami.” Kimfwa, pa kyaba kya kunena’mba, “Kuntelepo mutyima mwanda kungitengapo kunombola koendele,” ino nena’mba, “Ami nzumbijanga mutyima shi nsá ibapite ino kuyuka moikadile mpika.” Kwisamba na butūkanye kubwanya kukukwasha utalaje bulobo bobe.
Musoñanya wa mu Bible: “Binenwa byenu bikale kyaba kyonso bilumbuluke, byelwe’mo mwepo.”—Kolose 4:6.
Teja na bulēme. Shi ubapu kwisamba, leka mwinē pobe akulondolole pampikwa kumutyiba. Shi mwinē pobe wapu kwisamba, pituluka mu byanena, umone shi ubebivwanija biyampe. Kakilongwa’tu katyetye ka kuteja kabwanya kukukwasha bininge utalaje bulobo bobe.
Musoñanya wa mu Bible: “Ufwaninwe kupeja pa kwivwana, kwija pa kwisamba.”—Yakoba 1:19.