Le Ubwanya Kwikala’ko Nyeke Namani?

Bilondolola Bible

Bible ulaile amba: “Yewa ulonga kisaka Leza, aye wikele nyeke.” (1 Yoano 2:17, Myanda Miyampe ku Bonso) Lelo Leza usaka ulonge bika?

• Wifunde myanda ya Leza ne ya Yesu wandi Mwana. Yesu wālombēle kudi Leza amba: “Buno’bu bo būmi bwa nyeke, bendelele kukuyuka abe, Leza umo kete wa bine, ne yewa owatumine, Yesu Kidishitu.” (Yoano 17:3) Le ‘kwendelela kuyuka’ Leza ne Yesu kulomba bika ne bika? Tubwanya kwibayuka na kwifunda Bible ne kwingidija musapu udi’mo mu būmi bwetu.a Bible i mulombole milangwe ya Yehova Leza, Mupangi wetu, Mwine upāna būmi. (Bilongwa 17:24, 25) Kadi Bible witulombola ne myanda ya Yesu wandi Mwana, mwine wāfundije “binenwa bya būmi bwa nyeke.”—Yoano 6:67-69.

• Lombola lwitabijo mu kitapwa kya kinkūlwa kya Yesu. Yesu wāile pano pa ntanda “kwingidila bantu ne kupāna būmi bwandi ke kinkūlwa.” (Mateo 20:28) Kitapwa kya kinkūlwa kya Yesu i kipe bantu mukenga wa kukekala’ko nyeke mu Paladisa pano pa ntanda.b (Ñimbo ya Mitōto 37:29) Yesu wānenene amba: “Leza byaasenswe ino ntanda bikatampe mpata, wapēne wandi Mwana wa bunka, amba ense ulombola lwitabijo mudi aye kakyonakanibwa, ino amone būmi bwa nyeke.” (Yoano 3:16) Yuka’mba bilombanga bivule kupita’ko’tu kwitabija bitupu mudi Yesu. Tufwaninwe ‘kulombola lwitabijo mwadi,’ na kwiendeja mungya bufundiji bwandi ne kiswa-mutyima kya Shandi.—Mateo 7:21; Yakoba 2:17.

• Ningija kipwano kyobe na Leza. Leza usakanga tumufwene ne kwikala balunda nandi. (Yakoba 2:23; 4:8) Leza udi’ko nyeke. Kakafupo nansha dimo, kadi usakanga balunda nandi nabo bekale’ko nyeke. Kupityila ku Kinenwa kyandi, Leza i mulombole byasakila boba bonso bamukimba’mba: “Ikala mūmi nyeke.”—Ñimbo ya Mitōto 22:26.

Milangwe mifwe idi na bantu pa būmi bwa nyeke

Milangwe mifwe: Būmi bwa nyeke bukekala bupungija.

Bubine: Kyabuntu kya būmi bwa nyeke kitambanga kudi Leza, mwine witusenswe ne witusakila twikale na nsangaji. (Yakoba 1:17; 1 Yoano 4:8) Aye uyukile amba pa kusaka twikale na nsangaji, tufwaninwe kwingila mingilo ya kamweno. (Musapudi 3:12) Leza i mulaye amba boba bakekala’ko nyeke pano pa ntanda, bakengila mwingilo wa nsangaji ne wa mvubu, obakamwena’mo abo ne baswe babo.—Isaya 65:22, 23.

Ne kadi, boba bakekala’ko nyeke bakendelela kwifunda bintu bipya pa Mupangi wabo ne pa mingilo yandi mikatampe ya bupangi. Aye i mupange bantu na mutyima wa kwikala’ko nyeke ne kwifunda myanda yandi, nansha byokebakasokolapo “nansha dimo mwingilo ulongele Leza wa bine tamba ku ngalwilo kutūla ne ku mfulo.” (Musapudi 3:10, 11) Nanshi, boba bakekala’ko nyeke bakekala kitatyi kyonso na bintu bisangaja bya kwifunda ne bya kulonga.