Lelo Bible Unena Bika pa Mwanda Utala Kupāna?
Bilondolola Bible
Bible witukankamika tupāne na mutyima tō kadi na milangwe miyampe. Ulombola’mba yewa obapa ukasangala, enka ne yewa upāna mwine. (Nkindi 11:25; Luka 6:38) Yesu wānenene amba: “Nsangaji ya kupāna itabukile ya kupebwa.”—Bilongwa 20:35.
Le kupāna kusangajanga Leza kitatyi’ka?
Kupāna kusangajanga Leza shi i kwa na mutyima tō. Bible unena’mba: “Nanshi muntu ne muntu alongele mwafwatakenya mu mutyima wandi, ino ke na mutyima kanyongapo nansha na kutononwa, mwanda Leza usenswe yewa upāna na nsangaji.”—2 Bene Kodinda 9:7, kunshi kwa dyani.
Kupāna na mutyima umo kubadilwa mu “butōtyi” bwitabijibwe na Leza. (Yakoba 1:27) Muntu ukwasha na buntu boba basakilwa bukwashi wingilanga kakasa kwa kakasa na Leza, mwine umonanga buno buntu bu kumwapuja. (Nkindi 19:17) Bible ufundija’mba Leza mwine ukalubwila yewa upāna.—Luka 14:12-14.
Le kupāna kekusangajangapo Leza kitatyi’ka?
Shi muntu wapāna na milangwe ya kwisakila. Kimfwa:
Mwanda wa kutulumuna bantu.—Mateo 6:2.
Mwanda wa kupebwa kintu kampanda.—Luka 14:12-14.
Mwanda wa kukamona lupandilo.—Ñimbo ya Mitōto 49:6, 7.
Shi i kupāna kwa kukwatakanya bintu bipeleje Leza. Kimfwa, ke biyampepo kupa muntu lupeto mwanda wa kukaya makayo a kwidya lupeto, kutoma bitomibwa bikolwañana nansha kukolwa mālwa. (1 Bene Kodinda 6:9, 10; 2 Bene Kodinda 7:1) Ne kadi, ke biyampepo kupa muntu lupeto aye na bukomo bwa kwikwatakanya na lupeto ino upela kwikwatakanya.—2 Bene Tesalonika 3:10.
Shi kulengeja muntu akomenwe kuvuija mingilo imupele Leza. Bible ufundija’mba mitwe ya bisaka ifwaninwe kusāsaketa bisaka byabo. (1 Temote 5:8) Ke biyampepo mutwe wa kisaka kupa bantu bakwabo bintu bivule akyo kisaka kyandi papo kisusuka. Yesu nandi wātopekele boba bapela kuvuija bisakibwa bya bambutwile babo banunu na kulanga’mba bintu byabo byādi ‘byabuntu bipānwe kudi Leza.’—Mako 7:9-13.