BIPANGUJO BYA BANKASAMPE
Le Majende I Makayo Mayampe?
Le ulanga’po namani?
Le i bibi kuyuka bya kumeso kupityila ku oloshikope, tabulete ya Oui-ja, nansha kwipangula bambuki?
Lelo nsekununi ya majende i mānga ya kufwatakanya—bulwi bwa kyelekejo bwilwa bintu biyampe na bintu bibi’ni nansha mufyeme bintu bikwabo?
Kino kishinte kisa kushintulula kine kimwekela majende bu asangaja ne mwanda waka ufwaninwe kudyumuka.
Mwanda waka majende asangajanga bantu?
Matyapu alupula bya kwipwija nabyo mukose abapetela bininge mu bintu bya majende, ebilupulanga mu mafilime, ku Televijo, mu makayo a video, ne mu mabuku. Kino kibalengeja bankasampe bavule basangele bintu pamo bwa kubuka na ñenyenye, bandemona, kwingidila bibanda, ne bumpaki bwa manga. Mwanda waka? Mwanda wa:
Kukimba kuyuka: Kukimba kuyuka shi kudi bine kīkalo kya mishipiditu
Kuzumbija mutyima: Kukimba kuyuka bintu bya kumeso
Kwisamba: Kukimba kwisamba na muntu osenswe ke mufwe
Shako bino byonso ke bibipo’tu. Kimfwa, i byendele’mo kukimba kuyuka bintu bya kumeso nansha kulanga muntu osenswe ufwile. Ino kudi byaka byofwaninwe kuyuka.
Mwanda waka ufwaninwe kudyumuka?
Bible witudyumuna ku kintu kyo-kyonso kikwatañene na majende. Kimfwa unena’mba:
“Kekukatanwapo mobe . . . muntu ubuka lubuko, nansha ulonga bya maleñanya, nansha wa mitāmu, nansha wa majende, muntu uloa bakwabo, ne wipangula babuka na bibanda nansha kilumbu, nansha wipangula bafwe. Mwanda muntu ense ulonga bino bintu i wa munyanji kudi Yehova.”—Kupituluka mu Bijila 18:10-12.
Mwanda waka Bible upeleja majende?
Majende akwashanga muntu apwane na bandemona. Bible ufundija’mba bamwikeulu bamo bātombokele Leza, bāikala ke balwana nandi. (Ngalwilo 6:2; Yude 6) Bano bamwikeulu babi, betwa bu bandemona, bongolanga bantu kupityila ku babuka na bibanda, bilumbu, ne boba babuka lubuko ne babuka na ñenyenye. Kulonga bino bintu kuketulengeja twikale ku mutamba wa balwana na Leza.
Majende akankamikanga lukulupilo lwa bubela lwa amba bantu bamo babwanya kulaa bya kumeso. Inoko, enka Leza kete ye ubwanya kunena’mba: “Tamba ku ngalwilo, ndayanga bintu bikafika, ne tamba kala, bintu kebyalongekele.”—Isaya 46:10; Yakoba 4:13, 14.
Majende akankamikanga lukulupilo lwa bubela lwa amba bantu bafwe babwanya kwisamba na bōmi. Inoko aye Bible unena’mba: “bafwe kebayukilepo kintu nansha kimo. . . kekudipo mwingilo nansha kufwatakanya bintu, nansha buyuki nansha tunangu mu Kibundu.”—Musapudi 9:5, 10.
Pa kino, Batumoni ba Yehova bapelanga bilongwa bikwatañene na majende. Kadi kebepwijangapo mukose na bintu bidi’mo koijibwa bizaba, kwingidila bibanda, ne bimonwa. Nsongwakaji umo witwa bu Maria unena’mba: “Shi mu filime mudi bintu bya majende, nkifwaninwepo kutala’yo.”a
Monka mwiinenyanga muntu mubi mwanda wa umumone mu muswelo mukwabo, bandemona nabo bakimbanga kwimwekeja bu bantu bosenswe bafwile
Byobwanya kulonga
Sumininwa “kulama mutyima wa mundamunda utōka” ku meso a Yehova na kuleka kilongwa nansha kwipwija mukose ko-konso kukwatañene na majende.—Bilongwa 24:16.
Sumbula kintu kyo-kyonso kyodi nakyo kikwatañene na majende. Tanga Bilongwa 19:19, 20, umone kimfwa kiyampe kishile bene Kidishitu ba mu myaka katwa kabajinji mu uno mwanda.
Vuluka: Shi upele bilongwa ne kwipwija mukose kudi’mo majende, ukekala ku mutamba wa Yehova. Kadi kino kisangajanga mutyima wandi!—Nkindi 27:11.
a Ke mfumopo yonso ya kufwatakanya ikankamikanga majende. Inoko, bene Kidishitu bengidijanga mutyima wabo wa mundamunda mufundijibwe na Bible mwanda wa kupela kilongwa nansha kwipwija mukose ko-konso kudi’mo majende.—2 Bene Kodinda 6:17; Bahebelu 5:14.