Isaya 41:10—“Kokakwatwa Moyo, Mwanda Ngidi Nobe”

“Kokakwatwa moyo, mwanda ngidi nobe. Kokazumbija mutyima, mwanda ami ne Leza obe. Nkakukomeja, bine, nkakukwasha, bine, nkakukwata na kuboko kwami kwa lundyo kwa boloke.”—Isaya 41:10, Bwalamuni bwa Ntanda Mipya.

“Kokakwatwapo moyo, mwanda ndi nobe kokizumbazumbapo, mwanda ami ne Leza obe, nkakukomeja; eyo, nkakukwasha; eyo, nkakukankamija ne kuboko kwa lundyo kwa boloke bwami.”—Isaya 41:10, Mukanda Ukola.

Nshintulwilo ya Isaya 41:10

Yehovaa Leza ukulupija batōtyi bandi ba kikōkeji amba nansha shi batanwe na makambakano’ka ukebakwatakanya.

“Ngidi nobe.” Yehova ulombola batōtyi bandi amba kebadipo bunka. O mwanda kebafwaninwepo kukwatwa moyo. Yehova umonanga byobekonda nabyo kadi wivwananga milombelo yabo, mu uno muswelo udi bwa aye udi nabo pamo.—Ñimbo ya Mitōto 34:15; 1 Petelo 3:12.

“Ami ne Leza obe.” Yehova utūkija batōtyi bandi mutyima na kwibavuluja amba wimonanga bu Leza wabo, ne amba wibetabije bu batōtyi bandi. O mwanda bafwaninwe kukulupila amba i kutupu kintu kikakankaja Leza aleke kwibakwasha.—Ñimbo ya Mitōto 118:6; Bene Loma 8:32; Bahebelu 13:6.

“Nkakukomeja, bine, nkakukwasha, bine, nkakukwata na kuboko kwami kwa lundyo kwa boloke.” Yehova wanena mulangwe umo mu ino misemwa isatu mwanda wa kukomeneja amba ukakwatakanya bine bine batōtyi bandi. Yehova i mwingidije muneneno wa kyelekejo mwanda wa kulombola byaloñanga shi bantu bandi basakilwa bukwashi. Kitatyi kipona muntu, Leza umutambikanga kuboko kwandi kwa lundyo mwanda wa kumwimika.—Isaya 41:13.

Bible i kingidilwa kikatampe kingidijanga Leza mwanda wa kukankamika ne kukwasha batōtyi bandi. (Yoshua 1:8; Bahebelu 4:12) Kimfwa, Kinenwa kya Leza Bible kipanga madingi mafikepo boba badi mu makambakano pamo bwa bulanda, misongo, nansha kufwilwa. (Nkindi 2:6, 7) Leza ubwanya ne kwingidija mushipiditu ujila, nansha’mba bukomo bwandi bwingila, mwanda wa kukwasha batōtyi bandi bekale na ñeni mijalale kadi baleke kulēmenenwa na makambakano abo.—Isaya 40:29; Luka 11:13.

Ngikadilo yālembelwe’mo Isaya 41:10

Bino binenwa byākankamikile Bayuda ba kikōkeji bāselelwe bu misungi mu Babiloni mwenda mafuku. Yehova wālaile amba dya ku mfulo kwa bu misungi bwa Bayuda, kwādi kwa kunenwa myanda ya amba kudi walwana wiya konakanya mizo ijokolokele Babiloni ne kutompa kukwata Babiloni. (Isaya 41:2-4; 44:1-4) Nansha Babiloni ne mizo iijokolokele byoyādi ya kukwatwa moyo ne luzakalo pa mwanda wa ino myanda, ino Bayuda abo kebādipo na kya kukwatyilwa moyo mwanda Yehova wādi wa kwibakinga. Yehova wēbakulupije misunsa itatu mituntulu amba ‘kebakakwatwa moyo.’—Isaya 41:5, 6, 10, 13, 14.

Dibajinji Yehova wālombwele bino binenwa Bayuda ba kikōkeji bādi bu misungi mu Babiloni. Inoko, wāsakile amba binenwa bidi mu Isaya 41:10 bilamwe mwanda wa bikankamike ne batōtyi bandi dyalelo. (Isaya 40:8; Bene Loma 15:4) Ukwashanga batōtyi bandi dyalelo, enka na mwaādi ukwashisha bengidi bandi pa kala.