Nkindi 22:6—“Pa Nsongwalume Bibidizi Biyampe ku Ngalwilo ya Yandi Mingilo”

“Fundija mwana mwana-mulume dishinda dyafwaninwe kwenda’mo; nansha shi wanunupa kakasāsuka’mopo.”—Nkindi 22:6, Bwalamuni bwa Ntanda Mipya.

“Pa nsongwalume bibidizi biyampe ku ngalwilo ya yandi mingilo; nansya pakekala mununu, kakasonsoloka byo po.”—Nkindi 22:6, Bisonekwa Bitokele.

Mushintulwila Nkindi 22:6

Bambutwile bafundijanga babo bana basanswe Leza ne kulēmeka bijila byandi, babwanya kukulupila’mba byobebafundija’bya bikekala na lupusa luyampe mu bwabo būmi bonso.

“Fundija mwana mwana-mulume dishinda dyafwaninwe kwenda’mo.” Bino binenwa bibwanya ne kwalamunwa’mba, “tūla mwana mu dishinda diyampe.” Mavese mavule a mu Nkindi asoñanya bambutwile bafundije babo bana kuyuka kiyampe ne kibi pobakidi bankasampe bininge. (Nkindi 19:18; 22:15; 29:15) Ino nansha nankyo, bambutwile ba buswe bayukile amba babo bana, kimfwa batame, badi na bwanapabo bwa kwitongela. Nanshi pa kyaba kya kwibalombola’tu bya kulonga, balangulukanga nabo ne kwibakwasha bekale bantu batame kadi beludika abo bene ne kwikwatyila butyibi buyampe.—Kupituluka mu Bijila 6:6, 7; Bene Kolose 3:21.

Befundi bamo ba Bible bamonanga’mba bino binenwa bishintulula “kufundija mwana mungya kipangila kyandi,” nansha mwendele bukōkekōke bwandi. Buno bushintuludi bumweka bu bwendele’mo, ino mobimwekela, binenwa bya Kihebelu byalamwinwe bu “dishinda dyafwaninwe kwenda’mo” bifunkila pa mwiendelejo wa mu būmi muyampe nansha moloke. Mukanda wa Nkindi wisambila bininge pa miswelo ibidi ibwanya kwiendeja’mo muntu. Mubajinji witwa bu “dishinda dya bantu bayampe,” “dishinda dya tunangu,” ne “dishinda dyoloke.” (Nkindi 2:20; 4:11; 23:19) Wa bubidi nao witwa bu “dishinda dya bantu babi,” “dishinda dya mulembakane,” ne “dishinda dibi.” (Nkindi 4:14; 12:15; 16:29) Nanshi dishinda ‘difwaninwe kwenda’mo mwana’ difunkila pa “dishinda dyoloke,” dino dyo dishinda difundija Kinenwa kya Leza Bible.—Ñimbo ya Mitōto 119:105.

“Nansha shi wanunupa kakasāsuka’mopo.” Kitatyi kifundija bambutwile wabo mwana misoñanya ya mu mwikadilo ya Leza, umwekanga bwa aye ukashala mu kashinda ka boloke mu bwandi būmi bonso. Inoko, kino kekishintululapo amba mwana ufundijibwa mobifwaninwe ‘kakasāsuka’po’ nansha dimo mu dishinda dyoloke nansha kutyumuna bijila bya Leza. Kimfwa, shi muntu upityija kitatyi pamo na bantu bakankamika bakwabo kulonga bibi, ubwanya kushiya “tushinda toloke swā” ne kulonga bibi. (Nkindi 2:12-16; 1 Bene Kodinda 15:33) Nansha namino, shi bambutwile bafundije babo bana kulonda misoñanya ya Leza, bebapanga mukenga muyampe mpata wa kwikala na būmi bulumbuluke.—Nkindi 2:1, 11.

Ngikadilo yālembelwe’mo Nkindi 22:6

Shapita 22 wa Nkindi udi na binenwa bīpibīpi bilombola tunangu twa Leza pa bitala ngikadilo mishileshile ya mu būmi. Bino binenwa bikomeneja pa mvubu ya kumonwa bu muntu myampe ku meso a Yehova.a Pa kumonwa namino, muntu unenwe kulombola ngikadila pamo bwa kwityepeja, buntu, ne kwingila bininge. (Nkindi 22:1, 4, 9, 29) Ku mutamba mukwabo, mavese makwabo alombola’mba boba basūla misoñanya ya Leza kadi basusula balanda bakatanwa na bibi.—Nkindi 22:8, 16, 22-27.

Nansha mavese mavule a mu Nkindi shapita 22 byokeesambilapo pa kufundija bana, ino alombola mwiendelejo wa mu būmi utwala ku kutōkelwa mutyima na Leza kadi uleta nsangaji ya bine. (Nkindi 22:17-19) Shi bambutwile bafundija babo bana mungya dino dishinda, balombolanga’mba bebasakilanga biyampe mu būmi.—Bene Efisesa 6:1-3.

Tala ino video mīpi umone myanda mikatampe idi mu mukanda wa Nkindi.