Mwanda Waka Mfwaninwe Kulonga Ndoe na Banabetu?

• “Balunda Bayampe Besanshija”

• Bubinga bubidi bwa kulongela ndoe

• Binena bakwenu

“Balunda Bayampe Besanshija”

Bana na bana betwanga bu “balunda bayampe besanshija.” Wibasenswe, kadi nabo bakusenswe—inoko kyaba kimo mubwanya kwipya nabo myanda. Helena wa myaka 18 unena’mba, “nkasami mwana-mulume undobejanga. Uyukile bya kulonga pa kundobeja!”

Kubulwa kumvwañana kumo kwa bana na bana kubwanya kupwa na kwisamba ne kwiivwanika. Kimfwa:

• Bana na bana babidi badi mu kyumba kimo babwanya kwipotomeja. Le bakalonga’po namani? Bafwaninwe kupwija myanda ne kwilēmeka. Bafwaninwe kwingidija musoñanya wa mu Bible udi mu Luka 6:​31.

• Bana babidi bana-bakaji babwanya “kwivwadila” bisandi pampikwa kwilomba. Le bakalonga’po namani? Bafwaninwe kwisambīla’po ne kwitūdila’ko mikalo myendele’mo. Bafwaninwe kwingidija musoñanya wa mu Bible udi mu 2 Temote 2:​24.

Kyaba kimo, myanda īpile bana na bana ibwanya kubipila’ko kadi kubwanya kulupuka bibi. Langulukila pa bimfwa bibidi bya mu Bible:

• Ba Midiamu ne Alone bākwatyilwe mwanabo Mosesa mukao, kwalupuka bibi. Tanga nsekununi idi mu Umbadilo 12:​1-​15. Kupwa wiipangule amba: ‘I muswelo’ka ombwanya kuleka kukwatyilwa mwanetu mukao?’

• Kaini wālobele bininge wāipaya mwanabo Abele. Tanga nsekununi idi mu Ngalwilo 4:1-12. Kupwa wiipangule amba: ‘I muswelo’ka ombwanya kwīfula ku bulobo shi tubepi myanda na mwanetu?’

Bubinga bubidi bwa kulongela ndoe

Nansha shi i bikomo kwiivwana na banabenu, ino kudi bubinga bubidi bofwaninwe kulongela bukomo bwa kwiivwana nabo.

1. I kilomboji kya kutama. Nsongwalume Alex unena’mba, “Nadi ndobela bukidibukidi bankasami babidi bana-bakaji. Pano kendi muntu utalala kadi nebatūkijije mutyima. Mbwanya kunena’mba natama.”

   Bible unena’mba: “Yewa wija pa kukwatwa bulobo udi na kusansanya kukatampe, ino yewa wampikwa kitūkijetyima ulombolanga patōka bulembakane bwandi.”​—Nkindi 14:29.

2. I kwiibidija kuyampe mwa kukekadila kumeso. Shi kubwanyapo kūminina kubulwa kubwaninina kwa banabenu, le bikakwikadila namani na mwinē pobe, mwingidi nobe, mukulumpe wa kaji, nansha ke na bantu bakwabo?

   Myanda ya mu būmi: Bwino bobe bwa kwisamba ne kupwija myanda bukakukwasha upwane biyampe na bakwenu, kadi kisaka kyenu kyo kifuko kilumbuluke kya kutamijija’mo buno bwino.

   Bible unena’mba: “Mungya momubwaninya, ikalai mu ndoe.”​—Bene Loma 12:18.

Le usakilwa bukwashi bwa mwa kupwijija myanda na banabenu? Tanga “Binena bakwenu,” ne kubandaula fishi wa kulemba’po unena’mba, “Wiivwane na Banabenu.”