Ukokeja Kwikala Na ‘Mutyima Pamo bwa wa Ntambo’
BIBLE kitatyi kimo wingidijanga ntambo bu kyelekejo kya bukankamane ne kikulupiji. Bankomonkomo nansha bantu bakankamane batelwanga’mba badi na ‘mutyima pamo bwa wa ntambo’ boloke nabo batelwanga bu ‘bantu bakikulupiji pamo bwa mwenze wa ntambo.’ (2 Samwele 17:10; Nkindi 28:1) Nakampata shi abamukolomona, ntambo wikalanga utendelwa’mba “utabukile bukomo umbukata mwa banyema.”—Nkindi 30:30.
Yehova Leza i mwenzankanye kusumininwa kwandi kwa kusaka kukinga bantu bandi, pamo bwa ntambo wakubulwa moyo. Isaya 31:4, 5 unena’mba: “Monka mubulumina ntambo ne mwenze wa ntambo pa kikwatwa kyandi, nansha bakumbi bangibangi babungakanibwa kakakwatwapo nzuba pa diwi dyabo, nansha kulekapo pa diwi dyabo ehe; mo monka ne Yehova wa bibumbo nandi mwakatūkila kulwa pa lūlu lwa Ziona . . . ukalama ne kunyongolola’kyo, ukalelemba ne kupandija’kyo.” Yehova i mupe bengidi bandi kikulupiji amba wibakengelele nyeke, nakampata mu kitatyi kya mitabakano.
Bible udingakanyanga walwana mukatampe na muzo wa muntu, Satana Dyabola, bu ntambo ubuluma ukimba wa kubokota. Bisonekwa bitusoñanya’mba shi musaka kwinyongolola mu dikinga dyandi, nankyo: “Tūkijai mityima, tengelai.” (1 Petelo 5:8) Muswelo umo wa kwikibwanya i na kuleka kukunuka kumushipiditu, ke-pantu kwikilonga kukokeja kwituletela lufu. Pa kino Yesu wānene’mba: “Mwikale kudyumuka bānwe bene, mwanda wa kunena’mba mityima yenu yakaīle kulemenenwa, ne mu dyopolo, ne bunkolwankolwa, ne byakūmininwa bya buno būmi.” (Luka 21:34-36) Eyo, kushala nyeke batengele kumushipiditu mu ano “mafuku a kumfulo” kukokeja kwitupa ‘mutyima pamo bwa wa ntambo,’ mutyima ‘mūmu, ukulupile nyeke mudi Yehova.’—2 Temote 3:1; Mitōto 112:7, 8.
[Kapango pa paje 32]
Lelo Uketabija Kupempulwa?
Nansha byotudi mu ino ntanda ya masusu, ukokeja kutana nsangaji itamba ku buyuki bwabinebine butala padi Leza, Bulopwe bwandi, ne mpango yandi milumbuluke itala padi bantu, na kwifunda Bible. Shi usaka kuyuka myanda mivule nansha shi usaka muntu kampanda aye ku yobe njibo kwifunda nobe Bible ku bitupu, nankyo sonekela Association “Les Témoins de Jéhovah” B.P. 634 Limete, Kinshasa, Zaïre nansha adrese imo mu alombwelwe pa paje wa 2.