Twi Ba Dyese Mwanda Yehova Witulombolanga Dishinda Dyandi
“Mwikadile Leza [“wabine,” NW], dyandi dishinda i dilumbuluke she-e; kinenwa kya Yehova i kitompibwe.”—2 SAMWELE 22:31.
BANTU bonsololo basakilwanga kuludikwa. Byabine, kwitusakilanga bukwashi bwa kwitōlola umbūmi bwetu bonso. Eyo, Yehova witupele ñeni ne mutyima wa mundamunda bya kwitukwasha tuyuke kusansanya biyampe ne bibi. Ino mutyima wetu wa mundamunda usakilwa kufundijibwa shi tusaka wikale kalombwe kakulupilwe. (Bahebelu 5:14) Ne ñeni yetu nayo monka na monka, isakilwa bulombodi boloke—pamo ne bufundiji bwa kujingulula buno bulombodi—shi tusaka kutyiba butyibi bulumbuluke. (Nkindi 2:1-5) Nansha shi twi balombolwe bulombodi boloke, dimodimo, pa mwanda wa bimyanda bya kubulwa kulaya bitutana umbūmi, butyibi bwetu bubwanya kusūpaila, twakankalwa kufikila pa byotwadi tusaka. (Musapudi 9:11) Mwanda ketuyukangapo bintu biketufikila dya kesha.
2 Bino byonso ne bikwabo’po, byo byālengeje mupolofeto Yelemia asoneke’mba: “A Yehova ngyukile’mba dishinda dya muntu kedidipo kwadi aye mwine, ehe; kekidipo mu muntu unañanga kolola matabula andi.” (Yelemia 10:23) Yesu Kidishitu, muntu mukatakata wa kasha ne kashele, wāitabije kuludikwa. Amba: “Mwana kayūkapo kwilongela kintu aye mwine, nansha kika, nansha kika, poso wamona Shandi ulonga’kyo, ke-pantu bintu byonso byālonga aye, ne Mwana byo byonka ulonga byonka’byo.” (Yoano 5:19) Bine, i kya tunangu kwiula Yesu na kukimba bukwashi kudi Yehova wa kuludika matabula etu! Mulopwe Davida wāimbile’mba: “Mwikadile Leza [wabine, NW], dyandi dishinda i dilumbuluke she-e; kinenwa kya Yehova i kitompibwe; aye i ngabo kudi boba bonsololo bakulupila mudi aye.” (2 Samwele 22:31) Wivwane tukimbe kunanga mu dishinda dya Yehova pa kyaba kya kulonda tunangu twa batwe bene, i bine ketukabulwepo kwikala na buludiki bubwaninine bwa kulonda. Kupela dishinda dya Leza i kwiobolwela byamalwa.
Yehova Ulombolanga Dishinda
3 Ivwana byāfikile ba Adama ne Eva. Nansha byobādi bampikwa bubi, ino bādi ba kuludikwa. Yehova kālekelepo Adama elongele bintu byonso aye mwine mu budimi bulumbuluke bwa Edena. Ino Leza wāmupele mwingilo wa kwingila. Dibajinji Adama wādi wa kwinika banyema majina. Kupwa Yehova wāpa ba Adama ne Eva bitungo bya myaka mivule. Bādi ba kunekenya ntanda, kwiiyuja na lutundu lwabo, ne kukwatakanya banyema pano panshi. (Ngalwilo 1:28) Uno wādi mwingilo mukatampe, ino mfulo yao yādi ya kwikadija ntanda yonso ke paladisa iyudile’mo bantu babwaninine bashikete umbumo na banyema. Bine, byādi byepelo biyampe’po kashaa!Kupityidila, ba Adama ne Eva bādi ba kwikala besamba nyeke na Yehova mafuku onso obādi ba kunanga na kikōkeji mu dishinda dyandi. (Enzankanya na Ngalwilo 3:8.) Kupwana na Umpangi kipwano kyampwaninine ne kyaendaenda i madyese a kutendelwa mpata!
4 Yehova wājidikile ba mulume ne mukaji babajinji kudya ku mutyi wa kuyuka biya ne bibi wādi mu Edena, uno wādi mukenga umbajinji obāpelwe wa kulombola kikōkeji kyabo kwadi—amba basaka kunanga mu dishinda dya Yehova. (Ngalwilo 2:17) Ino ne kwija’po kwine mpika, kikōkeji kyabo kyātūlwa pa ditompo. Ba Adama ne Eva bādi ba kulombola’mba badi na dikōkeji kudi Yehova, bakulupile mu milao Yandi, shi bādi amba bāshele bakōkele kwadi popa pāile Satana kobadi na binenwa bya kyongo. Ino kya bulanda, bābulwa dikōkeji ne kikulupiji. Eva wāongolwa, ebiya wātombokela Leza pāmutandile Satana kumupa bwanapabo ne kushinga Yehova kato ka bumbepai. Adama nandi wēlunga mu buno bubi. (Ngalwilo 3:1-6; 1 Temote 2:14) Byamalwa byālupukile’ko i bikatampe byamwiko. Kunanga mu dishinda dya Yehova kwādi kwa kwibavudijija nsangaji pobādi ba kwikala bavuija bityebitye kiswamutyima kyandi. Ino būmi bwabo bwāyula makambakano ne tusua kutūla ne kwēbapitwile lufu.—Ngalwilo 3:16-19; 5:1-5.
5 Inoko Yehova kāshintyilepo mpango yandi ya amba difuku dimo ntanda ikekala ke paladisa, kīkalo kya bantu babwaninine, bampikwa bubi. (Mitōto 37:11, 29) Ne kadi kabulwangapo kupa bantu banangila mu dyandi dishinda buludiki bubwaninine ne lukulupilo lwa kukamona kufikidila kwa uno mulao. Ku boba ba umbukata mwetu badi na matwi a nteja, dino i diwi dya Yehova ditwita kunyuma amba: “Dine dino’di dyo dishinda, nangaimo.”—Isaya 30:21.
Bamo Bānangile mu Dishinda dya Yehova
6 Mungya mulombwela mānga ya Bible, i bana batyetye kete ba ku lutundu lwa Adama ne Eva bānangile mu dishinda dya Yehova. Abele ye wādi muntu umbajinji. Nansha byaāfwile ukidi mubishimubishi, wāfwile mwitabijibwe na Yehova, nanshi ukulupilwe kukasangulwa pa “kusanguka kwa . . . boloke” bakasangulwa pakabwana kitatyi mungya muswidile Leza mwine. (Bilongwa 24:15) Nandi ukamona kufikidila kwa mpango mikatampe ya Yehova yotukitengele itala pa bantu ne pa ntanda. (Bahebelu 11:4) Muntu mukwabo wānangile mu dishinda dya Yehova i Enoke, wānene bupolofeto bwa mfulo ya ino ngikadilo ya bintu bulaminwe mu mukanda wa Yude. (Yude 14, 15) Enoke kālēlepo myaka mivule mu būmi bwandi. (Ngalwilo 5:21-24) Ino ne dyalelo ‘ukisapulwa bukamoni amba wātōkeje Leza ku mutyima.’ (Bahebelu 11:5) Nandi, pamo’nka bwa Abele, pa kwikala waāla walāla, wādi na kyepelo kya lusangukilo, nandi ukekalanga umbukata mwa boba bakamona kufikidila kwa mpango ya Yehova.
7 Ntanda yābadikidile Dilobe poyēpēne bininge mu kulonga bubi, kwikala na kikōkeji kudi Yehova kwādi ke ditompo dikomo dya dikōkeji. Ntanda’ya poyādi keikafule, kwātenwe’nka kakisumpi katyetye ka bantu bādi bananga mu dishinda dya Yehova. Noa ne kisaka kyandi bāivwene Leza, bākulupila mu byaānene. Bāvuija mingilo yonso yēbapelwe, kadi bāpela ne kwikuja mu bilongwa bibi bya ntanda ya mu mafuku abo’a. (Ngalwilo 6:5-7, 13-16; Bahebelu 11:7; 2 Petelo 2:5) Tufwaninwe kutendela dikōkeji dyabo ne kikōkeji kyabo kyabinebine. I pa mwanda wakyo obāpandile ku Dilobe, bāikala ke bankambo betu.—Ngalwilo 6:22; 1 Petelo 3:20.
8 Mwenda mafuku, Yehova wāsamba kipwano na bana ba Yakoba muntu wa kikōkeji, bāikala ke muzo wandi wa pa bula. (Divilu 19:5, 6) Yehova wāpene buludiki ku bantu bandi bādi nandi mu kipwano kupityila ku Bijila bisonekwe, ku babitobo, ne ku bwendeji bwa bupolofeto bwaendaenda. Ino Isalela ye wādi na kiselwa kya kulonda buno buludiki. Yehova wāsoñenye mupolofeto wandi kusapwila bene Isalela amba: “Monapo bidi, mbika ku meso enu dyalelo dino’di dyese ne mafingo; i dyese shi mutejanga ku bijila bya Yehova Leza wenu, byo nemujidika dyalelo dino; kadi i mafingo shi kemukatejangapo ku bijila bya Yehova Leza wenu, nanshi musasuka mu dishinda dyo nemusoñanya dyalelo dino’di, kemulonda baleza bangi nabo, bo kemwayukilepo.”—Kupituluka 11:26-28.
Kyālekēle Bakwabo Kunangila mu Dishinda dya Yehova
9 Bene Isalela, pamo bwa ba Adama ne Eva, bādi bafwaninwe kukulupila mudi Yehova ne kwikala na dikōkeji kwadi shi bādi basaka kushala bakōkele. Isalela wādi muzo mutyetye ujokolokelwe na balondakani bādi betobelwe mavita. Mu bwikike bwa kunshi ne kushika mwādi Edipito ne Efiopya. Mu bwikike bwa kungala ne kutunduka mwādi Shidea ne Ashidia. Kufulakufula kwabo kwādi Fidishitia, Amona, Moabu ne Edoma. Bonso bano bādi balwana na Isalela mu bitatyi bishileshile. Ne kadi bonso bano bādi na mutōtelo wa bubela, ubikelwe na butōtyi bwa bankishi, bwa malumba a ñenyenye, ne na bisela bya busekese bwenda muongo pa ntanda, kutentekela’po ne butapani bwa kwela bana bu bitapwa. Bano balondakani na Isalela bādi banyemena ku bileza byabo bya kwibapa bisaka bikatampe, mwangulo muvule, ne bushindañani ku bulwi.
10 Ino bene Isalela kasuku kabo bo bādi batōta Leza umo kete—Yehova. Wēbalaile kwibesela madyese a kwibapa bisaka bikatampe, mwangulo wa ntanda ne miseke ne mutyima-ntenke ku balwana nabo—shi bakōkele ku bijila byandi. (Kupituluka 28:1-14) Kya bulanda, bavule mu Isalela bālekele kukōkela. Bangibangi mu boba bādi banangila mu dishinda dya Yehova bāsusuka pa mwanda wa dikōkeji dyabo. Bamo bāmweshibwa malwa, basepwa, bakupilwa, bakutwa, bāashibwa mabwe ne kwipaibwa na babo bonka bene Isalela. (Bilongwa 7:51, 52; Bahebelu 11:35-38) Bine, dyādi ditompo ku bantu bakikōkeji! Mwanda waka bavule bābombokele mu dishinda dya Yehova? Ivwana bifwa bibidi bya mu mānga ya Isalela bitulombola mulangilo mubi obādi nao.
Kifwa Kibi kya Ahaza
11 Ahaza wābikele bulopwe bwa kunshi bwa Yuda mu myaka ya tutwa mwanda K.K.K. Bulopwe bwandi kebwādipo bwa ndoe. Kitatyi kimo, Shidea ne bulopwe bwa kungala bwa Isalela bēlungile pamo bāmutamba divita, ponka’po “mutyima wandi wamutumbuka, ne mutyima wa bandi bantu bene kumo.” (Isaya 7:1, 2) Yehova wāela Ahaza mu kyadi, wāmwita amba amutompe, ino Ahaza wāpela’nka ne pelēe! (Isaya 7:10-12) Ku mfulo Yuda wātyumunwa ku divita, wāmona byamalwa bivule.—2 Bilongwa 28:1-8.
12 Ahaza kātuninyepo kulomba bukwashi kudi mulopwe wa Ashidia, nansha byaāpelele kutompa Yehova. Yuda wāendelela na kususuka ku makasa a balondakani nandi. Ahaza mulopwe pa kwalamukilwa na Ashidia “kumumwesha byamalwa,” “watapile bitapwa ku baleza ba Damakasa bonka bamutapile; nandi amba: Ke-bantu baleza ba balopwe ba Shidea abebakwasha, nanshi nami nkatapile bitapwa ko badi, amba nami bankwashe.”—2 Bilongwa 28:20, 23.
13 O mwanda Yehova wānene Isalela mwenda mafuku amba: “Ami ne Yehova Leza obe ukulombola kakumwenamo wakukukunkuja pa dishinda dyokōkeja kwenda. E-e, shi watejeje ku bijila byami! longa nankyo ndoe yobe yaikele’nka bwa munonga, ne boloke bobe bwa mantanki a kalunga-kamema.” (Isaya 48:17, 18) Ahaza pa kuvundamukila ku baleza ba Shidea, kyāmwekelele patōka amba wādi kulampe na ‘dishinda dyaādi ufwaninwe kwenda.’ Wāongwelwe na mulangilo wa bantu ba mizo, kanyemena ku yabo nsulo ya bubela kukakimba mutyima-ntenke, pa kyaba kya kunyemena kudi Yehova.
14 Baleza ba mizo, kubadila’mo ne boba ba Shidea bene, bādi nyeke ‘baleza bampikwa mvubu.’ (Isaya 2:8) Myaka kunyuma, mu bulopwe bwa Mulopwe Davida, bukatampe bwa Yehova pa baleza ba Shidea bwāmwekele patōka pāikele bene Shidea ke bengidi ba Davida. (1 Bilongwa 18:5, 6) Yehova bunka bwandi, “Leza wa baleza, kadi i Mfumwandya bamfumu, Leza mukatakata mukomokomo mwine utenteja byamwiko’tu,” ye upānanga mutyima-ntenke wabinebine. (Kupituluka 10:17) Ino Ahaza aye wāela nyuma kudi Yehova, kanyemena ku baleza ba mizo kukakimba mutyima-ntenke. Kintu kyālupukile’ko wādi musala onka ku Yuda.—2 Bilongwa 28:24, 25.
Bayuda ne Yelemia mu Edipito
15 Yehova wālekele bene Babiloni, bāiya konakanya Yelusalema ne tempelo yandi mu 607 K.K.K. mwanda wa kubulwa dikōkeji kukatampe kwa bantu bandi. Bavule mu uno muzo bāselwa bu misungi mu Babiloni. Ino bakwabo bāshala, ne mupolofeto Yelemia wādi umbukata mwabo. Mbikavu Ngedadia pa kwipaibwa, kino kisumpi kyānyemena mu Edipito, kyāsela ne Yelemia mwine kumo. (2 Balopwe 25:22-26; Yelemia 43:5-7) Pa kufika ku Edipito, bāshilula kwela bitapwa ku baleza ba bubela. Yelemia wālanguluka na bano Bayuda bampikwa kikōkeji, ino abo bāumija mityima. Bāpela kuvundamukila kudi Yehova, bāsaka’ko kwendelela na kwela bitapwa kudi “mulopwe-mukaji wa mūlu.” Mwanda waka? Mwanda uno o muswelo obādi balonga abo ne bankambo babo ‘mu bibundi bya Yuda ne mu mikenza ya Yelusalema; mwanda papo bādi bekele ne bidibwa bingibingi, kadi bādi biyampe ne kumonapo kyamalwa mpika.’ (Yelemia 44:16, 17) Bayuda bādi kadi batompola’mba: “Kushilwila po twalekele kusōka ensense ku mulopwe-mukaji wa mūlu, ne kupungulula byakwela bipungulule kwadi, tubabulwe bintu byonso, ne kukubijibwa ku kipete, ne ku kipupo kya nzala.”—Yelemia 44:18.
16 I kya bulanda! Lelo abyo bine byādi namani? Bayuda bādi bela bitapwa ku baleza ba bubela mu ntanda yēbapele Yehova. Kitatyi kikwabo, bāsusuka pangala pa bupondo bwabo, kifwa mu mafuku a Ahaza. Ino Yehova wādi “wija pakufuna bulobo” na bantu bandi bāsambile nandi kipwano. (Divilu 34:6; Mitōto 86:15) Wibatumina bapolofeto ba kwibakankamika bēsase. Ne kadi Yehova wādi wibesela kitatyi kyobādi babikalwa na mulopwe udi na kikōkeji, penepa bantu bonso bāmwena mu madyese’a, nansha bavule byobādi bambulwa kikōkeji. (2 Bilongwa 20:29-33; 27:1-6) Bine, Bayuda bādi mu Edipito bādi bedimba amba ntundubuko yobādi nayo mu ntanda yabo yādi itamba ku baleza ba bubela!
17 Kumeso kwa 607 K.K.K., Yehova wākankamikile bantu ba mu Yuda amba: “Tejai diwi dyami, nami nkekalanga Leza wenu, kadi nenu mukekalanga bami bantu; ino munanga mu dishinda dyonso dyo nemusoñanya, nabya kikekalanga biyampe ko mudi.” (Yelemia 7:23) Bayuda pa kupela kunanga ‘mu dishinda dyonso dyēbasoñenye Yehova,’ bājimija tempelo yabo ne ntanda yabo mine kumo. Twepukei netu, kutyina amba twakaponena mu kino kilubo.
Yehova Weselanga Boba Bananga mu Dishinda Dyandi
18 Ne dyalelo, ne pa kala, kunanga mu dishinda dya Yehova kulombanga nyeke kwikala na dikōkeji—kusumininwa kumwingidila bunka bwandi. Kulombanga kwikala na kikulupiji kyabinebine ne lwitabijo lukunkane lwa kukulupila mu milao ya Yehova amba i yabine ne amba ikafikidila. Kunanga mu dishinda dya Yehova kulombanga kikōkeji—kulonda bijila byandi pambulwa kusasukila pafula, ne kulama misoñanya yandi mitabuke kunengela. “Yehova i moloke; usenswe boloke.”—Mitōto 11:7.
19 Ahaza wākakimbile mutyima-ntenke ku baleza ba Shidea. Bene Isalela bādi mu Edipito bādi bakulupile mudi “mulopwe-mukaji wa mūlu”—leza mukaji wādi utōtwa bininge mu Moyen-Orient—mwanda wa kumona ntundubuko ya bintu. Baleza bavule ba dyalelo ke bankishipo, mhm. Yesu wādyumwine kidyumu kya kwingidila “lupeto” pa kyaba kya kwingidila Yehova. (Mateo 6:24) Mutumibwa Polo nandi amba “ne kwabila nako i konka kutōta bakishi konka.” (Kolose 3:5) Kadi amba ku bakwabo “leza wabo i difu.” (Fidipai 3:19) I byabine, lupeto ne bintu bya kungitu bibadilwa mu baleza batōtwa dyalelo. Na bubine bantu bavule—kubadila’mo ne boba betela bu bene Leza—‘bakulupile mu bupeta bwakubulwa ne mwa kukulupidila.’ (1 Temote 6:17) Bepeneneka na kwingidila bano baleza, bamobamo bamwena’mo mpalo—bashikete mu mobo mayampe, na bituntwa bya lupoto lukomo, badya bidibwa bya majina. Inoko ke bonsopo basepelelanga na bino bintu. Bamo badi nabyo, ino kuloelelwa nabyo mpika. I bintu bya mafuku abala-anga, bya lupito, kebipwangapo nzala ya kumushipiditu.—Mateo 5:3.
20 Bine, tufwaninwe kwikala na ñeni mijalale mu ano mafuku a mfulo ya ino ngikadilo ya bintu otudi’mo. Tufwaninwe kusāsaketa bisaka byetu mu bintu bya kungitu pa nsasaketo. Ino shi twikale kulēmenena bininge mu kukimba būmi buyampe, mu kulondalonda lupeto nansha bintu bikwabo bya uno muswelo pa kyaba kya kwingidila Leza, tuyukei amba tubaponena mu butōtyi bwa bino bilezaleza, tubaleka kunanga mu dishinda dya Yehova. (1 Temote 6:9, 10) Le kikekala namani shi tubaponena mu misongo, mu bufudile, nansha mu makambakano kampanda? Tulekei kwikala pamo bwa Bayuda bādi mu Edipito bādi balambika Leza makambakano abo na kupenyenga kobādi bapenyenga kumwingidila. Ino batwe tutompei Yehova. Kino i kintu kyābudilwe kulonga Ahaza. Tunyemenei nyeke kudi Yehova Leza wa kwituludika. Tulondei na kikulupiji buludiki bwandi, ne kulombela ponka, etupe bukomo ne tunangu mwa kunekenenya ngikadilo yonso itutana. Koku twilaija madyese a Yehova na kikulupiji.
21 Mu myaka yonso ya muzo wa Isalela, Yehova wādi wesela bonso bādi bananga mu dishinda dyandi. Mulopwe Davida wāimbile’mba: “Abe Yehova, nkunkuje mu boloke bobe mwanda wa bakunshikwa bami.” (Mitōto 5:8) Yehova wāmupele bushindañani buvule pa mizo yobādi balondakene nayo, yāshele kukambakanya Ahaza mwenda mafuku. Mu bulopwe bwa Solomone, Leza wāesele Isalela na kumupa ndoe ne ntundubuko yāikele kwabilwa mwenda mafuku na Bayuda bādi mu Edipito. Yehova wāpele kadi Hezekia mwanā Ahaza bushindañani pa Ashidia muzo mukomo. (Isaya 59:1) Eyo, kuboko kwa Yehova kekwādipo kwīpi pa bantu badikōkeji, boba kebāimenepo “mu dishinda dya babipya-mambo,” ino bātōkelwe mutyima wabo mu bijila bya Leza. (Mitōto 1:1, 2) Ne pano i muswelo umo onka. Ino dyalelo i muswelo’ka otukokeja kwiyuka shi binebine tunañanga mu dishinda dya Yehova? Kino kyo kintu kyotukesambila’po mu kishinte kilonda’ko.
[Questions]
1, 2. (a) Bantu bonsololo basakilwanga bika? (b) I kifwa kya ani kyotufwaninwe kwiula?
3. Yehova wāludikile ba Adama ne Eva muswelo’ka, wēbapa ne byepelo’ka?
4. I muswelo’ka wābudilwe ba Adama ne Eva kikulupiji ne dikōkeji, ne i byamalwa’ka byālupukile’ko?
5. I mpango’ka ya Yehova yaakwete mafuku mavule kumeso, ne i muswelo’ka wakwasha bantu bakikōkeji bakamone kufikidila kwayo?
6. I bantu’ka babidi ba pa kala bādi bananga mu dishinda dya Yehova, ne byāfudile namani?
7. Noa ne kisaka kyandi bālongele bika bilombola amba bādi na dikōkeji ne kikulupiji mudi Yehova?
8. I bika byādi bilombwa ku muzo wa Isalela pa kusaka kunanga’o mu dishinda dya Leza?
9, 10. I ngikadilo’ka yālengeje bene Isalela bāsakilwe kukulupila mudi Yehova ne kutamija dikōkeji kwadi?
11, 12. (a) I bika byāpelele kulonga Ahaza paātyinibwe mbavu na Shidea? (b) I ku nsulo’ka ibidi kwākakimbile Ahaza mutyima-ntenke?
13. I kika kyālombwele Ahaza pa kuvundamukila ku baleza ba Shidea?
14. Mwanda waka Ahaza kādipo ne kyakufwidilwa lusa paāvundamukile ku baleza ba bubela?
15. Bayuda bādi mu Edipito mu mafuku a Yelemia bālubile mu muswelo’ka?
16. I kika kinenenwa amba Bayuda bādi mu Edipito bādi bedimba na milangwe ya bubela?
17. Mwanda waka Yuda wājimije ntanda ne tempelo yandi?
18. I bika bifwaninwe kulonga boba bananga mu dishinda dya Yehova?
19. I baleza’ka batōtwa na bantu bavule dyalelo, ne i bika bilupukanga’ko?
20. I bujalale’ka bwitusakilwa kwikala nabo nyeke?
21. I madyese’ka eselwanga boba banañanga mu dishinda dya Yehova?
[Caption on page 13]
Ahaza wādi unyemena ku baleza ba Shidea pa kyaba kya kunyemena kudi Yehova
[Review on page 14]
Lelo Ukivulukile?
◻ I ngikadilo’ka itusakilwa mwanda wa kunanga mu dishinda dya Yehova?
◻ Mwanda waka milangwe ya Ahaza yādi mifwe?
◻ Milangwe ya Bayuda bādi mu Edipito yādi ya bubela mu namani?
◻ I muswelo’ka otukokeja kukomeja kusumininwa kotusumininwe kunangila mu dishinda dya Yehova?