Binenwa Byobe Kebikikala—“‘En-en’ Kupwa’mba ‘Aa’”?

Langulukila pa uno mwanda mukwabo nao: Inabana ulelele bana kasuku waitwe na ba mulume ne mukaji ba mu kyabo kipwilo mwanda wa kukebanangila kyolwa. Aye pa kulombola bandi bana uno mwanda, abasangala bininge. Abatengela na kipyupyu kino kyolwa. Inoko, difuku dimo kumeso kwa kwenda’ko, bano ba mulume ne mukaji abalombola inabana amba kubalongeka kintu kampanda mu kitulumukila ne amba kebakaya. Mwenda mafuku inabana wayuka kine kyapelele ba mulume ne mukaji. Pa kupwa kwibeta, bano ba mulume ne mukaji baityilwe na balunda nabo bamo bebanene baye ku yabo njibo’nka mu kine kyolwa’kya, ebiya nabo baitabija.

Na bubine, batwe bene Kidishitu tufwaninwe kufikidija byotunena. Ketufwaninwepo kunena nansha dimo’mba, “‘en-en’ kupwa’mba aa.’” (2 Kod. 1:18) Inoko, monka mulombwela’kyo bino bimfwa bibidi, ngikadilo yonso i mishile. Kubwanya kwikala kitatyi kikokeja kumweka’mba tubakomenwa kyakulonga, inoko twaleka kulonda mpangiko yotwadi bakwate. Mutumibwa Polo nandi wāikele mu ino ngikadilo.

POLO WATOPEKELWE’MBA WALAMUKA-ALAMUKANGA

Kitatyi kyādi Polo mu Efisesa mu 55 K.K., wālangile kukabukila ku Dijiba dya Ejé wenda ku Kodinda, kadi aye pa kufika kwine’kwa waabukila ku Masedonya. Aye pa kujokela ku Yelusalema, weteakanya kwenda ku Kipwilo kya mu Kodinda musunsa wa bubidi, na bubine kukakongakanya byabuntu byabo mwanda wa banabetu bādi mu Yelusalema. (1 Kod. 16:3) Kino i kilombolwe patōka mu 2 Kodinda 1:15, 16, motutanga amba: “O mwanda, na kino kikulupiji, dibajinji nadi na mutyima wa kwiya komudi, amba musepelele monka dikwabo, kadi pa kupwa kwimana mwanda wa kwimona nenu poñenda ku Masedonya, ne ponjokela komudi pa kutamba ku Masedonya, penepa kemukanshindikila pa kwenda ku Yudea.”

Bimweka amba Polo mu mukanda wandi mubajinji, wālombwele banabetu ba mu Kodinda ino mpangiko. (1 Kod. 5:9) Inoko, mafuku matyetye pa kupwa kusoneka uno mukanda, wāivwana kupityila ku ba mu njibo ya Koloe amba kwādi lupotopoto mu kipwilo. (1 Ko. 1:10, 11) Polo wākwete butyibi bwa kushinta mpangiko yandi mibajinji, kadi wāsonekele mukanda otuyukile pano bu 1 Kodinda. Mu uno mukanda, Polo wāletele’mo madingi ne bulemununi na buswe. Kadi wālombwele’mo amba wāshintyile kwa kwenda, webalombola’mba ukenda dibajinji ku Masedonya kupwa ke ku Kodinda.​—1 Kod. 16:5, 6.a

Bimweka’mba kitatyi kyātambwile banababo ba mu Kodinda mukanda wandi, bamo mu bādi betela bu “batumibwa bapite kulumbuluka” mu kino kipwilo, bāmutopekele’mba i muntu walamuka-alamuka, muntu kafikidijapo milao yandi. Polo pa kwibingija wāipangwile amba: “I bine, ponadi na uno mutyima, le nadi nkaya mitembwe’ni? Nansha nkwatanga ino mpango na bungitu, mwanda wa amiwa nene amba “En-en, En-en,” kupwa kadi amba ‘Aa, Aa’?” 2 Kod. 1:17; 11:5.

Tubwanya kwiipangula’mba, le mu ino ngikadilo mutumibwa Polo wādi bine ‘wa kumona uno mwanda bu mitembwe’? Mhm! Kishima kyalamwinwe bu “mitembwe” kidi na buluji bwa kwalamuka-alamuka, pamo’nka na muntu kakulupilwapo, kafikidijapo milao yandi. Kipangujo kya Polo kya bututudyatutu kya amba, “kwatanga ino mpango na bungitu?” kyālombwele bene Kidishitu ba mu Kodinda patōkelela’mba, butyibi bwa Polo bwa kushinta mpangiko yandi kēbukwetepo mwanda wa kubulwa kukulupilwa.

Polo wāpelele pelē kuno kutopekwa, wāsoneka amba: “Ino Leza ukokeja kwisumbidilwa’mba byobya byotwimusapwila kebidipo ‘en-en’ abyo’ko ‘aa.’” (2 Kod. 1:18) Na bubine, Polo wādi utele batutu ne bakaka wandi ba mu Kodinda mutyima kitatyi kyaāshintyile mpangiko yandi. Tutanga mu 2 Kodinda 1:23 amba, kyaāshintyile mpangiko yandi imbajinji ya kwenda ku Kodinda i ‘mwanda wa kwibakinga.’ Na bubine, wēbapele mukenga wa kolola bintu kumeso kwa kwimona nabo. Byaādi na kikulupiji, Polo wāivwene kupityila kudi Tetusa aye ku Masedonya’mba, mukanda wandi webalengeje bine bevwane bulanda ne kwisāsa, bine byāmupele nsangaji mikatampe.​—2 Ko. 6:11; 7:5-7.

“AMENA” UNENWANGA KUDI LEZA

Kutopekwa kwa Polo amba walamuka-alamukanga kwādi kubwanya kulombola’mba shi kādipo ukokeja kufikidija milao yandi mu būmi bwa bukile bukya, kādipo ubwanya kukulupilwa nansha dimo mu mwingilo wandi wa busapudi. Inoko, Polo wāvulwije bene Kodinda’mba wēbasapwidile Yesu Kidishitu. Amba, “Mwanā Leza, Kidishitu Yesu, wasapwilwe umbukata mwenu na batwe, ko kunena’mba, amiwa ne Shivanusa ne Temote, aye kaikelepo ‘en-en’ aye’ko ‘aa,’ ino ‘en-en’ waikala ‘en-en’ mu wandi mwanda.” (2 Kod. 1:19) Lelo Yesu Kidishitu kimfwa kya Polo, wādi kakulupilwapo mu kintu kampanda? Mhm! Mu būmi bonso ne mu mwingilo wandi, Yesu wādi nyeke wisamba bubine. (Yoa. 14:6; 18:37) Shi bintu byādi bisapula Yesu byādi bya bine kadi bikulupilwa, ne kadi Polo wāsapwile musapu umo onka, nabya busapudi bwa batumibwa bwādi nabo bukulupilwa.

Na bubine, Yehova i “Leza wa binebine.” (Ñim 31:5) Tumona kino mu bintu bikwabo byāsonekele Polo amba: “Nansha milao ya Leza ikale mingi namani, yonso ibaikala ‘en-en’ padi aye,” ko kunena’mba, kupityila kudi Kidishitu. Bululame bwa Yesu bwa kubulwa dikeme paādi pano pa ntanda, bulombola patōka bintu bilengejanga bantu batatane milao ya Yehova. Polo ubweja’ko amba: “Nanshi kadi kupityila kudi aye, ‘Amena’ unenwanga kudi Leza mwanda wa ntumbo yandi kupityila kudi batwe.” (2 Kod. 1:20) Yesu i muntu ukulupija, nansha “Amena,” ulombola’mba mulao onso ulaya Yehova Leza ukafikidila!

Monka munenenanga nyeke ba Yehova ne Yesu bubinebine, Polo nandi wādi ufikidija nyeke byanena (2 Kod. 1:19) Kādipo walamuka-alamuka, muntu ulaya milao “na bungitu.” (2 Ko. 1:17) Ino, ‘wānangile mu mushipiditu.’ (Ngt. 5:16) Wādi utele bakwabo mutyima mu muswelo waādi wikele nabo. En-en wandi wādi En-en!

LELO EN-EN OBE I EN-EN?

Mu ano etu mafuku, bantu bavule kebeendejangapo mungya misoñanya ya mu Bible, balayanga milao kupwa batyumuna’yo mwanda wa kamwanda katyetye kamweka nansha kukimba’tu kulonga kintu kikwabo. Mu myanda ya busunga “en-en” kekalangapo nyeke “en-en,” nansha shi mwālembele bintu byomweivwene. Bavule kebakimonengapo busongi bu kwiivwana kwa bantu babidi, ke kwiivwana kwa lonso mu būmi kadi. Inoko, kuvula kwa malubu kulombola’mba bavule bamwene busongi bu kipwano kya kajilwilo kibwanya kutyibika lubilo lonka.—2 Tm. 3:1, 2.

Le abe nobe? Lelo En-en obe i En-en? Bine, monka motwesambilanga ku ngalwilo kwa kino kishinte, ubwanya padi kuleka kulēmeka kilaeno, ke pa mwandapo wa kwalamuka-alamuka kobe, ino pa mwanda wa ngikadilo yakulengeja ukomenwe mwa kulongela. Inoko, shi abe mwine Kidishitu ubalaya nansha kwiivwana na muntu, ufwaninwe bine kulonga bukomo bobe bonso mwanda wa kufikidija’byo. (Ñim 15:4; Mat. 5:37) Shi ufikidija’byo, ukayukana bu muntu ukulupilwa, muntu ufikidija byanena, muntu wisamba nyeke bubinebine. (Ef. 4:15, 25; Yak. 5:12) Shi bantu bayukile’mba ubwanya kukulupilwa mu myanda ya bukile bukya, babwanya kwikala na mutyima wa kuteja kitatyi kyowisambila nabo pa bubinebine butala pa Bulopwe bwa Leza. Shi ke pano, tuyukei amba En-en wetu i En-en binebine!