Le Bibwanika Kwikala Bampikwa Budimbidimbi mu ino Ntanda ya Majika-kanwa?

“Tusaka kwikala na mwikadilo muyampe mu bitatyi byonso.”—BAHEBELU 13:18, DD.

TUBWANYA kukomena lupusa lwa bubi bwetu, lwa ntanda yotwikele’mo ne lwa Dyabola; bintu bibwanya kwitutyinya mbavu! Namani? Na kufwena kudi Leza ne kwingidija misoñanya idi mu Bible Kinenwa kyandi, mine itukwasha nyeke twibandaule. Tulangulukilei pa bino bimfwa bibidi.

MUSOÑANYA WA MU BIBLE: “Kemukiulai bibidiji bya ba pano pa ntanda.”—Loma 12:2, DD.

Mwanda mumweke mu būmi: Guilherme i nsunga wabinebine wa mu Brezile. Witabija amba, kwikala wampikwa budimbidimbi kekupēlangapo. Unena amba, “nsunga ubwanya kushilula bukidi bonka kulonga bilongwa bya budimbidimbi, padi mwanda wa kukimba kufikila pa bitungo bya sosiete nansha kumona lupandilo mu ino ntanda ya kwitāka. Bantu bavule bamwene kupāna nansha kutambula majika-kanwa bu kilongwa kiyampe. Shi wi nsunga udi na lupeto lutyetye, i bikomo kwikala wampikwa budimbidimbi.”

Nansha nabya, Guilherme wabwenye kukomena mutyima wa kwikala wa budimbidimbi. Unena amba: “Nansha ke mu bifuko mobaputyile meso pa budimbidimbi, bibwanika kwikala wampikwa budimbidimbi. Ufwaninwe kwikala na misoñanya mikomo ya mu mwikadilo. Bible wankweshe mone byabuyabuya bidi mu kubulwa budimbidimbi. Muntu wampikwa budimbidimbi udi na mutyima wa mundamunda utōka, ndoe ya mutyima kadi mwilēmeke. Ubwanya kwikala na lupusa luyampe pa bantu bamujokolokele.”

MUSOÑANYA WA MU BIBLE: “Boba batele mityima’mba, tusakwikala bampeta, nabya abaponena mu kutompibwa, abapi mu dikinga, ne mu bya kilokoloko kya bulembakane, ne kya byakwiletelela, bino bidi namino bitūkija bantu koneka, ne umbufudile. Ke-kuntu kusanswa kwa lupeto kyo kitako kya bubi bonso miswelo ne miswelo.”—1 Temote 6:9, 10.

Mwanda mumweke mu būmi: André i mukulumpe wa sosiete itūlanga bingidilwa bya kulama bantu. Mu bandi bampotyi mubadilwa ne ekipe mikatampe ya futu. Difuku dimo, kupwa kwa makayo makatampe, André waenda ku mabilo a bwendeji kukatūla tumapapye twa lupoto twa mwingilo waaingile. Mwingilo utala myanda ya mukōlo, wadi ukikwete’ko na kubala lupeto lwadi mu kontwala. Kitatyi byokyadi ke kipite, kapita wa kaji wafuta bengidi bukidibukidi, kubadila’mo ne André.

André unena’mba, “ami pa kujokela ku njibo, namona amba kapita wa kaji wamfutyile lupeto lungi. Nadi ndyukile amba kabwanyapo padi kuyuka muntu wapele lupeto lupite bungi. Ino kadi, nadi ndyukile amba mulume nabo wadi unenwe kwalwija’mo lupeto lwa mu dyandi ditumba! Nakwata butyibi bwa kujokela’ko. Nekuja mu kibumbo kya bantu batamba ku futu kukajokeja musubu wa lupeto. Kapita wa kaji watulumuka bininge. Ke kudipo muntu nansha umo wādi ke mumwalwije lupeto.”

André ubweja’ko amba, “kino kilongwa kya kubulwa budimbidimbi kyalengeje kapita wa kaji andēmeke. Myaka mivule pa kupita’po, mu bengidi bonso babajinji, enka ami bunka ye ushele wingila na kisumpi. Mfwijanga’ko pa kwingidija konaingidije misoñanya ya peulu ya mu mwikadilo, kwine kwālengeje mbanenene maya.”

I bikankamika pa kuyuka’mba, tubwanya kukomena mpusa mibi. Inoko, bukomo bwa muntu kebubwanyapo nansha dimo kutalula’ko majika-kanwa lonso. I bikomo—bikomo mpata ku bantu bampikwa kubwaninina kupwa abo bene majika-kanwa. Penepa, kino kishintulula amba majika-kanwa keakapupo? Kishinte kilonda’ko kileta malondololo a mu Bible akankamika.