Kubungakana Kwapabula Kwa Difuku Dimo
1 “Bafundijibwe na Yehova.” Uno ye mutwe wa mwanda wa kubungakana kwapabula kwa difuku dimo kukashilula mu kweji wakitema. (Yoano 6:45) Bine, bufundiji bwa Yehova bwitukwashanga twikale mu maloa. Bwitulundilanga’ko mushipiditu wa kufwija’ko Leza bikatampe pamwanda wa kipyanwa kyetu kya kumushipiditu. Bukomo botulonga mwanda wa bakwetu bevwane myanda miyampe bwitwikadijanga bu bantu bakamweno umbukata mwa bantu-netu. Kuno kubungakana kwapabula kwa difuku dimo kukaleta kitōkeji pa madyese adi na boba bafundijibwe na Yehova.
2 Byabuyabuya bya bufundiji bwa Leza bikashiañanibwa na byaka bya buyuki bupāna ino ntanda. Tukajingulula patōka’mba Yehova witupanga bufundiji bwapeulu, butamba mu Kinenwa kyandi, Bible. Milangwe ikemanina pa myanda isatu ya wetu mutōtelo yotusangelanga’mo kufundijibwa na Leza. Pakwabo kadi, bansongwanzele bakakankamikwa kulondalonda mu būmi bwabo mingilo ya kumushipiditu ne kwiula bimfwa bilumbuluke bya mu Bible, kimfwa Davida ne Temote. Lwitabijo lwetu lukaningishibwa potukevwana bimfwa bya ba Tumoni ba kikōkeji ke balāle myaka. Bonso baikele kwipāna kudi Leza pano-pano, babwenye bisakibwa bakabatyijibwa. Shi basaka kukabatyijibwa, nankyo bafwaninwe kuyukija mutadi-mwimaniji kubungakana kukidi kulampe.
3 Kishinte kikatampe kya ku kuno kubungakana kwapabula kwa difuku dimo kinena’mba: “Bafundijibwe na Yehova Mwanda wa Kulonga Kiswamutyima Kyandi.” Kikalombola buluji botufwaninwe kwendelela na kwifunda batwe bonso, kwikala bemanije mu lwitabijo ne kwendelela nyeke kumeso. Tukalombolwa’ko muswelo wa kwiula Yehova na kufundija bakwabo bubinebine butwala ku būmi bwanyeke. Myanda mimweke yūbaka lwitabijo lwetu ikasekununwa’ko, iketulombola muswelo ukwashibwa bavule na mabuku a Sosiete, ebapa bufundiji bwa Yehova. Bakalombola’ko ne byabuyabuya bitamba ku mpangiko ya bufundiji bwa Yehova kujokoloka ntanda yonso.
4 Tukwatei mpangiko milumbuluke tukatanwe’ko. Tukankamikei boba bonso balombolanga kusepelela nabo bakatanwe’ko. Tusepelelei kala pangala pa bintu bivule bilumbuluke biketufundija Mufundiji wetu Mukatakatamwine.—Is. 30:20.