Lelo Tusapulanga Kinenwa Kya Leza Monka Mokyendele?
1 Yesu Kristu ye mufundiji mukatampe kutabuka bonso bāikeleko pano pantanda. Wādi ufundija mu muswelo utenga bantu ku mityima, usamuna milangwe yabo ne kwibakankamika balonge mingilo milumbuluke. (Mat. 7:28, 29) Bufundiji bwandi bwādi bwimanine nyeke pa Kinenwa kya Leza. (Luka 24:44, 45) Wāpele Yehova Leza ntumbo ya bintu byonso byādi uyukile ne byādi ufundija. (Yoa. 7:16) Yesu wāshidile bandi bana-babwanga kimfwa kilumbuluke na muswelo wandi wa kusapula Kinenwa kya Leza monka mokyendele.—2 Tem. 2:15.
2 Mutumibwa Polo nandi i kimfwa kiyukanike pa mwanda utala kusapula Kinenwa kya Leza monka mokyendele. Kādipo wimanina enka pa kutangila bakwabo Bisonekwa, mhm; wādi ushintulula byādi utanga ne kulanguluka’po, ne kubingija Kinenwa kya Leza’mba Yesu ye Kristu. (Bil. 17:2-4) Mo monka ne Apolosa nandi, mwanā-bwanga wa binenwa bikulupija, wādi ‘mwipāne byabinebine mu Bisonekwa’; kadi wādi wibisapula monka mobyendele, ulombola bubinebine na bukomo.—Bil. 18:24, 28.
3 Twikalei Bafundiji ba Kinenwa kya Leza: Mu ano etu mafuku, basapudi ba Bulopwe batananga bipa bilumbuluke kitatyi kyobafundija bantu bakubulwa budimbidimbi na kulanguluka nabo mu Bible ne pobatela myanda idi’mo. Tutu umo wāingidije kisonekwa kya Ezekyele 18:4 ne mavese makwabo akwatañene nakyo mwanda wa kulanguluka na pashitele ne bandi bana-bashikola basatu, pa kifikilanga babi ne boloke. Kumfulo ba Kipwilo bāshilula kwifunda, umo umbukata mwabo wāfula ku kwitabija bubinebine. Pakwabo napo, mwana-mukaji umo wa kusaka kuyampe wānene kaka umo ashintulwile mulume wandi wādi upatanya kipelela ba Tumoni twa Yehova kusoba masobo a Noele ne kuvuluka mafuku a kubutulwa. Kaka wāmutangila mu dibuku Kutoa Sababu mavese ashintulula uno mwanda, enka penepa muntu’wa wāitabija. Mukaji wandi wāsangele bininge pa kino kilondololwa, kānena’mba: “Pano tukatanwa ku kupwila kwenu.” Ne mulumyandi wāitabija’kyo!
4 Twingidijei Bukwashi Bwitupelwe: Mwingilo Wetu wa Bulopwe ne mpangiko ya kupwila kwa mingilo bitupanga madingi malumbuluke mwanda wa kwitukwasha tusapule Kinenwa kya Leza monka mokyendele. Basapudi bavule balombwele kufwijako kwabo pangala pa butongi bwa bimfwa bya mwa kusapwila bilupulwanga ne muswelo obilombolwanga mwanda wa kamweno ketu, kadi bine i bifwaninwe ne bifike’po. Dibuku Kutoa Sababu kwa Kutumia Maandiko didi na milangwe mivule ilombola muswelo wa kusapula mokyendele bishinte bikatampe 70 ne kupita bikwatañene na Kinenwa kya Leza. Bapya bafwaninwe kumvwanija bufundiji bwa mu Bible bwa pa kitako, bulupwilwe mu kīpi mu muswelo mufwaninwe mu dibuku Buyuki Butwala ku Būmi Bwanyeke. Kifundwa 24 ne 25 kya Kiongozi cha Shule ya Huduma ya Kitheokrasi bitulombola muswelo ufikilanga bafundiji babwino pa kuleta, kutanga ne kwingidija senene bisonekwa bya mu Bible. Tufwaninwe kwingidija biyampe bino bingidilwa byotupelwe.
5 Shi tusapula Kinenwa kya Leza monka mokyendele, tukajingulula’mba bine i kya “būmi ne bukomo, . . . kadi i [kya] kampeja bukidi kakuyūkidila kufwatakanya ne kukanina kwa mutyima” wa boba botusapwila. (Bah. 4:12) Bipa byotukatana mu kwikingidija biketutonona tunene bubinebine na bupyasakane bukatampe bwine!—Bil. 4:31.