Twisambilei Padi Yehova Difuku Ne Difuku
1 Bantu basenswe kwisamba myanda yobadi nayo ku mutyima, mwanda kyakanwa kinenanga’nka byobya biyudile mu mutyima. (Luka 6:45b) Le batwe netu i bika byotudi nabyo ku mutyima? Mulembi wa mitōto wāsonekele amba: “Ludimi lwami lukēsambanga boloke bobe, ne lutendelo lobe dyuba dyonso ne bukata.” (Mit. 35:28) Uno mulembi wa mitōto wādi na mutyima wa kufwija’ko Yehova pakatampe mwanda wādi umona’mba kwisambila padi Leza ne kunena lutendelo lwandi kyaba kyonso dyo dyese dyabinebine. Kadi wādi na buluji buvulevule bwa kusepelela mwanda wādi uyukile Yehova senene. (Mit. 35:9) Lelo tukokeja kwiula namani kifwa kyandi kilumbuluke?
2 Twisambilei Padi Yehova ku Njibo: Yehova ufwaninwe kutembaulwa mu mīsambo yetu ya mu kisaka ya bukile bukya. Bambutwile basenswe Yehova bikatampe bakesambila padi aye na mutyima umo mu mingilo yabo yonso. (Kup. 6:5-7) Pa kino, bana bakajingulula bukidi bonka amba shabo ne inabo badi na būmi bwimanine pa lwitabijo ne kadi amba basenswe bijila bya Leza. Bana bakamona kifundwa kya Bible mu kisaka bu kilomboji kilombola binebine amba bambutwile babo badi na lulamato kudi Leza.—2 Pet. 3:11.
3 Twisambilei Padi Yehova na Banabetu: Mingilo ya Kiteokratike ingilwa mu bula bwa yenga itupanga mikenga mivule ya kudisha ñeni yetu ne mutyima wetu kumushipiditu. Tudi nyeke na bintu biyampe byotubwanya kwisambila’po. (Luka 6:45a) Lelo wi mutane mulangwe kampanda ukusangeje bininge mu kifundwa kyobe kya pa kasuku nansha mu butangi bobe bwa Bible bwa ku yenga ne yenga? Shi i amo, nankyo wisambile’po na batutu ne bakaka, nabya ukebakwasha nabo bekale monka na buswe bukatampe padi Yehova.—Mit. 35:18; Bah. 10:24.
4 Twisambilei Padi Yehova ku Bantu Betujokolokele: Mu mīsambo yotwisamba na bakwetu difuku ne difuku, kwikale ku mingilo, ku masomo, nansha na betu balongo boketudipo nabo nkulupilo imo, bafwaninwe kuyuka’mba kintu kibajinji kyotutele’ko mutyima mu būmi i kupāna bukamoni butala padi Yehova. Tufwaninwe kutumbija Leza mu muneneno wetu, pa kyaba kya kwiula mineneno ya kubotakanya ne ya mitonko ya ino ntanda. Difuku ne difuku, mu myanda yonso, twisambilei pa myanda miyampe yotupelwe kusapula.—Bil. 5:42; Kol. 4:6.
5 Twi batōtyi babine ba Yehova, tunenwe kukwatakanya mikenga yonso yotumona difuku ne difuku ya kwisambila padi Yehova, Leza wetu kadi na mukwabo udingakene nandi.—Mit. 106:47.
[Binenwa bya Kifwatulo pa paje 1]
Tufwaninwe Kwibapempula Kitatyi Ne Kitatyi
1 Lelo waitabije myanda miyampe kutatabala mpika musunsa umbajinji obakusapwidile kudi muntu kampanda? Shi wabadikile kutatabala, nankyo fwija’ko Batumoni ba Yehova badi bāya kukupempula kitatyi ne kitatyi kufika ne powaitabije kifundwa kya Bible. I biyampe ulanguluke pa uno mwanda ponso poingila mu mwaba obakupele.
2 Būmi bwa bantu bwalamukanga. Bafikilwa na bimyanda nansha ngikadilo myeni, bevwana bimbidikita bipita mu kibundi mobashikete nansha mu ntanda yonso bibavutakanya ñeni, bapumbwa lupeto, bafikilwa na misongo ne myanda ya mfwani mu bisaka byabo. Bintu bya uno muswelo bikokeja kwibapa mutyima wa kusaka kuyuka buluji bwikadile’ko ano masusu. O mwanda tufwaninwe kujingulula bintu bibakambakanya mu ñeni, mwa kwibatūkijija mityima na musapu.
3 Uno O Mwingilo wa Kukūkilañana: Langa bantu bendele kukakūkilañana ku kimpengele kyalongeka. Bamo bakokeja kwingidila mu kipindi kisokolwa’mo bantu batyetye kete bapandile, ino kebalejelejepo nansha kuleka’byo mwanda’po bakwabo basokolanga bantu bavule mu bipindi mobadi. Mwingilo wetu wa kukūkilañana kewapwile. Mwaka ne mwaka, tutananga bantu tutwa twa tununu basaka kupanda ku ‘kyamalwa kibūke.’—Kus. 7:9, 14.
4 “Bonso bakwita pa dijina dya Yehova bakapandanga.” (Loma 10:13-15) Bino binenwa bifwaninwe kupa umo ne umo mutyima wa kuputumina nyeke mu busapudi. Shi tutale tamba potwashilwidile kusapula mu mwaba wetu, pano bana babutwilwe kine kitatyi’kya ke batame babwanya kulanguluka byabinebine pa būmi bwabo bwa kumeso ne pa kitungo kikadile’ko būmi. Batwe ketudipo mwa kuyukila’mba yeu ye ukevwana, yewa kakevwanapo. (Mus. 11:6) Bantu bavule badi bapela bubinebine pano kebebwitabijanga. Kyotukimba ke kutyibilapo bantu nsambu, mhm, ino i kwibapa mukenga wa kwivwana ne kwibanyongolola mu ino ntanda minunu. O mwanda tufwaninwe, pamo bwa bana-babwanga babajinji ba Yesu, ‘kwendaenda’ ku bantu, kutompa kulangula kusepelela kwabo kobasepelela musapu wa Bulopwe.—Mat. 10:6, 7.
5 Tuyukei amba kino kyaba kya kusapula kyotukidi nakyo i kilomboji kilombola lusa lwa Yehova. (2 Pet. 3:9) Ponso potupa bakwetu mukenga wa kwivwana musapu kitatyi ne kitatyi, tulombolanga buswe bwa Leza ku bantu, kadi i kumutumbija kotumutumbijanga.