Kifundwa 6
Lelo Bulopwe bwa Leza I Kika?
Lelo Bulopwe bwa Leza budi kwepi? (1)
Mulopwe wabo i ani? (2)
Le kudi bakwabo bakabikala na uno Mulopwe? Shi badi’ko, lelo i banga? (3)
I bika bilombola amba tudi mu mafuku a mfulo? (4)
Bulopwe bwa Leza bukalongelanga bantu bika? (5-7)
1. Kitatyi kyādi Yesu pano pa ntanda, wāfundije balondi bandi kulombela pa mwanda wa Bulopwe bwa Leza. Bulopwe i umbikalo wendejibwa na mulopwe. Bulopwe bwa Leza i umbikalo wa pa bula. I bushimikwe momwa mūlu, bukaludikanga pano pa ntanda. Bukalombola buujila bwa dijina dya Leza, ke kuyukanya modikadile dikola kadi. Bukalengejanga kiswa-mutyima kya Leza kilongwe pano pa ntanda monka mokilongelwa mūlu.—Mateo 6:9, 10.
2. Leza wālaile mulao amba Yesu ukekalanga Mulopwe wa Bulopwe Bwandi. (Luka 1:30-33) Pādi Yesu pano pa ntanda, wēlombwele mwaādi wa kukekadila Mulopwe wa kanye, moloke, kadi mubwaninine. Kitatyi kyaājokēle mūlu, kābikikilwepo bu Mulopwe wa Bulopwe bwa Leza enka ponka’pa, mhm. (Bahebelu 10:12, 13) Mu mwaka wa 1914, mo mwāikele Yehova kupa Yesu lupusa lwaāmulaile. Tamba penepa, Yesu i mubikale momwa mūlu bu Mulopwe mubikikwe na Yehova.—Danyele 7:13, 14.
3. Kadi Yehova i mutonge bantu bamobamo ba kikōkeji pano panshi ba kwenda mūlu. Bakaludikanga na Yesu bu balopwe, bu batyibi, ne bu babitobo pa muzo wa muntu. (Luka 22:28-30; Kusokwelwa 5:9, 10) Yesu wātelele bano balopwe bakabikala pamo nandi mu Bulopwe bwandi bu “kaluombe katyetye.” Kibalwa kyabo i bantu 144 000.—Luka 12:32; Kusokwelwa 14:1-3.
4. Kinondanonda na kubikala kwa Yesu ke Mulopwe, wāfundwile Satana ne bamwikeulu bandi babi momwa mūlu, wēbela pano pa ntanda. O mwanda ngikadilo i myoneke bininge pano pa ntanda tamba mu mwaka wa 1914. (Kusokwelwa 12:9, 12) Mavita, bipupo bya nzala, bipupo bya mba, kujilula kwa bijila kwenda kwilundila’ko—bino byonso bibadilwa mu ‘kiyukeno’ kilombola amba Yesu pano ke mubikale, ne amba ino ngikadilo keidi mu mafuku ayo a mfulo.—Mateo 24:3, 7, 8, 12; Luka 21:10, 11; 2 Temote 3:1-5.
5. Panopano ponka, Yesu ukatyibila bantu mambo, wibasansanya pamo bwa mukumbi usansanya mikōko mu bambuji. “Mikōko” i boba belombola bu babikalwa bandi ba dikōkeji. Bakapebwanga būmi bwa nyeke pano pa ntanda. “Bambuji” i boba bapela Bulopwe bwa Leza. (Mateo 25:31-34, 46) Panopano ponka, Yesu ukonakanya boba bonso badingakene na bambuji. (2 Tesalonika 1:6-9) Shi nobe usaka kukabadilwa mu “mikōko” ya Yesu, nabya ufwaninwe kwivwana musapu wa Bulopwe ne kulongela mwendele byowifunda.—Mateo 24:14.
6. Pano umbuo wa ntanda i mwiabanye mu matanda mavule. Imo ne imo na umbikalo wayo. Pavule ino mizo īlwanga mavita ayo mine na mine. Ino Bulopwe bwa Leza bukapingakena pa ino imbikalo yonso ya bantu. Bukabikalanga bu umbikalo umo kete pano pa ntanda ponsololo. (Danyele 2:44) Penepo kekukikekalapo kadi mavita, bupolapola, nansha butapani. Bantu bonso bakekalanga mu ndoe ne umbumo.—Mika 4:3, 4.
7. Mu Umbikalo wa Myaka Kanunu wa Yesu, bantu ba kikōkeji bakekalanga ke babwaninine, kadi pano pa ntanda ponso pakekalanga ke paladisa. Ku mfulo kwa myaka kanunu, Yesu ukekala ke mupwe kulonga kintu ne kintu monka mwamusoñaninye Leza kulonga. Ebiya ukajokejeja Shandi Bulopwe. (1 Kodinda 15:24) Lelo wabulwa’po kusapwila balunda nobe ne baswe bobe bintu bikalonga Bulopwe bwa Leza?
[Kifwatulo pa paje 13]
Mu umbikalo wa Yesu kemukekalangapo nshikani nansha mfwatakani