Kifundwa 7

Fwena Kudi Leza mu Milombelo

I kika kinenenwa amba kulombela kitatyi ne kitatyi kudi na mvubu? (1)

I ani otufwaninwe kulombela, ne muswelo’ka? (2, 3)

I myanda’ka ifwaninwe kutūlwa mu milombelo? (4)

I kitatyi’ka kyofwaninwe kulombela? (5, 6)

Lelo Leza wivwananga milombelo yonso? (7)

1. Milombelo i kusapwila Leza myanda na mutyima wa kwityepeja. Lombela kudi Leza kitatyi ne kitatyi. Ukeivwana bu udi nandi pabwipi pamo’nka na mulunda nobe wa pa mutyima. Yehova i mukatampe mpata kadi i mukomokomo bininge, inoko wivwananga milombelo yetu! Lelo ulombelanga kudi Leza kitatyi ne kitatyi?​—Mitōto 65:2; 1 Tesalonika 5:17.

2. Milombelo i kipindi kya mu butōtyi bwetu. O mwanda tufwaninwe kulombela enka kudi Leza umo kete, Yehova. Pādi Yesu pano pa ntanda, wādi ulombela nyeke kudi Shandi, ke kudi muntu ungipo, mhm. Netu tufwaninwe kulongela monka. (Mateo 4:10; 6:9) Inoko, milombelo yetu yonso ifwaninwe kulombelwa mu dijina dya Yesu. Kino kilombola amba tulēmekele kifuko kidi’po Yesu, ne amba tudi na lwitabijo mu kitapwa kyandi kya kikūlwa.​—Yoano 14:6; 1 Yoano 2:1, 2.

3. Kitatyi kyotulombela, tufwaninwe kusapwila Leza myanda itamba ku mutyima. Ketufwaninwepo kukwata milombelo yetu pa mutwe nansha kwiitanga mu dibuku dya milombelo. (Mateo 6:7, 8) Tukokeja kulombela mu mushikatyilo nansha mu mwimanino o-onso wa bulēme, mu kitatyi ne mu kifuko kyo​-kyonso. Leza ukokeja kwivwana nansha ke milombelo ya mundamunda yotulombela mu mutyima wetu. (1 Samwele 1:12, 13) I biyampe kwenda mu kifuko mwakubulwa lunwa, kulampe na bantu, kukalombela milombelo yetu ya kasuku.​—Mako 1:35.

4. I bintu’ka bifwaninwe kutūlwa mu milombelo yobe? I kintu kyo-kyonso kitenga ku kipwano kyobe na Leza. (Fidipai 4:6, 7) Lulombelo lwa kifwa kya kulondela’po lulombola amba tufwaninwe kulombela pa mwanda wa dijina dya Yehova ne mpango yandi. Tukokeja ne kulomba betupe bisakibwa byetu bya ku ngitu, betulekele bubi, betupe ne bukwashi bwa kwitupa muswelo wa kukomena byongo. (Mateo 6:9-13) Milombelo yetu keifwaninwepo kwikala ya kwisakila batwe bene. Tufwaninwe kulombela enka pa mwanda wa bintu bikwatañene na kiswa​-mutyima kya Leza kete.​—1 Yoano 5:14.

5. Ukokeja kulombela kitatyi kyonso kikusoloka mutyima obe kufwija’ko Leza nansha kumutendela. (1 Bilongwa 29:10-13) Ufwaninwe kulombela shi udi na makambakano ne shi lwitabijo lobe lubatūlwa pa ditompo. (Mitōto 55:22; 120:1) I biyampe kulombela kumeso kwa kudya bidibwa byobe. (Mateo 14:19) Yehova witusakilanga kulombela ‘kitatyi kyo-​kyonso.’​—Efisesa 6:18.

6. Tufwaninwe kulombela nakampata shi tubalonga bubi bukatampe. Mu bitatyi bya uno muswelo, tufwaninwe kulomba Yehova etufwile’ko lusa ne kwitulekela mambo etu. Shi twisāse bubi bwetu ku meso a Leza ne kulonga bukomo bwetu bonso bwa kuleka kujokela’mo, nandi ‘uketulekela.’​—Mitōto 86:5; Nkindi 28:13.

7. Yehova wivwananga enka milombelo ya bantu boloke kete. Shi usaka Leza evwane milombelo yobe, nankyo ufwaninwe kulonga bukomo bobe bonso ulonde bijila byandi mu būmi bobe. (Nkindi 15:29; 28:9) Ufwaninwe kwityepeja kitatyi kyolombela. (Luka 18:9-14) Ufwaninwe kulongela monka mwendele byobya byolomba. Wivwane ulonge uno muswelo, nankyo ubelombola amba udi na lwitabijo ne amba wi mwivwanije buluji bwa byonena. Ebiya penepa, Yehova nandi kalondolola milombelo yobe.​—Bahebelu 11:6.