Kifundwa 5

Lelo Leza Udi na Mpango’ka pa Ino Ntanda?

Mwanda waka Yehova wāpangile ntanda? (1, 2)

Mwanda waka pano ntanda ke paladisapo? (3)

I kika kikafikila bantu babi? (4)

Mu mafuku āya kumeso, Yesu ukalonga bika pangala pa babela? banunu? ne bafwe? (5, 6)

Shi usaka kukasepelela mu ano madyese mu mafuku āya kumeso, le i kika kyofwaninwe kulonga? (7)

1. Yehova wāpangile ino ntanda mwanda wa bantu bekale’po mu nsangaji nyeke ne nyeke. Wādi usaka ntanda ikalwe nyeke na bantu boloke, badi na nsangaji. (Mitōto 115:16; Isaya 45:18) Ino nshi keikonakanibwapo nansha dimo; ikekalanga’ko nyeke ne nyeke.​—Mitōto 104:5; Musapudi 1:4.

2. Kumeso kwa kupanga muntu, Leza wātongele kipindi kimo kya ntanda, wēkilongolola senene ke paladisa milumbuluke. Wēkinika ne dijina bu budimi bwa Edena. Ye amo mwaātūdile ba Adama ne Eva, ba mwana​-mulume ne mwana​-mukaji babajinji. Leza wādi mwibakwatyile mpango miyampe ya kusaka babutule bana, bayuje ntanda yonso. Bādi ba kukālamuna ntanda yonso bityebitye ke paladisa.​—Ngalwilo 1:28; 2:8, 15.

3. Ba Adama ne Eva bālongele bubi na kujilwila kijila kya Leza ku kusaka. Penepo Yehova nandi wēbapangila panja pa budimi bwa Edena. Paladisa yājimina. (Ngalwilo 3:1-6, 23) Inoko Yehova kedilwepo mpango yandi pa ino ntanda. I mulaye kukeyalamuna ke paladisa, ikekala’mo bantu nyeke ne nyeke. Lelo ukeyalamuna namani?​—Mitōto 37:29.

4. Kumeso kwa ino ntanda ikale ke paladisa, bantu babi bafwaninwe bidi kutalulwa’po. (Mitōto 37:38) Ukebatalula pa Amakedona, divita dya Leza dya kufundula bubi. Kupwa, Satana ukakutwa mu bula bwa myaka 1 000. Kino kishintulula amba i kutupu mubi nansha umo ukashala usubija ino ntanda. Enka bantu ba Leza kete bo bakapanda.​—Kusokwelwa 16:14, 16; 20:1-3.

5. Penepo Yesu Kidishitu ukabikala pano pa ntanda bu Mulopwe mu bula bwa myaka 1 000. (Kusokwelwa 20:6) Ukashilula kufundula bityebitye bubi mu ñeni yetu ne mu imbidi yetu. Tukekala bantu babwaninine pamo’nka na mwādi mwikadile ba Adama ne Eva kumeso kwa abo kulonga bubi. Penepo kekukikekalapo kadi misongo, bununu, ne lufu, mhm. Bantu babela bakabelulwanga, banunu nabo bakekalanga ke bankasampe monka.​—Yoba 33:25; Isaya 33:24; Kusokwelwa 21:3, 4.

6. Mu Umbikalo wa Yesu wa Myaka Kanunu, bantu ba kikōkeji bakengilanga bininge mwanda wa kwalamuna ntanda yonsololo ke paladisa. (Luka 23:43) Kadi bantu midiyo ne midiyo bafwile bakasangwilwanga ku būmi pano pa ntanda. (Bilongwa 24:15) Shi balonge byobya bibasakila Leza kulonga, nankyo bakekalanga na būmi pano pa ntanda nyeke ne nyeke. Shi kebebilongelepo, bakonakanibwanga lonso.​—Yoano 5:28, 29; Kusokwelwa 20:11-15.

7. Penepo, mpango ya Leza imbajinjibajinji pa ino ntanda ikafikidilanga yonso. Lelo usaka nobe kukasepelela mu ano madyese? Shi usaka, nankyo endelela na kwifunda kuyuka Yehova ne kukōkela ku byasaka kotudi. Kutanwa ku kupwila ku Njibo ya Bulopwe ya Batumoni ba Yehova ba mu kyenu kibundi kukakukwasha pa kino.​—Isaya 11:9; Bahebelu 10:24, 25.

[Kifwatulo pa paje 10]

Paladisa yājimine

[Bifwatulo pa paje 11]

Kupwa Amakedona, ntanda ikālamunwanga ke paladisa