Lelo Tufwaninwe Kwipangula Leza?

BAMO banenanga amba i bibi kwipangula Leza. Padi balañanga amba, kwipangula Leza mwanda mwine walekele’ko bintu bimo bilongeka nansha kubulwa kuleka bilongeka, i kubulwa bulēme. Le nobe ye molangilanga?

Shi i amo, ubwanya padi kutulumuka pa kuyuka’mba bantu bavule bayampe bāipangwile Leza. Tala bimfwa bilonda’ko bya bipangujo byobāmwipangwile:

Yoba muntu wa kikōkeji: “Lelo mwanda ka babi bekala bōmi, a? Balamuka ke banunu, binebine benda batama ke bakomo pototo, a?”—Yoba 21:7.

Habakuka mupolofeto wa kikōkeji: “Lelo i mwanda ka obandidila boba balonga bupupakane, ne kutalala nya-a paminininako mupupukane muntu umutabukile aye boloke.”—Habakuka 1:13.

Yesu Kidishitu: “Leza wami! Leza wami! Lelo i bika byo wandekelela?”—Mateo 27:46.

Shi utange mavese adi kūlu ne kunshi kwa bino bipangujo, ukamona amba kekudipo palombwelwe amba Yehovaa Leza wākalabele kitatyi kyobāmwipangwile bino bipangujo byampikwa budimbidimbi. Na bubine, kuleka kwaālekele bamwipangule ke kwa kutulumukapo. Kimfwa, Leza kalobengapo kitatyi kyotumulombanga avuije bisakibwa byetu bya ku ngitu, bine bitwikadijanga na bukomo bwa ngitu. Witupanga na nsangaji byobya byotumulomba. (Mateo 6:11, 33) Pakwabo kadi, witupanga ne mutyima tō bufundiji bubwanya kwitulama biyampe mu ñeni ne mu mwikadilo. (Fidipai 4:6, 7) Na bubine, Yesu wālombwele bandi bana ba bwanga amba: “Mwikale kulomba, nabya mukapebwa’kyo.” (Mateo 7:7) Myanda idi kūlu ne kunshi kwa mulao wa Yesu ilombola amba, wādi wisambila pa kutambula bintu bya ku ngitu ne pa kulondolola ku bipangujo bya mvubu.

Shi wādi na mukenga, le i kipangujo’ka pa bino bilonda’ko kyowādi wa kwipangula Leza?

● Lelo būmi bwami budi na kitungo?

● Le i bika bikamfikila ponkafwa?

● Mwanda waka undekele nsusuka?

Ukatana malondololo aletele Leza mu Bible Kinenenwa kyandi, mwanda ‘Bisonekwa byonsololo i bisonekwe ku bukomo bwa mushipiditu wa Leza.’ (2 Temote 3:16) Langulukila pa bintu byālengeje bamo bepangule bipangujo bidi kūlu’ku ne pa malondololo aleta’po Bible.

[Kunshi kwa dyani]