Bingidilwa bya Kusapula Nabyo—Kulupula Mabuku Mwanda wa Kusapula Ntanda Yonso

1, 2. (a) Mu myaka katwa kabajinji, le i bika byākweshe ku kusalaja myanda miyampe mu Umbikalo onso wa Loma? (b) Le i bukamoni’ka botudi nabo bulombola’mba Yehova udi netu dyalelo? (Tala kapango “Myanda Miyampe mu Ndimi 670 ne Kupita.”)

BINTU byāivwene beni bāile ku Yelusalema byādi bikomo kwitabija. Bene Ngadilea bādi besamba biyampe ndimi myeni, kadi musapu obādi basapula wāsangeje bemvwaniki babo. I mu Pentekosa 33 K.K., mwātambwile bana ba bwanga kyabuntu kya kwisamba ndimi palapala mu kingelengele—kintu kilombola’mba Leza wādi nabo. (Tanga Bilongwa 2:1-8, 12, 15-17.) Myanda miyampe yobāsapwile mu dyodya difuku yāivwenwe na bantu ba mu bibundi palapala, kadi yāsambakene mu Umbikalo onso wa Loma.—Kol. 1:23.

² Dyalelo, bengidi ba Leza kebesambangapo ndimi palapala mu kingelengele. Nansha nankyo, balamunanga musapu wa Bulopwe mu ndimi 670 ne kupita, kutabuka ya mu myaka katwa kabajinji. (Bil. 2:9-11) Bantu ba Leza i balupule mabuku mavule mpata, o mwanda musapu wa Bulopwe i mwimvwanike ku mitamba yonso ya ntanda mu ndimi mivule.a Buno i bukamoni bulombola amba Yehova wingidijanga Yesu Kidishitu Mulopwe mwanda wa kuludika mwingilo wetu wa busapudi. (Mat. 28:19, 20) Potubandaula bingidilwa bimo byotwaingidije mwanda wa kuvuija mwingilo mu myaka 100 ishele kunyuma, jingulula muswelo witufundije Mulopwe bityebitye mwa kutēla bantu mutyima ne kwitukankamika twikale bafundiji bayampe ba Kinenwa kya Leza.—2 Tm. 2:2.

Mulopwe Wakumbanya Bengidi Bandi Bakune Nkunwa ya Bubine

3. Mwanda waka twingidijanga bingidilwa palapala mu mwingilo wetu wa busapudi?

³ Yesu wādingakenye “mwanda wa Bulopwe” na nkunwa, mutyima wa muntu nao na nshi. (Mat. 13:18, 19) Monka mwingidijijanga kidimye bingidilwa palapala mwanda wa kusengela nshi ne kwiiteakanya mwa kukunina’po nkunwa, bantu ba Yehova nabo baingidije bingidilwa palapala byebakweshe bateakanye mityima ya midiyo ya bantu mwa kutambwila musapu wa Bulopwe. Mu bino bingidilwa, bimo byaingidijibwe mu bula bwa kitatyi kityetye kete. Ino bikwabo nabyo, kimfwa mabuku ne mapepala bikingila mwingilo wa kamweno ne pano pene. Bingidilwa byonso bitelelwe mu uno shapita i bishile na manwa mavule a kwisamba na kibumbo kya bantu atelelwe mu shapita upityile’u, mwanda bino bingidilwa i bikwashe basapudi besambe na bantu mpala na mpala.—Bil. 5:42; 17:2, 3.

4, 5. Fono mikwatwe yadi ingidijibwa namani, ino le keyadipo ifikidija kintu’ka?

⁴ Mīsambo mikwate. Mu myaka ya 1930 ne ya 1940, basapudi baingidije mīsambo mikwate imanine pa Bible ivumijibwa mu mafono a ku makasa. Bande ne bande mikwatwe yadi na bula bwa minite itano ne kwika. Kyaba kimo mabande makwate adi na mitwe ya myanda mīpi, kimfwa “Busatu Busantu,” “Kikungilo,” ne “Bulopwe.” Le ano mabande makwate adi engidijibwa namani? Tutu Clayton Woodworth, wabatyijibwe mu 1930 mu États-Unis unena’mba: “Nadi na kasanduku katyetye monadi nsela fono, dishike, kadi na kwa kukwatyila koku ñimene biyampe pa kwimbija senene dishike. Shi nafika ku njibo ya muntu nafungula kasanduku, natūla kuboko payampe, kupwa nafinya pa ñengele ya pa mulango. Shi muntu washitula mulango nadi nena amba, ‘Ngidi na musapu wa mvubu onsaka kukusapwila.’” Le bantu badi balonga’po namani? Tutu Woodworth unena’mba: “Pavule pene, bantu badi betabija. Ino bakwabo nabo badi bashita mulango. Kyaba kimo, badi balanga’mba mpotejanga mafono.”

⁵ Mu 1940, kwadi mīsambo mishileshile 90 ne kupita mikwate ne madishike mudiyo umo ne kupita. Mu kine kitatyi’kya, John E. Barr, wadi wingila bupania mu Beletanye kupwa waikala wa mu Kitango Kyendeji mwenda mafuku wanene amba: “Mu myaka ya tamba 1936 kutūla ku 1945, nadi’tu ponso pondi, ne fono yami. Na bubine, mu oa mafuku shi nkidi fono nadi nemona bu mushiyena. Kuteja diwi dya Tutu Rutherford pa njibo ya muntu kwadi kunkankamika bikomo; byadi’nka na batwe badi nandi mpala na mpala. Ino shako, fono keyadipo ifikidija kipindi kimo kya mu mwingilo, ke bwino bwa kutenga mityima ya bantu kadi.”

6, 7. (a) Lelo tulata twa kusapula nato twadi na kamweno’ka ne na mikalo’ka? (b) Le Yehova ‘i mutūle binenwa mu kyakanwa kyetu namani’?

⁶ Tulata twa kusapula nato. Ku ngalwilo kwa mwaka wa 1933, basapudi bakankamikilwe kwingidija tulata twa kusapula nato mu mwingilo wa ku njibo ne njibo. Kalata ka kusapula nako kadi na kintu kya masantimetele 7 ne kipindi mu bunkimbwa ne masantimetele 12 ne kipindi mu bula. Kadi na musapu mwīpi ulombola mabuku emanine pa Bible abwanya kutambula mwinē njibo. Musapudi wadi unenwe’tu kupa mwinē njibo kalata ne kumunena atange bidi’po. Lilian Kammerud, waingile mwenda mafuku bu mishonele mu Porto Riko ne mu Arjantine unena’mba: “Nasangedile bikomo kalata ka kusapula nako.” Mwanda waka? Ulondolola’mba: “Ke batwepo bonso badi babwanya kusapula biyampe, ino kankweshe ngibidile mwa kushilwila mīsambo na bantu.”

⁷ Tutu David Reusch, wabatyijibwe mu 1918, unena’mba, “Tulata twa kusapula nato twakweshe banabetu, mwanda batyetye’tu bobadi babwanya kunena senene.” Inoko, kino kingidilwa kyadi na mikalo. Tutu Reusch unena’mba: “Kyaba kimo twadi tutana bantu bamo badi balanga’mba ketubwanyapo kwisamba. Mu buluji kampanda, bavule motudi badi bakomenwa kwisamba. Byotudi bengidi ba Yehova, Yehova wadi wituteakanya mwa kwisambila na bantu. Wadi utengele bukidi bonka kutūla binenwa mu kyakanwa kyetu na kwitufundija mwa kwingidijija Bisonekwa ku njibo ya muntu. Kino kyalongekele pashilwile Masomo a Mwingilo wa Kiteokratike mu myaka ya 1940.”—Tanga Yelemia 1:6-9.

8. Lelo ubwanya kuleka namani Yesu akufundije?

⁸ Mabuku. Tamba 1914, bantu ba Yehova i balupule mabuku meshileshile 100 ne kupita esambila pa myanda ya mu Bible. Mabuku amo mu ano i malupulwe’tu mwanda wa kufundija basapudi mwa kwikadila bengidi balumbuluke. Anna Larsen, wa mu Denemarke, wadi musapudi mu kintu kya myaka 70 unena’mba: “Yehova wetukweshe twikale basapudi balumbuluke kupityila ku Masomo a Mwingilo wa Kiteokratike ne ku mabuku mavule a masomo otutambwile. Mvulukile’mba dibuku dibajinji mu ano i Bukwashi bwa Kiteokratike ku Basapudi ba Bulopwe, dya mu Angele dyalupwilwe mu 1945. Kupwa kwalonda dibuku ‘Bateakanibwe ku Mwingilo Onso Muyampe’ dyalupwilwe mu Angele mu 1946. Pano tudi na Mwena Byabuyabuya mu Bufundiji bwa Masomo a Mwingilo wa Kiteokratike, dilupwilwe mu 2001.” Na bubine, Masomo a Mwingilo wa Kiteokratike ne mabuku a masomo byaingidijibwe mpata na Yehova mwanda wa ‘kwitubwanija senene twikale bengidi.’ (2 Ko. 3:5, 6) Le kodi kala mwilembeje ku Masomo a Mwingilo wa Kiteokratike? Le uselanga dibuku Masomo a Mwingilo ku kupwila kwa yenga ne yenga ne kulondeja patanga’mo mutadi wa masomo? Shi ulonge namino, nabya ubalengeja Kidishitu akufundije wikale mufundiji mulumbuluke.—2 Ko. 9:6; 2 Tm. 2:15.

9, 10. Mabuku akwashanga namani mu mwingilo wa kukuna ne kusangila nkunwa ya bubine?

⁹ Kadi Yehova i mwitukwashe kupityila ku bulongolodi bwandi bwitupa mabuku akwasha basapudi bashintulule bufundiji bwa kyalwilo bwa mu Bible. Dibuku Bubinebine butwala ku bumi bwa nyeke ne nyeke dyaingile bininge. Dyalupwilwe bidi mu 1968 kadi dyalupwile bipa bukidibukidi. Mwingilo wa Bulopwe wa Kweji 11, 1968 wanene’mba: “Dibuku Bubinebine dyalombelwe bikomo, o mwanda mu Kweji 9, Sosiete itampa mabuku ya mu Brooklyn yabwejeje’ko kisumpi kya pa bula kingila bufuku.” Kishinte kibweja’ko amba: “Kyaba kimo mu Kweji 8 dibuku Bubinebine dyalombelwe bininge byalengeja batampile’ko mabuku a ntentekelo kupita pa mudiyo umo ne kipindi!” Mu 1982, mabuku midiyo 100 ne kupita alupwilwe mu ndimi 116. Mu myaka 14 tamba mu 1968 kutūla mu 1982, dibuku Bubinebine dyakweshe ku kwilundila’ko kwa basapudi ba Bulopwe mudiyo umo ne kupita.b

¹⁰ Mu 2005, mwalupwilwe kingidilwa kikwabo kikomo mpata kya kwifunda nakyo Bible, dibuku Lelo I Bika Bine Bifundija Bible? Kintu kya mabuku midiyo 200 ke matampwe kala mu ndimi 256! Le i kulupuke bika? Mu myaka isamba-ibidi kete, tamba 2005 kutūla mu 2012, kintu kya bantu 1 200 000 baikele ke basapudi ba myanda miyampe. Mu kino kitatyi kimo kyonka kibalwa kya bantu befunda netu Bible kyelundile’ko kutamba pa 6 000 000, kutūla ku 8 700 000 ne kupita. Na bubine, Yehova weselanga bukomo botulonga bwa kukuna ne kusangila nkunwa ya bubine bwa Bulopwe.—Tanga 1 Kodinda 3:6, 7.

11, 12. Mungya bisonekwa bitelelwe, i bāni balupwidilwe mapepala etu?

¹¹ Mapepala. Dibajinji bidi, Kiteba kya Mulami kyadi kilupwilwa “kaluombe katyetye,” boba ‘betyilwe lwito lwa mūlu.’ (Luka 12:32; Bah. 3:1) Mu difuku 1 Kweji 10, 1919, bulongolodi bwa Yehova bwalupwile dipepala dikwabo mwanda wa kukwasha bemvwaniki bakwabokwabo, ke bantu bonso kadi. Dino dipepala dyasambakene ku Befundi ba Bible ne ku bantu bonso mu bula bwa myaka mivule, mwanda dyanangile bininge ku bavule kupita Kiteba kya Mulami. Dino dipepala dyaityilwe bidi bu L’Âge d’Or. Mu 1937, dyaityilwe ke bu Consolation. Kupwa mu 1946, dyainikwa bu Réveillez-vous!

¹² Mu makumi a myaka, mumwekelo ne bukata bwa Kiteba kya Mulami ne Réveillez-vous ! i bishinte, ino kitungo kyabyo, kekishintyilepo—i kya kusapula Bulopwe bwa Leza ne kukomeja lwitabijo mu Bible. Dyalelo, kulupulwanga Kiteba kya Mulami kya kwifunda ne kya bantu bonso. Kiteba kya Mulami kya kwifunda i kilembelwe “ba mu njibo”—“kaluombe katyetye” ne “mikōko mikwabo.”c (Mat. 24:45; Yoa. 10:16) Kiteba kya Mulami kya bantu bonso i kilembelwe kutabukidila boba kebayukile bubinebine abo’ko balēmekele Bible ne Leza. (Bil. 13:16) Réveillez-vous ! aye ulupwidilwe boba kebayukidijepo Bible ne Leza wa bine, Yehova.—Bil. 17:22, 23.

13. I mwanda’ka omwene utulumukwa utala mapepala etu? (Tala ne kalata “Lapolo ya Mabuku Ntanda Yonso.”)

¹³ Ku ngalwilo kwa 2014, kweji ne kweji kwadi kulupulwa mapepala a Réveillez-vous ! midiyo 44 ne kupita ne a Kiteba kya Mulami kintu kya midiyo 46. Réveillez-vous ! waalamwinwe mu ndimi kubwipi kwa 100, ino Kiteba kya Mulami, mu ndimi 200 ne kupita, o mwanda i mapepala apityile onso pano pa ntanda ku kwalamunwa ne ku kwabanibwa! Kuno kwendelela kumwekelele kekufwaninwepo kwitutulumuja. Mu ano mapepala mudi musapu wālaile Yesu’mba wadi wa kusapulwa pa ntanda yonso ikelwe na bantu.—Mat. 24:14.

14. I mwingilo’ka otwaingile na kininga, ne mwanda waka?

¹⁴ Bible. Mu 1896, Tutu Russell ne bapwani nandi bashintyile dijina dya sosiete yobadi bengidija pa kulupula mabuku na kubweja’mo kishima Bible; yainikwa bu Watch Tower Bible and Tract Society. Kuno kushinta kwadi kwimvwanike, mwanda Bible kyo kyadi nyeke kingidilwa kinekine kya kusambakanya nakyo myanda miyampe ya Bulopwe. (Luka 24:27) Monka mwendele dijina dya ino sosiete miyukwe mungya bijila, bengidi ba Leza balupwile Mabible matampe ne makwate mu mawi. Kimfwa, mu 1926, ku kitampilo kyetu, twatampile Emphatic Diaglott bwalamuni bwa Bisonekwa bya Kingidiki bya bwine Kidishitu bwalupwilwe na Benjamin Wilson. Ku ngalwilo kwa 1942, twatampile ne kwabanya kintu kya Mabible 700 000 a bushintuludi butuntulu bwa King James Version. Kupwa’tu kwa myaka ibidi, twashilwile kutampa bushintuludi bwa American Standard Version, bwine bwadi bwingidija dijina dya Yehova misunsa 6823. Tamba mu 1950, twaabenye Mabible 250 000 ne kupita.

15, 16. (a) Le i bika bikusangaja mpata mu Bushintuludi bwa Ntanda Mipya? (Tela ne bidi mu kapango “Kuvudijibwa kwa Bushintuludi bwa Bible.”) (b) Le ubwanya namani kuleka Yehova atenge mutyima obe?

¹⁵ Mwaka wa 1950, o walupwilwe’mo Bisonekwa bya Kingidiki bya Bwine Kidishitu—Bushintuludi bwa Ntanda Mipya mu Angele. Bible mutuntulu wa Bisonekwa Bijila—Bushintuludi bwa Ntanda Mipya walupwilwe bu dibuku dimo mu 1961. Buno bushintuludi i butumbije Yehova na kujokeja dijina dyandi ponso podyadi ditanwa mu bilembwa bibajinjibajinji bya Kihebelu. Dijina dya Leza ditanwa misunsa 237 mu Bisonekwa bya Kingidiki bya Bwine Kidishitu. Pa kusaka amba Bible Bushintuludi bwa Ntanda Mipya bwikale bwa binebine kadi bupēla kutanga, buno bushintuludi bwajadikilwe misunsa mivule, ne bujadiki bwa panopano i bwa mu 2013. Enka mu 2013 kete, kwalupwilwe Mabible midiyo 201 ne kupita a Bushintuludi bwa Ntanda Mipya mutuntulu nansha kipindi mu ndimi 121.

¹⁶ Le bantu bamo batengelwe namani pobatangile Bushintuludi bwa Ntanda Mipya mu ludimi lwabo? Muntu umo wa mu Nepal wanene’mba: “Bushintuludi bwa kala bwa mu ludimi lwa Nepal bwadi bukomo kwimvwana mwanda bwadi na muneneno wa kala. Ino pano ke tubwanya kwimvwana Bible senene, mwanda wingidijanga muneneno wa dyalelo.” Mwana-mukaji umo wa mu Repiblike Santrafrikene, pashilwile kutanga bushintuludi bwa mu ludimi lwa Sango washilula kwela ñanji ne kunena’mba: “Luno lo ludimi lwa wami mutyima.” Pamo bwa uno mwana-mukaji, batwe bonso pano tubwanya kuleka Yehova atenge mutyima wetu na kutanga Kinenwa kyandi difuku ne difuku.—Ñim. 1:2; Mat. 22:36, 37.

Kufwija’ko pa Bino Bingidilwa ne Bufundiji

17. Le ubwanya kulombola namani’mba usangedile bingidilwa ne bufundiji botambula, ne i bipa’ka bikalupuka’ko shi ulonge namino?

¹⁷ Le usangedile bino bingidilwa ne bufundiji bwitufundije Mulopwe Yesu Kidishitu mu bula bwa myaka? Witūdilanga’ko kitatyi kya kutanga mabuku alupulwa na bulongolodi bwa Leza ne kwiengidija mwanda wa kukwasha bakwabo? Shi ulonge namino, nabya ubeifwana na Kaka Opal Betler, wabatyijibwe mu mafuku 4 Kweji 10, 1914. Wanene’mba: “Mu bula bwa myaka, ami ne mulumyami [Edward] twaingidije fono ne tulata twa kusapula nato. Kadi twasapwile ku njibo ne njibo na mabuku, maboloshile ne mapepala. Twadi twenda pamo mu busapudi bwa kyungwija ne kupāna musapu udi mu mabuku. Kupwa twafundijibwe mwa kulongela pa kujokela bantu [kwitwa dyalelo bu kujokela’mo kupya] ne kwendeja bifundwa bya Bible bya ku mobo bya bantu basangela. Bine bwadi būmi buyule mingilo abo’ko bwa nsangaji.” Yesu wālaile’mba babikalwa bakavudilwa bya kulonga mu kukuna, kwangula ne kusangela pamo. Pamo bwa Opal, midiyo ya bantu basangelanga kufikidila kwa uno mulao.—Tanga Yoano 4:35, 36.

18. Le i dyese’ka dyotudi nadyo?

¹⁸ Boba kebaikele bengidi ba Mulopwe padi babwanya kulanga’mba bantu ba Leza i bantu “bampikwa kufunda kadi ba bituputupu.” (Bil. 4:13) Ino langa’po bidi! Mulopwe waingidije bantu bandi ba bituputupu bekale ke njibo mikomokomo ya basapudi, ilupula mabuku malamunwe mu ndimi ne kwabanya’o ntanda yonso kupita byonso mu mānga! Kintu kya mvubu mpata, i mwitufundije ne kwitukankamika twingidije bino bingidilwa mwa kusambakenya myanda miyampe ku bantu ba mizo yonso. Bine, tudi na dyese dine dyadyo dya kwingila pamo na Kidishitu mu kukuna nkunwa ya bubinebine ne kwangula bana ba bwanga!