Myanda ya Kunyemena’ko ya Kabuku ka ku Kupwila Būmi ne Mwingilo
4-10 KWEJI 11
BYABULĒME BYA MU KINENWA KYA LEZA | 1 YOANO 1-5
“Kemwakisanswai Ino Ntanda Nansha Bintu Bidi mu Ino Ntanda”
Londa Kimfwa Kyāshile Yesu
13 Bamo bakokeja kunena amba ke byonsopo bya ino ntanda bibipile. Eyo, inoko ino ntanda ne bitobala byayo bikokeja kwitudya kavudi twaleka’byo kwingidila Yehova. Kadi i kutupu kintu kileta ino ntanda kikokeja kwitufwenya kudi Leza. Nanshi, shi tutamije mutyima wa kuswa bintu bya ntanda, nansha ke bintu bimweka amba ke bibipo, nabya tubetūla mu kyaka. (1 Temote 6:9, 10) Ne kunena na bubine, bivule bidi mu ino ntanda i bibi, bikokeja kwitōna. Shi tutala sinema ne televijo ilombolwa’ko bya bikandangobo, kusanswa lupeto, ne busekese, tukafula netu ku kwitabija’byo—ne mwenda mafuku twaponena mu bino byongo. Kadi shi twikuje mu bantu bafwila’nka kulumbulula bwabo būmi ne bakimbakimba bya bupeta, netu ketukabulwepo kutangidija bino bintu kumeso.—Mateo 6:24; 1 Kodinda 15:33.
Lelo Ufwaninwe Kwikala Muntu Wa Muswelo’ka?
18 Kintu kikwabo kitukwasha tukomene “byapanopantanda” i kulama mu ñeni binenwa bya Yoano bya ku bukomo bwa mushipiditu bya amba: “Panopantanda papitanga, ne kilokoloko kyapo kīne kumo; nanshi yewa ulonga kiswa-mutyima wa Leza aye wikele nyeke.” (1 Yoa. 2:17) Ngikadilo ya bintu ya Satana imwekanga bu i ya nyeke. Inoko, isa kufula difuku dimo. Kekudipo kintu nansha kimo kileta ntanda ya Satana kikekala’ko nyeke. Kuvuluka uno mwanda kuketukwasha tuleke kongolwa na makinga a Dyabola.
Kukola Byabupeta bya ku Mushipiditu
Bivulujo Bya Yehova I Bikulupilwa
14 Bisonekwa bya Kingidiki bya bwine Kidishitu i biyule bivulujo bitupelwe mwanda wa kwilombola buswe umo ne mukwabo. Yesu wānene amba, kijila kikatampe kya bubidi i kusanswa “mukwenu na abe mwine.” (Mat. 22:39) Mu muswelo umo onka, Yakoba mwanabo na Yesu wa munda mwa inandi wātelele buswe bu “kijila kya bulopwe.” (Yak. 2:8) Kadi mutumibwa Yoano wāsonekele amba: “Bānwe baswedibwe, kekijila kipyapo kyo nemusonekela, mhm, nanshi i kyonka kijila kya kala kyo mwadi nakyo ne kungalwilo.” (1 Yoa. 2:7, 8) Le Yoano paātelele “kijila kya kala” wādi wisambila pa bika? Wādi wisambila pa kijila kya buswe. Kyādi “kya kala” mu buluji bwa amba Yesu wēkiletele makumi a myaka kunyuma, tamba “kungalwilo.” Ino kyādi kadi “kipya” mu buluji bwa amba, kyādi kilomba buswe bwa kwipāna, bwine bwādi busakilwa bana ba bwanga kitatyi kyobādi batanwa mu ngikadilo myeni. Byotudi bana ba bwanga ba Kidishitu, le ketusangelangapo bidyumu bya kwitukwasha twilame ku kutamija mushipiditu wa kwisakila wandabile mu ino ntanda, mwine ubwanya kutyepeja buswe botuswele bakwetu?
it-2-F p. 491 mus. 1
Lulekelo
I byendele’mo kulomba Leza alekele bakwetu, nansha ke kipwilo kyonso. Ye byālongele ne Mosesa pa muzo wa Isalela, wēsāshile pa bubi bwabo ne kulomba Yehova ebalekele, nandi wamwivwana. (Umb 14:19, 20) Kadi Solomone pa kufikidija tempelo, wālombele Yehova afwile bantu bandi lusa kitatyi kyobalonga bubi, ne kulela mwiendelejo wabo mubi. (1Ba 8:30, 33-40, 46-52) Ezela wēsāshile patōkelela pa bubi bwa Bayuda bājokele. Milombelo yandi itamba ku mutyima kadi ya kuzenza yākweshe bantu balonge’po kintu pa kulekelwa na Yehova. (Eza 9:13–10:4, 10-19, 44) Yakoba wākankamikile muntu ubela ku mushipiditu ete bakulumpe ba kipwilo bamulombelele, ne kadi “shi i mulonge bubi, ukalekelwa.” (Yak 5:14-16) Inoko, kudi ne “bubi buleta lufu,” i bubi bwa kutuka mushipiditu ujila, buno bubi bwa ku kusaka kebukalekelwapo muntu. Mwine Kidishitu kafwaninwepo kulombelela boba balonga buno bubi.—1Yo 5:16; Mat 12:31; Bah 10:26, 27.
11-17 KWEJI 11
BYABULĒME BYA MU KINENWA KYA LEZA | 2 YOANO 1–YUDE
“Tufwaninwe Kulwa pa Kushala Nyeke mu Bubine”
“Kankamanai Mudi Mfumwetu”
8 Ketwidilwepo budyumuku bwa Satana mwanda Bisonekwa bitusokwela patōka manwa avudile kwingidija. (2 Kodinda 2:11) Dyabola pa kulwa na Yoba muntu moloke, wāingidije bufudile, lufu lwa baswe bandi, lwana mu kisaka, misongo, ne matope ambulwa mfwetemfwete a balunda ba bubela. Yoba wāivwene njia, wālanga’nka ne kulanga amba Leza wāmwela. (Yoba 10:1, 2) Nansha Satana byakakokejapo padi kuleta ano makambakano dyalelo, ino bino bikoleja bisusulanga bene Kidishitu bavule, kadi Satana wingidijanga’byo mwanda wa kwitobolwela kwadi.
9 Byaka bya ku mushipiditu byendanga bivudila’ko mu kino kitatyi kya ku mfulo. Tudi mu ntanda īpēne mu kulondalonda bintu bya ku ngitu pa kyaba kya bitungo bya ku mushipiditu. Bingidilwa bizambalaja misapu bimwekeja buenda amba yo nsulo ya nsangaji ke nsulopo ya misongo isansa mutyima. Bavule i “bakusanswa byamazua pakatampe kudi Leza mpika.” (2 Temote 3:1-5) Byonso bino bikokeja kwitutontola ku mushipiditu shi tuleke “kulwila nakampata kuno kwitabija.”—Yude 3.
Kukola Byabupeta bya ku Mushipiditu
it-1-F p. 879
Masobo a Buswe
Bible kashintulwilepo ano masobo a buswe nansha ke misunsa yoādi asobwa. (Yud 12) Mfumwetu Yesu Kidishitu ne batumibwa bandi kēbasoñenyepo kusoba ano masobo, o mwanda keakumonapo bu kisakibwa nansha bu a nyeke. Bantu bamo banenanga’mba ādi asobwa na bene Kidishitu bampeta, beta’ko banababo bene Kidishitu balanda. Kwādi kwenda bana ba kubulwa bashabo, bakaji ba kishala, bampeta ne balanda badīla bidibwa pamo mu bu bana na bana.
it-2-F p. 805
Dibwe
I kimweke patōka’mba kishima kikwabo kya Kingidiki, spilas, kifunkila pa dibwe nansha pa mabwe mafyame mu mema. Yude i mwiatele na kwielekeja na bantu bamo bēkujije mu kipwilo kya bwine Kidishitu badi na kukanina kubi. Enka na mwādi mwikadile mabwe mafyame bu kikukaja ku byombo, mo monka ne bano bantu nabo badi kyaka kya binebine ku bakwabo ba mu kipwilo. Yude unena’mba: “Bano bantu i mabwe mafyame mu mema pobadya nenu masobo enu a buswe.”—Yud 12.
“Wāsangeje Leza”
Le bupolofeto bwa Enoke i bwepi? I buno bwa amba: “Talai! Yehova waiya na tununu makumi twa bajila bandi, kufikidija butyibi pa bonso, ne kutuluja bonso bampikwa bwine Leza pa bilongwa byabo byonso byampikwa bwine Leza byobālongele mu bumpikwa bwine Leza, ne pa bintu byonso bisansa byādi bimunena babipya-mambo bampikwa bwine Leza.” (Yude 14, 15) Enoke wādi na kikulupiji kikatampe kya amba bino bintu bikafikidila binebine. Kwadi byobya bitelelwe mu bupolofeto byādi’nka na ke bilongeke kala. Bapolofeto bakwabo nabo bānenene na kikulupiji kya uno muswelo. Mwanda udi’po i uno: Mupolofeto i munene kintu kisa kufikidila bya binebine na akyo ke kilongeke kala!—Isaya 46:10.
“Wāsangeje Leza”
Lwitabijo lwa Enoke lulengeja twiipangule shi tumonanga ino ntanda yotudi’mo mwiimwena Leza. Butyibi bwāsapwile Enoke bukidi’ko ne dyalelo; butalanga ne ntanda ya dyalelo enka na mobwādi bwikadile mu mafuku’a. Monka mwānenene kidyumu kya Enoke, Yehova wāletele Dilobe dikatampe pa konakanya ntanda yampikwa bwine Leza ya mu mafuku a Noa. Inoko bonakani’bwa i kimfwa’tu kya bonakani bukatampe bwiya kumeso. (Mateo 24:38, 39; 2 Petelo 2:4-6) Ne dyalelo dine, Leza i muteakanye’ko tununu makumi twa bajila bandi mwanda wa kuleta butyibi boloke pa ntanda yampikwa bwine Leza. O mwanda batwe bonso tufwaninwe kulama kino kidyumu kya Enoke mu ñeni ne kusapwila’kyo bakwabo. Kisaka ne balunda netu babwanya kwitupaluka. Tubwanya kwimona bwa batwe badi bunka. Inoko Yehova kāelelepo Enoke; kadi kakelapo bengidi bandi ba kikōkeji ba dyalelo!
18-24 KWEJI 11
BYABULĒME BYA MU KINENWA KYA LEZA | KUSOKWELWA 1-3
“Ndyukile Bilongwa Byobe”
Le I Mushipiditu wa Muswelo’ka Olombolanga?
8 Pa kunyema mushipiditu wa uno muswelo, tufwaninwe kuvuluka amba Yesu i mutelwe mu Bible bu ukwete “ku kuboko kwa lundyo ñenyenyeko īsamba-ībidi.” “Ñenyenye” yelekeja batadi bashingwe māni kadi ifunkila ne pa batadi bonso ba mu bipwilo. Yesu ubwanya kuludika “ñenyenye” idi mu kuboko kwandi mu muswelo o-onso wamona bu muyampe. (Kus. 1:16, 20) Mu uno muswelo, Yesu byadi Mutwe wa kipwilo kya bwine Kidishitu, ye aye wendejanga kitango kya bakulumpe. Shi muntu umo mu kitango usakilwa bine kudingilwa, Yewa wa “meso andi nao adi pamo’nka bwa lubimbi lwa mudilo” ukasaka uno muntu adingilwe pa kitatyi kitungwe ne mu muswelo Wasaka. (Kus. 1:14) Pano’ko bidi, tulēmekele nyeke mu muswelo mwendele’mo boba batongelwe na mushipiditu sandu, mwanda Polo wāsonekele amba: “Kadi kōkelai boba bemulelele, ne kwibakōkelelela; ke-bantu abo batengele ponka pa mityima yenu, pamo bwa boba bakapitamo mu bukalama bwabo, amba balonge kino’ki ne tusepo, ne kukālala mpika, ke-kintu kino namino bānwe kemukamwenamopo kantu, mhm.”—Bah. 13:17.
Yehova Witulamanga mwa Kupandila
11 Mu kimonwa kisonekelwe mu Kusokwelwa shapita 2 ne 3, Yesu Kidishitu mutumbijibwe ntumbo wāpempwile bipwilo bisamba-bibidi bya mu Azia Minele. Kino kimonwa kilombola amba Kidishitu kāmwenepo enka ngikadilo yonso mu kikonge, ino wāmwene kanda ne kanda. Mu byaba bimo, wātelele’nka ne bantu, kadi mu mwanda ne mwanda, wēbatendele mobifwaninwe ne kwibadingila. Lelo bino bilombola bika? Mu kufikidila kwa kimonwa, bipwilo bisamba-bibidi byelekeja Bene Kidishitu bashingwe māni baikele’ko kupwa kwa mwaka wa 1914, ne madingi āpelwe bipwilo bisamba-bibidi afunkila nakampata pa bipwilo byonso bya bantu ba Leza bidi’ko dyalelo kujokoloka ntanda yonso. Nanshi i kyendele’mo tunene amba Yehova uludikanga na kininga bantu bandi kupityila kudi wandi Mwana. Le i muswelo’ka otukamwena mu buno buludiki?
Tutabwilei Matabula Pamo na Bulongolodi bwa Yehova
20 Kutabwila matabula pamo na bulongolodi bwa Yehova bwendelela nyeke kumeso kulomba ne kwitabija Yesu Kidishitu mungya kyepelo kimupele Leza kya bu “mutwe wa kipwilo.” (Efisesa 5:22, 23) Kimfwa, mu Isaya 55:4, betulombola’mo amba: “Talapo bidi, [ami Yehova] namupele ke kamoni ka kudi bantu, kilongoji ne wakusomanya bantu’ba.” Bine, Yesu uyukile mwa kuludikila. Uyukile mikōko yandi ne bilongwa byayo bine kumo. O mwanda paāpempwile bipwilo bisamba-bididi bya mu Azia Minele, wānene misunsa itano mituntulu amba: ‘Ndyukile bilongwa byobe.’ (Kusokwelwa 2:2, 19; 3:1, 8, 15) Yesu uyukile ne bisakibwa byetu, monka muyukidile’byo Yehova, Shandi. Kumeso kwa kulombola lulombelo lwa kifwa, Yesu wānene amba: “Shenu uyūkile kala byobya byo umbudilwe, ne bānwe kemwamulombele’byo.”—Mateo 6:8-13.
Kukola Byabupeta bya ku Mushipiditu
Bulopwe bwa Leza Bubatalula’ko Balwana Nabo
10 Kutyiba mambo. Balwana bonso ba Bulopwe bwa Leza bakaningilwa kwimwena myanda ikebapungija moyo. Yesu unena’mba: “Bakamona Mwanā muntu wiya mu makumbi na bukomo bukatampe ne ntumbo.” (Mako 13:26) Kino kiyukeno kitabukile bukomo kikalombola’mba Yesu waiya kutyiba mambo. Yesu, mu kipindi kikwabo kya buno bupolofeto butala mafuku a mfulo, ushintulula myanda mivule itala butyibi bwasa kuleta mu kine kitatyi’ki. Tutana ino myanda mu kyelekejo kya mikōko ne bambuji. (Tanga Mateo 25:31-33, 46.) Bantu bakwatakenye na kikōkeji Bulopwe bwa Leza bakatelwa bu “mikōko” kadi ‘bakabandula mitwe yabo,’ pa kuyuka’mba “kunyongololwa [kwabo] kubafwena pabwipi.” (Luka 21:28) Ino, balwana na Bulopwe bakatelwa bu “bambuji” kadi “[bakeyaya] bya bulanda,” pa kuyuka’mba “kutyibwa’ko kwa nyeke” kwibatengēle.—Mat. 24:30; Kus. 1:7.
Myanda Mikatampe ya mu Mukanda wa Kusokwelwa—I
2:7—Lelo “paladisa ya Leza” i bika? Bino binenwa byobyesambīlwe bene Kidishitu bashingwe-māni, ino paladisa ifwaninwe kufunkila pa yoya ya mūlu—mwine mwine mwikele Leza. Bashingwe-māni ba dikōkeji bakapebwa dyese dya “kudyako ku mutyi wa būmi.” Bakapebwa umbidi wa kubulwa kufwa.—1 Kod. 15:53.
25 KWEJI 11–1 KWEJI 12
BYABULĒME BYA MU KINENWA KYA LEZA | KUSOKWELWA 4-6
“Lwendo lwa ba pa Tubalwe Baná”
Ba pa Tubalwe Baná—Le I Bāni?
Lelo utentamine pa kabalwe katōka tō i ani? Myanda ya kumuyukila’po itanwa enka mu uno mukanda wa mu Bible wa Kusokwelwa, mwine utēlele monka yewa utentamine pa kano kabalwe bu “Kinenwa kya Leza.” (Kusokwelwa 19:11-13) Kitenta Kinenwa, kitelelwanga Yesu Kidishitu, mwanda wingilanga bu musedi wa myanda wa Leza (Yoano 1:1, 14) Kadi witwanga bu “Mulopwe wa balopwe ne Mfumwandya bamfumu” kadi utelwanga ne bu “Mukōkele kadi wa Bine.” (Kusokwelwa 19:16) Na bubine, udi na lupusa lwa kwikala bu kalāla mulopwe, kadi kakengidijapo nansha dimo lupusa lwandi mu muswelo mubi. Pano’ko, bipangujo i bino.
wp17.3 p. 4 mus. 5
Ba pa Tubalwe Baná—Le I Bāni?
Le ba pa tubalwe bashilwile kwenda kitatyi’ka? Yuka amba Yesu, utentamine pa kabalwe kabajinji, washilwile kwenda paatambwile kilukwa kya bulopwe. (Kusokwelwa 6:2) Le i kitatyi’ka kyabikikilwe Yesu bu Mulopwe momwa mūlu? Kepaājokēlepo mūlu kinondanonda na lufu lwandi. Bible ulombola amba kitatyi kya kwilaija kyāshilwile tamba kala. (Bahebelu 10:12, 13) Yesu wāshintulwidile balondi bandi mukafudila kitatyi kya kwilaija ne kya kushilula bubikadi bwandi mūlu. Wānenene amba kitatyi kyakashilula kubikala, ngikadilo ya ino ntanda ikabipa kutabuka. Kwadi kwa kwikala mavita, bimpengele bya nzala, ne bipupo bya misongo. (Mateo 24:3, 7; Luka 21:10, 11) Adyo Divita I dya Ntanda dishilula’tu mu 1914, byamwekele patōka amba bantu abatwela mu ino ngikadilo, mu kitatyi kya makambakano a pano pa ntanda kitelwa na Bible bu “mafuku a mfulo.”—2 Temote 3:1-5.
Ba pa Tubalwe Baná—Le I Bāni?
Yewa utentamine pa kano kabalwe welekeja mavita. Yuka amba i mutalule’ko ndoe, ke mu matandapo amoamo, ino i pano pa ntanda ponso. Mwaka wa 1 914, ye mwaka mubajinji mu mānga walupukile’mo divita dya ntanda yonso. Kupwa palondele divita dya bubidi dya ntanda, dine dyaletele musala mukatampe. Bantu bamo bafwatakanya amba kibalwa kya bantu bafwile ku mavita tamba mu 1914 i bantu midiyo 100 ne kupita! Kadi bantu bakwabo bavule basusulwanga bya malwa.
wp17.3 p. 5 mus. 4-5
Ba pa Tubalwe Baná—Le I Bāni?
“Namwene, na’mba ntale! kabalwe kafīta fututu; ne yewa wadi utentamine’po wadi na kipimo kya bulēmi mu dikasa dyandi. Penepo naivwana pamo bwa diwi umbukata mwa bipangwa byūmi biná, amba: ‘Kilo kimo kya ñano ku ndenadi imo, makilo asatu a mebele a buluba nao ku ndenadi imo; kadi kokilonga māni a mpafu ne vinyu mine kibi.’”—Kusokwelwa 6:5, 6.
Yewa utentamine pa kano kabalwe welekeja bimpengele bya nzala. Kino kilombola’mba bidibwa byadi bya kusakana bininge mwanda kilo kimo kya ñano kyadi kya kupotwa na ndenadi imo, mfutwa yādi ipebwa muntu ku difuku mu myaka katwa kabajinji! (Mateo 20:2) Kadi kino kityele kyādi kibwanya kupota bilo bisatu bya mebele a buluba, miseke yādi imweka bu mipitwe’ko na ñano. Le boba bādi na bisaka bikatampe bādi ba kwibidisha namani? Bantu bādyumwinwe kulea bidibwa enka ne byakudya bya pa difuku byādi na mvubu mu kine kitatyi’kya, kimfwa māni a mpafu ne vinyu.
wp17.3 p. 5 mus. 8-10
Ba pa Tubalwe Baná—Le I Bāni?
Yewa utentamine pa kabalwe ka buná welekeja lufu lwa ku bipupo bya misongo. Kupwa’tu kwa 1 914, kipupo kya manzamba kyalupukile mu Eshipanye kyaipaile bantu midiyo ne midiyo. Kadi bimweka amba bantu midiyo 500 bakwetwe na kino kipupo, ne mu bano bantu, muntu 1 pa 3 ye wapandile!
Inoko kipupo kya manzamba kyalupukile mu Eshipanye yadi’tu ñanjilo. Bashayuka balanga amba bantu midiyo tutwa na tutwa i bafwe ku misongo ya mbalanga mu bula bwa myaka katwa ka 20. Bantu bavule bafwanga ku misongo ya sida, kikofolo kya mushinga ne malaria nansha byendelele kiñanga.
Bilupukile ku bino byonso i enka lufu—ekale mavita, bimpengele bya nzala nansha ke bipupo bya misongo bine. Kibundu kekikutangapo kadi kekipanangapo lukulupilo.
Kukola Byabupeta bya ku Mushipiditu
re-F p. 77 mus. 8
Ntumbo ya Lupona lwa Mūlu lwa Yehova
8 Yoano wādi uyukile amba babitobo bādi batongwa kwingila mu kipema. O mwanda watulumukile paāmwene bino byaālembele mwenda mafuku amba: “Lupona lwadi lujokolokwe na mpona 24, kadi pa mpona’ya namona pashikete bakulumpe 24 bavwele bivwalwa bitōka tō, kadi ku mitwe yabo bilukwa bya olo.” (Kusokwelwa 4:4) Pa kyaba kya babitobo, wāmwene bakulumpe 24 bashikete pa mpona, kadi bavwele bilukwa pamo bwa balopwe. Le bano bakulumpe i bāni? I bashingwe māni ba mu kipwilo kya bwine Kidishitu, basangwilwe ne kwikala na kyepelo kya momwa mūlu kyēbalaile Yehova. Le tubekiyuka namani?
re-F p. 80 mus. 19
Ntumbo ya Lupona lwa Mūlu lwa Yehova
19 Le bino bipangwa byelekeja bika? Kimonwa kyāmwenwe na mupolofeto mukwabo, Ezekyele, kitukwasha tutane malondololo. Ezekyele wāmwene Yehova ushikete pa dikalo dya mūlu, dyādi dikunkujibwa na bipangwa byūmi byadi na ngikadila iifwene na ya byobya bitelelwe na Yoano. (Ezekyele 1:5-11, 22-28) Mwenda mafuku Ezekyele wāmwene monka dino dikalo dya lupona dikunkujibwa na bipangwa byūmi. Inoko pano utela bipangwa byūmi bu bakelubi. (Ezekyele 10:9-15) Bipangwa byūmi biná byāmwene Yoano bifwaninwe kwelekeja bakelubi bavule ba Leza—bipangwa bya kyepelo kya peulu mu bulongolodi Bwandi bwa bamwikeulu. Yoano kālangilepo amba i kyeni kumona bakelubi bekele pabwipi na Yehova, mwanda mu kipema kya kala mwādi mwikalanga bakelubi babidi ba olo batūle pa mpūto wa sanduku wa kipwano, bene badi belekeja lupona lwa Yehova. I pa bukata bwa bano bakelubi babidi pādi patambila diwi dya Yehova pa kuleta mbila ku muzo.—Divilu 25:22; Ñimbo ya Mitōto 80:1.
“Talapo, Ntambo wa ku Kisaka kya Yuda”
5 Divule ntambo ufunkilanga pa bukankamane. Lelo kodi mwidye mankuma na ntambo mulume, kibwende ufita ku kanwa? Shi kodi mwitane nandi, padi i ku zoo kobamubikile mu lupango, umutadila mu nsambo. Nansha namino, kwimona nandi kuletanga moyo. Powamwene mpala ya uno nyema mukatampe kadi mukomo, kadi nandi paakukupwidile meso, wamwene amba ntambo kabwanyapo kutyina moyo kintu kyo-kyonso. Bible unena amba “ntambo utabukile bukomo umbukata mwa banyema, ino nanshi kalamukapo, shi kadi ani shi kadi ani.” (Nkindi 30:30) Buno bo bukankamane bwa Kidishitu.
6 Pano twisambilei bidi pa miswelo isatu yālombwele Yesu bukankamane na bwa ntambo: mu kubingija bubinebine, mu kukwatakanya boloke, ne mu kulwa na lwana. Kadi tusa kumona amba batwe bonso—twikale bankanka ba kibutwila nansha mhm—tubwanya kwiula bukankamane bwa Yesu.