Byobya Bikalonga Leza pa Bibi

Bible witulombola patōkelela byobya bikalonga Yehova ne Yesu Kidishitu wandi Mwana pa masusu aletele Satana Dyabola. Bible unena amba: “O mwanda mwine Mwanā Leza [Yesu] wasokwelwe patōka: mwanda wa kutyumuna mingilo ya Dyabola.” (1 Yoano 3:8) Ino ngikadilo ya bintu ya dyalelo imanine pa lwiso, mushikwa ne bilongwa bibi bine kebikekala’kopo. Yesu ulaile pangala pa Satana Dyabola “mulopwe wa ino ntanda” amba, “usa kwelwa panja.” (Yoano 12:31) Kwa kubulwa’mo lupusa lwa Satana, ntanda mipya ya boloke ikashimatyija pototo, kadi ino ntanda ikekala ke kifuko kya ndoe.—2 Petelo 3:13.

Le bikekala namani ku boba bapela na kibengo kushinta mashinda abo ne boba bendelela na kulonga bibi? Langulukila pa uno mulao wa mu mafuku āya kumeso wa amba: “Babuluji bakekalanga mu ntanda’ya, kadi babwaninine bakekadidilanga monka; ino nanshi bapupakane bakatyibibwa ku ntanda’ya, kadi banzazangi bakatukunwamo.” (Nkindi 2:21, 22) Lupusa lwa bantu babi ne kolwaya jimejime. Mu ino ngikadilo ya ndoe, bantu ba kikōkeji bakanyongololwa bityebitye ku kubulwa kubwaninina kobāpyene.—Loma 6:17, 18; 8:21.

Lelo Leza ukafundula’ko bibi mu ino ntanda mipya namani? Ke na kutalula’kopo kya buntu kya bwanapabo bwa kwitongela ne kwikadija bantu bu ba lobo. Inoko, ukafundija bantu ba kikōkeji mashinda andi, na kwibakwasha baleke kwikala na milangwe mibi ne kulonga bilongwa bibi.

Lelo i bika bikalonga Leza pa bimpengele bya mu kitulumukila? Wālaile amba umbikalo wa Bulopwe bwandi usa panopano ponka kuludika ntanda. Mulopwe mutongwe na Leza wa buno Bulopwe i Yesu Kidishitu, mwine udi na bukomo bwa kundapa misongo. (Mateo 14:14) Kadi Yesu udi na bukomo bwa kunekenya bintu bya kipangila bya bukomo. (Mako 4:35-41) Nanshi masusu alengejibwa na ‘kitatyi ne bintu byampikwa kulaya,’ keakekala’kopo. (Musapudi 9:11) Mu buludiki bwa Kidishitu, kimpengele kekikaponenapo bantu.—Nkindi 1:33.

Lelo tunena bika pa midiyo ne midiyo ya bantu bampikwa mambo bafwile lufu lusansa? Kitatyi’tu kityetye kumeso kwa Yesu kusangula mulunda nandi Lazalasa, wānene amba: “Ami ne lusangukilo ne būmi.” (Yoano 11:25) Bine, Yesu udi na bukomo bwa kusangula nansha kujokeja boba bafwile ku būmi!

Shi mulangwe wa kwikala mu ntanda kemukafikilwapo bantu na bintu bibi ubakusangaja, ubulwe’po kwitungila kitungo kya kuyuka myanda mivule itala padi Leza wa bine ne pa mpango yandi na kwifunda Bible? Batumoni ba Yehova ba mu kyenu kibundi bakasangela kukukwasha uyuke Leza wa bine. Tubakwite na nsangaji wibakimbe mu kyenu kibundi nansha kulembela boba balupwile kino Kiteba kya Mulami.