KIFUNDWA 02

Lukulupilo Lwitupēle Bible

Kitampe

Bantu ba ntanda yonso batanwanga na makambakano ebaletela bulanda, kuzumbija mutyima, enka ne misanshi. Lelo kodi mutanwe na mwanda kampanda ukulengeleja wiivwane namino? Padi ususukanga na misongo nansha na bulanda bwa kufwilwa muntu osenswe. Ubwanya’nka ne kwiipangula’mba, ‘Lelo būmi bukalumbuluka?’ Bible ulondolola kino kipangujo mu muswelo ukulupija.

1. Le i lukulupilo’ka lwitupēle Bible?

Bible kemaninepo’nka pa kushintulula mwanda wa bika ntanda i miyule makambakano, ino kadi witusapwila myanda miyampe ya’mba ano makambakano i a lupito ne amba panopano ponka asa kutalulwa’ko. Milao ya mu Bible ibwanya “kwimupa būmi bwa kumeso ne lukulupilo.” (Tangai Yelemia 29:11, 12.) Ino milao ibwanya kwitukwasha tulwe na makambakano a dyalelo, tulame mumweno muyampe, kadi tutane nsangaji ya nyeke.

2. Lelo būmi bwa kumeso bulaile Bible i bwa muswelo’ka?

Bible ulombola’mba kitatyi kya kumeso “lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka.” (Tangai Kusokwelwa 21:4.) Makambakano alengeja būmi bwikale bukomo dyalelo—mwikadile bulanda, bukondame, misongo, ne lufu—keakekala’kopo monka. Bible ulaya’mba bantu bakekala na būmi bwa nsangaji ya nyeke mu Paladisa pano pa ntanda.

3. Le ukokeja namani kwikala na kikulupiji kikomo mu byobya bilaile Bible?

Bantu bavule batengēle bintu bilumbuluke bya kulongeka, inoko kebayukilepo shi byobakulupile’bya bikafikidila binebine. Bino i bishile kulampe na byobya bilaile Bible. Tubwanya kwikala na kikulupiji kikomo mu binena Bible na ‘kubandaula senene Bisonekwa.’ (Bilongwa 17:11) Bible owifunda ukakukwasha ubwanye kutonga abe mwine kukulupila byobya byanena pa mafuku a kumeso nansha kupela.

LANGULUKA BININGE

Bandaula ngikadilo imoimo ya mafuku a kumeso ilaile Bible. Kadi tala lukulupilo luleta Bible molulumbulwidile būmi bwa bantu dyalelo.

Bifwatulo: Bifwatulo bityange bilombola kwishila kwa ngikadilo idi’mo bantu dyalelo na yoya ilaile Bible mu mafuku a kumeso. Bibapitulukwa munshi.

4. Bible witupa lukulupilo lwa būmi bwa nyeke kadi bwampikwa masusu

Tala mulongo wa milao yotutana mu Bible. Le i mulao’ka owasangela bininge? Ne mwanda waka?

Tangai bisonekwa bitelelwe ku ino milao, ne kwisambila pa bino bipangujo:

Lelo bino bisonekwa bibakusenge? Lelo bikokeja kusenga muntu kampanda wa mu kisaka kyenu nansha mulunda nobe?

Fwatakanya’po ushikete mu ntanda

MWAMPIKWA MUNTU UTANWA NA INO MYANDA . . .	MWIMWENA MUNTU ENSE BINO BINTU . . .
udila, ususulwa na bununu, ne lufu.—Isaya 25:8.	kusangulwa kwa baswedibwe betu bajokela ku būmi pano pa ntanda.—Yoano 5:28, 29.
ubela ne mulemane.—Isaya 33:24; 35:5, 6.	mu ngitu mukomo senene nkē.—Yoba 33:25.
ususulwa na bukondame.—Isaya 32:16, 17.	byakudya bivule, njibo miyampe, ne kaji kasangaja.—Ñimbo ya Mitōto 72:16; Isaya 65:21, 22.
ususuka pa mwanda wa mavita.—Ñimbo ya Mitōto 46:9.	ndoe bā.—Ñimbo ya Mitōto 37:11.
uvutakanibwa ñeni pa kuvuluka bintu bibi bimutene.—Isaya 65:17.	būmi bwa nyeke mu ngikadilo miyampe.—Ñimbo ya Mitōto 37:29.

Mwana wadi ubela pano wakoma ne kupamba inandi bīpa.

Muntu umo wadi mununu pano ke nsongwa yeu katonona ne ngolofwano muyule munamuna.

5. Milao ya mu Bible ibwanya kushinta būmi bobe

Bantu bavule i batyumukwe mutyima, enka ne kuloba pa mwanda wa makambakano adi koku ne koku. Bamo balwanga mwanda wa kulongolola bintu. Tala milao ya mu Bible ya būmi bulumbuluke bwa kumeso moikokeja kulumbulwila būmi bwa bantu tamba’nka pano. Talai VIDEO, ne kwisambila pa bino bipangujo.

VIDEO: Nadi Nsaka Kupwa Bukondame (4:07)

Kifwatulo kya mu video inena’mba ‘Nadi Nsaka Kupwa Bukondame.’ 1. Rafika wangula butonge na bantu ba kwabo paadi ukidi mwanuke. 2. Rafika watulumuluka pa kumona bantu ba misaka palapala bekele bapwane paatanwa musunsa wandi umbajinji ku kitango kya Batumoni ba Yehova.

Mu ino video, lelo Rafika wadi usaka kupwa bukondame’ka?
Nansha buno bukondame byobwadi’ko nyeke, lelo Bible wamukweshe namani?

Lukulupilo lwitupa Bible lwa mafuku a kumeso lubwanya kwitukwasha tulwe senene na kutyumukwa mutyima ne na makambakano makwabo. Tangai Nkindi 17:22 ne Bene Loma 12:12, ne kwisambila pa bino bipangujo:

Le ulanga musapu wa lukulupilo utanwa mu Bible ubwanya kushinta būmi bobe tamba dyalelo? Mwanda waka?

BANTU BAMO BANENANGA’MBA: “Milao ya būmi bwa kumeso ilaile Bible keibwanyapo kufikidila.”

Molangila, mwanda waka i biyampe wibandawile abe mwine bubinga?

MU KĪPI

Bible witupanga lukulupilo kadi witukwashanga tulwe na makambakano pa kwitulombola milao ya būmi bwa kumeso buyampe.

Pitulukai’mo

Mwanda waka bantu basakilwa kuyuka milao ya būmi bwa kumeso?
Lelo Bible unena’mba būmi bwa kumeso bukekala namani?
Lelo kwikala na luno lukulupilo lwa būmi bwa kumeso kukokeja kukukwasha namani tamba dyalelo?

Lemba difuku dyapwa kifundwa:

Witungile Kitungo

Wiibidije kuyuka milao ya mu Bible idi mu mavese atelelwe mu kino kifundwa.

Kitungo Kikwabo:

Your other goal

KIMBA

Yukila’ko bivule pa mwikadile lukulupilo na bukomo.

“I Kwepi Kotukatana Lukulupilo?” (Langukai!, 22 Kweji 4, 2004)

Tala lukulupilo molubwanya kukwashisha boba badi na misongo ya zenzeka.

“Le Bible Ubwanya Kukukwasha shi Ubela Misongo ya Zenzeka?” (Kishinte kya pa Entelenete)

Polonda ino minjiki ya video, wimone mudi pamo ne kisaka kyenu mu būmi bulaile Bible mu Paladisa.

Langa’po Bidi mu Ntanda Mipya 3:37

Tala būmi bwa muntu umo mobwashintyīle pawefundile byobya bilaile Bible pa būmi bwa kumeso.

“Nkikimonengapo Amba Nenwe Kushinta Ntanda” (Kiteba kya Mulami, 1 Kweji 7, 2013)