Tusenswe Yehova Tata Wetu Bininge

1-2. Le Yehova i mwitukwashe namani tubadilwe mu kisaka kyandi, ne mwanda waka?

YEHOVA i mwitwite twikale mu kisaka kya batōtyi bandi. Bine luno i lwito luyampe’po kashā! Kisaka kyetu i kibundwe na bantu bepāne kudi Leza kadi balombwele lwitabijo mu kitapwa kya kinkūlwa kya wandi Mwana. Bine, tudi mu kisaka kya nsangaji. Tudi na būmi bulumbuluke dyalelo, kadi tusangedile kukekala na būmi bwampikwa mfulo, bwa momwa mūlu nansha mu Paladisa pano pa ntanda.

² Na buswe ne mutyima wa kwisuminwa, Yehova wetukweshe tubadilwe mu kisaka kyandi. (Yoa. 3:16) Twapotelwe “ku lupoto.” (1 Ko. 6:20) Kupityila ku kinkūlwa, Yehova wetukweshe tupwane nandi kipwano kya mpwaninine. Tudi na dyese dya kwita bu Tata, Muntu mukatakata kutabuka bantu bonso mūlu ne pano pa ntanda. Kadi, enka na motwekimwenine mu kishinte kibadikile, Yehova i Tata muyampe.

3. Le i bipangujo’ka byotubwanya kwiipangula? (Tala ne kapango kanena’mba, “Le Yehova Undyukile?”)

³ Tubwanya kwiipangula na mwēipangwidile mulembi umo wa Bible amba: “I bika le byonkalwija Yehova pa biyampe byonso byaunongela?” (Ñim. 116:12) Malondololo i ano amba, ketubwanyapo nansha dimo kwalwija Tata wetu wa mūlu kintu. Inoko, tufwaninwe kumusanswa. Mutumibwa Yoano wālembele amba: “Batwe tusenswe, mwanda aye wetusenswe dibajinji.” (1 Yo. 4:19) Le i muswelo’ka otubwanya kulombola’mba tusenswe Tata wetu wa mūlu?

TUFWENEI NYEKE KUDI YEHOVA

4. Mungya Yakoba 4:8, mwanda waka tufwaninwe kulonga bukomo bwa kufwena kudi Yehova?

⁴ Yehova usakanga tumufwene ne kwisamba nandi. (Tanga Yakoba 4:8.) Witusoñanya ‘tutakamane mu milombelo,’ kadi witwivwananga kitatyi kyonso. (Loma 12:12) Kavudilwepo bya kulonga nansha kukōka pa kwitwivwana. Netu tumutejanga potutanga Bible Kinenwa kyandi, ne mabuku etukwasha twikivwanije. Kadi tumutejanga potulonda na katentekeji kupwila kwa bwine Kidishitu. Kwisamba kyaba ne kyaba byokukwashanga bana bafwene bambutwile babo, kwisamba kyaba ne kyaba na Yehova nako kwitukwashanga netu tumufwene nyeke.

5. Le i muswelo’ka otubwanya kulumbulula milombelo yetu?

⁵ Tulangulukilei bidi pa muswelo otwisambanga na Leza. Yehova usakanga tumupungulwile mityima yetu mu milombelo. (Ñim. 62:8) I biyampe twiipangule kino kipangujo amba: ‘Le milombelo yami i ya kajilwilo pamo bwa musapu mutampe’ni, nansha itambanga ku mutyima pamo bwa mukanda mulembe ku makasa?’ Na bubine abe usenswe Yehova bininge, kadi usakanga kuningija kipwano kyopwene nandi. Pa kuningija’kyo, ufwaninwe kwisamba nandi kitatyi ne kitatyi. Mulombole mowiivwanina. Mulombole bintu bikusangaja ne bintu bikusansa. Kulupila’mba ubwanya kumulomba akukwashe.

6. Le tufwaninwe kulonga bika pa kufwena nyeke kudi Tata wetu wa mūlu?

⁶ Pa kufwena nyeke kudi Tata wetu wa mūlu, tufwaninwe kumufwija’ko nyeke. Twitabije byālembele mulembi wa Mitōto amba: “Bine, i bintu bingi byolongele, A Yehova Leza wami, mingilo yobe ya kutendelwa ne milangwe yobe kotudi. I kutupu nansha umo udingakene nobe; shi nasakile kwiisapula ne kwisamba’yo, yadi ya kumvudila pa kubanga’yo!” (Ñim. 40:5) Ketwikalangapo’tu enka na mutyima wa kufwija’ko; ino tulombolanga kufwija’ko Yehova mu binenwa ne mu bilongwa byetu. Kulonga namino kulombola’mba twi beshile na bantu bavule dyalelo. Tudi mu ntanda mudi bantu bampikwa mutyima wa kufwija’ko pa byonso bibalongela Leza. Na bubine, kubulwa kufwija’ko kwa bantu i kintu kimo kilombola’mba tudi mu “mafuku a mfulo.” (2 Tm. 3:1, 2) Bine, ketufwaninwepo kwikala na ino ngikadila!

7. Le Yehova witusakilanga tulonge bika, ne mwanda waka?

⁷ Bambutwile kebasakilangapo babo bana bepya myanda, ino bebasakilanga bekale bapwane. Mu muswelo umo onka, Yehova usakilanga bandi bana bonso besanswe abo bene na bene. Bine, buswe botwisenswe batwe bene na bene bwituyukanyanga bu bene Kidishitu ba bine. (Yoa. 13:35) Twitabije byālembele mulembi wa Mitōto amba: “Mobikadile biyampe kadi bisangaja bana na bana kwikala pamo mu bumo!” (Ñim. 133:1) Shi tusenswe batutu ne bakaka, tulombolanga Yehova amba tumusenswe. (1 Yo. 4:20) Bine, bisangaja’po kashā kwikala mu kisaka kya batutu ne bakaka badi na “kanye [abo] bene na bene, ba mutyima wa lusalusa”!​—Ef. 4:32.

LOMBOLA BUSWE NA KWIKALA MUKŌKELE

8. Mungya 1 Yoano 5:3, le i bubinga’ka bukatampe bwitulengeja tukōkele Yehova?

⁸ Yehova usakanga bana bakōkele bambutwile babo, kadi usakanga tumukōkele. (Ef. 6:1) Tufwaninwe kumukōkela mwanda aye ye Umpangi wetu, mwine Ukwatakenye būmi bwetu, kadi wa tunangu kutabuka bambutwile bonso. Inoko, bubinga bukatampe bwitulengeja tukōkele Yehova i mwanda tumusenswe. (Tanga 1 Yoano 5:3.) Nansha byokudi bubinga buvule botufwaninwe kukōkela Yehova, aye ketuningilangapo tumukōkele. Yehova i mwitupe kyabuntu kya bwanapabo bwa kwitongela, o mwanda usangalanga kitatyi kyotutonga kumukōkela pa mwanda wa buswe botumusenswe.

9-10. Mwanda waka i biyampe kuyuka misoñanya ya Leza ne kwiikōkela?

⁹ Bambutwile basakanga babo bana bekale biyampe. O mwanda batūlanga’ko misoñanya ya mwa kwikadila mwanda wa kamweno ka babo bana. Shi bana abakōkela ino misoñanya, balombolanga’mba bakulupile bambutwile babo kadi bebalēmekele. Nanshi i biyampe tuyuke misoñanya ya Tata wetu wa mūlu ne kwiikōkela. Shi tulonge namino, tukalombola Yehova amba tumusenswe, tumulēmekele, ne kadi tukamwena’mo batwe bene. (Isa. 48:17, 18) Inoko, boba bapela Yehova ne misoñanya yandi besanshijanga abo bene.​—Ngt. 6:7, 8.

¹⁰ Shi twiendeja mu muswelo usangaja Yehova, twikiñanga ku bintu bya kwitona ku ngitu, mu ñeni ne ku mushipiditu. Yehova uyukile bintu biyampe byotusakilwa. Aurora, ushikete mu États-Unis unena’mba, “ndyukile amba kukōkela Yehova kulumbululanga nyeke būmi bwa muntu.” Batwe bonso twitabije bino binenwa. Le nobe kodi mumwene mu kukōkela buludiki bwa Yehova bwa buswe?

11. Le milombelo itukwashanga namani?

¹¹ Milombelo itukwashanga twikale bakōkele, nansha kukōkela byokwikalanga kukomo. Kyaba kimo, tubwanya kukomenwa kukōkela Yehova, inoko tufwaninwe kulonga nyeke bukomo bwa kulwa na mutyima wetu wa kulonga bubi. Mulembi wa Mitōto wāzenzele Leza amba: “Sañamuna munda mwami mutyima wa kukukōkela.” (Ñim. 51:12) Denise, pania wa lonso unena’mba, “Shi namone amba i bikomo kukōkela musoñanya umo wa Yehova, mulombanga ampe bukomo bwa kulonga byoloke.” Tubwanya kukulupila’mba Yehova ukalondolola nyeke milombelo ya uno muswelo.​—Luka 11:9-13.

KWASHA BAKWENU BASANSWE TATA WETU

12. Mungya Bene Efisesa 5:1, le i bika byotufwaninwe kulonga?

¹² Tanga Bene Efisesa 5:1. Byotudi “bana baswedibwe” ba Yehova, tuloñanga bukomo bwa kumwiula. Twiulanga ngikadila yandi na kwikala na buswe, kanye, ne kulekela bakwetu. Boba kebayukilepo Leza pobamona ngikadila yetu miyampe, babwanya kwifunda myanda mivule imutala. (1 Pe. 2:12) Bambutwile bene Kidishitu badi na bubinga bwendele’mo bwa kwiula Yehova mu muswelo obalongela babo bana bintu. Shi bamwiule, padi babo bana bakasaka kupwana abo bene na Tata wetu wa buswe.

13. Le tufwaninwe kuta mutyima ku bika?

¹³ Nkasampe umo witembanga shandi kadi usangelanga kwisamba myanda ya shandi. Batwe netu twitembanga Yehova Tata wetu wa mūlu, kadi tusakanga bakwetu bamuyuke. Twiivwananga mu mutyima na mwēivwanine Mulopwe Davida, wālembele amba: “Ami nketumbijanga mudi Yehova.” (Ñim. 34:2) Ino le bikekala namani shi tudi na bumvu? Le tubwanya kwikala bakankamane namani? Tukekala bakankamane shi tutele mutyima ku kusangaja Yehova, ne ku muswelo ukamwena bakwetu mu kwifunda myanda yandi. Yehova uketupa bukankamane botusakilwa. Aye wākweshe banabetu ba mu myaka katwa kabajinji bekale bakankamane, kadi usa kwitukwasha ne batwe.​—1 Ts. 2:2.

14. Mwanda waka i biyampe kwingila mwingilo wa kulonga bana ba bwanga?

¹⁴ Yehova kadipo na mboloji, kadi usangalanga paetumona tulombola bakwetu buswe nansha shi i batambe kwepi. (Bil. 10:34, 35) Muswelo muyampe otubwanya kulombola’mba tusenswe bakwetu i kwibasapwila myanda miyampe. (Mat. 28:19, 20) Le i bika bikalupuka’ko? Boba betuteja babwanya kulumbulula būmi bwabo dyalelo, ne kwikala na lukulupilo lwa kukamona būmi bwa nyeke mu mafuku a kumeso.​—1 Tm. 4:16.

TUSANSWEI TATA WETU AMBA TWIKALE NA NSANGAJI

15-16. Le i bubinga’ka botwikadile na nsangaji?

¹⁵ Yehova byadi mbutwile wa buswe, o mwanda usakanga kisaka kyandi nakyo kikale na nsangaji. (Isa. 65:14) Kudi bubinga buvule botwikadile na nsangaji dyalelo nansha byotubwanya kutanwa na makambakano. Kimfwa, tukulupile amba Tata wetu wa mūlu witusenswe bininge. Tudi na buyuki bwa bine bwa mu Bible, Kinenwa kya Leza. (Yel. 15:16) Kadi tudi mu kisaka kya pa bula mudi bantu basenswe Yehova, basenswe misoñanya yandi ya mwa kwikadila, kadi besenswe abo bene na bene.​—Ñim. 106:4, 5.

¹⁶ Tubwanya kwikala nyeke na nsangaji mwanda tudi na lukulupilo lwa bine lwa amba, būmi bukalumbuluka mu mafuku a kumeso. Tuyukile amba panopano ponka Yehova usa kutalula’ko babi bonso ne amba ntanda ikalamuka ke Paladisa pakaludika Bulopwe bwandi. Kadi tudi na lukulupilo lwa kutendelwa lwa amba boba bafwile bakasangulwa ne kwikala monka na baswe babo. (Yoa. 5:28, 29) Bine tukekala na nsangaji! Kadi kintu kya mvubu kutabuka i kino, tukulupile amba panopano ponka muntu yense momwa mūlu ne pano panshi ukapa Tata wetu wa buswe bulēme, ntumbo, ne butōtyi bwafwaninwe.