Tunekenyei Matompo Etuponenanga Pamwanda Wa Kikokeji Kyetu Kya Kulemeka Bijila

“Vwalai bumuntu bupya bupangwe mu kifwa kya Leza, umboloke ne [mu kulemeka bijila kwabinebine, “NW”].”​—EFISESA 4:24, MB.

TUKOKEJA kunekenya matompo etuponena mu miswelo mivule pamwanda wa kikokeji kyetu kya kulemeka bijila. Nakampata, i kunekenya matompo otutanwa nao pamwanda wa kikokeji kyetu kya kulemeka bijila bya Yehova Leza. Byotwayuka’mba Yehova i ani, ne i kika kyētulongelanga, ne pamwanda wa kwipāna kwetu kwadi, bine tufwaninwe kulemeka bijila byandi. Le i muswelo’ka otulombolanga’mba tulemekanga bijila bya Yehova Leza? Dibajinji, i na kwikala na kikokeji kya kulemeka misoñanya myoloke ya Yehova.

² Shi tusaka kunekenya bino bikambija, tufwaninwe kuta mutyima ku binenwa bidi mu 1 Petelo 1:​15, 16 binena’mba: “Monka mwikadile aye wemwityile byādi ujila, e monka ne bānwe nenu mwikale bajila mu miswelo yonso ya mwikadilo wenu; ke-kintu kisonekelwe’mba: Mukēkala bajila mwanda ami mwine ne ujila.” Kikokeji kya kulemeka bijila bya Yehova Leza kiketupa muswelo wa kumukōkela kitatyi kyonso, kwikala na milangwe, binenwa, ne bilongwa byetu bikwatañane na kiswamutyima kyandi kya kijila. Kushintulula ko kunena’mba kwikala na mutyima wa munda-munda wakubulwa kwitutopeka, pamo’nka na mobekinenena mu mbila idi mu 1 Temote 1:​3-5 (MB) amba: “Kyo nkunena kino [ke kufundijapo nkulupilo mishīle nansha kuta mutyima ku mfundijo yabubela, mhm, ino i buswe b]utamba ku mutyima utoka too ne ku mutyima wakubulwa kukuponeja ne ku wa lwitabijo lwa binebine.” Bine, kekudipo muntu nansha umo mubwaninine umbukata mwetu, ino tufwaninwe kulonga buninge bwetu bonso, lelo ke amopo?

³ Kikokeji kya kulemeka bijila bya Yehova kiketukankaja kujilula misoñanya myoloke pamwanda wa kilokoloko kya kwisakila kamweno ketu. Kyabine, kikokeji kya kulemeka bijila kiketukankaja kwikala bantu babudimbidimbi, batyimpile lwāyo lumo panja, lukwabo munda. Mulembi-wamitōto wādi ufunkila pa kikokeji kya kulemeka bijila pānene’mba: “Mfundije dishinda dyobe, abe Yehova; nkananga mu [bu]binebine [bo]be; mutyima wami usepelele pa kutyina dijina dyobe.” (Mitōto 86:11) Kikokeji kya kulemeka bijila kilomba kukōkela ku “mbila ne misoñanya pakubulwa kuningilwa na bantu.”

⁴ Kikokeji kya kulemeka bijila bya Yehova Leza kitukankaja monka kulonga kintu kyo-kyonso kikokeja kufūtulwija dijina dyandi ne Bulopwe bwandi. Kimfwa, bakristu babidi bēpīle myanda umo na mukwabo, bākesambile ku kiketelo kya mambo ku bantu ba ino ntanda. Zūji wēbepangula’mba: ‘Lelo banwe bonso ke mwi ba Tumoni twa Yehova’po?’ I kimweke patōka’mba kāivwanijepo mwanda waka bākesambīle ku kiketelo kya mambo. Kwādi kutopekwa kukatampe kwine! Shi bano bana betu bādi na kikokeji kya kulemeka bijila bya Yehova Leza, longa bāingidije madingi a Polo wānene’mba: “Yō! nanshi ne pano pene i bulema bukatampe [komudi, byo mwieleja] mu bidye bānwe bene na bene. Lelo i bika byo kemulekela mwanda bitupu? Lelo i bika byo kemulekela mwadimbwa nansha bitupu? e nabyako bidi.” (1 Kodinda 6:7) Bine, kwikala na kikokeji kya kulemeka bijila bya Yehova Leza kulomba kutyumwina myanda mu manwi kupitako kutukija Yehova ne bulongolodi bwandi.

⁵ Kikokeji kya kulemeka bijila bya Yehova Leza kishintulula monka kubulwa kwivwana moyo wa bantu. “Kityino kya bantu kileta dikinga, ino yewa ukulupila mudi Yehova ukapanda.” (Nkindi 29:25) Omwanda nanshi ketufwaninwepo kutuna lwitabijo lwetu kitatyi kyotutanwa na kupangwapangwa, ino tufwaninwe kulonda kimfwa kya ba Tumoni twa Yehova ba mu inyo Sovietike wakala, ba mu Malawi, ba mu Etyopi ne ba mu matanda makwabo mavule.

⁶ Shi tulemekele bijila bya Yehova Leza, ketukasambapo bulunda na boba bonso balwana nandi. Omwanda mwana-bwanga Yakoba wāsonekele’mba: “Yō! bānwe bampongoloki bana-bakaji, lelo kemuyūkilepo’mba, bulunda na bya panopantanda i kiji kikatampe kudi Leza’ni? Penepo nanshi uswile bulunda na bya panopantanda, nabya wepe aye mwine mushikwa kudi aye Leza.” (Yakoba 4:4) Tufwaninwe kwikala na kikokeji kya kulemeka bijila pamo na kyādi na Mulopwe Davida wānene’mba: “Lelo nkibashikilwepo, abe Yehova, boba bakushikilwe abe’ni? Lelo kadi nkifītyilwepo boba bakutalukile’ni? Nebashikwe ne mushikwa mukatampe mwine, nebēnika i banshikwe ami.” (Mitōto 139:​21, 22) Ketufwaninwepo kwenda kisense na bantu balonga bubi ku kusaka kwabo, mwanda ketudipo na kintu nansha kimo kyotupwanina nabo. Lelo kikokeji kya kulemeka bijila bya Leza kekifwaninwepo kwitukankaja kupwana na bantu bonso botuyukile’mba i balwana na Yehova ku mwikadilo wabo, nansha kadi kubandila bintu bikobakane ku televijo?

Kubingija Yehova

⁷ Kikokeji kya kulemeka bijila kiketutonona tubingije Yehova Leza. Bine Edihu wētushidile kimfwa kilumbuluke kashaa! Yoba 32:​2, 3 witusapwila’mba: “Bukalabale bwa Edihu . . . bwaakijibwa padi Yoba, ke-muntu Yoba wēbīngije aye mwine pakatampe, Leza patyetye. Ino pakwabo napo bukalabale bwandi bwaakijibwa padi balunda nandi basatu’ba, ke-bantu kebatenepo mwa kulondolwela Yoba, nanshi bamuponeje bitupu [ino bashilula kunena’mba Leza ye umbi].” Mu Yoba shapita 32 kufika ku 37, Edihu wābingije Yehova. Kimfwa, wānene’mba: “Ndeke bidi patyetye, nami nkakulaije; mwanda ngidi ne bikwabo byakunena padi Leza. . . . Nkapana boloke kudi Mupangi wami. . . . Kafundulapo meso andi ku moloke.”​—Yoba 36:​2-7.

⁸ Mwanda waka kifwaninwe kubingija Yehova? Dyalelo, Leza wetu Yehova utukwanga mutonko mu miswelo mivule. Bantu bafwatakanya’mba kadikopo, amba i kipindi kya mu Busatu, amba ususulanga bantu mu kalunganyembo ka mu mudilo wa nyeke ne nyeke, amba ukambakana bitupu na kutompa kwalamuna bantu ba mu ntanda yonso pa mutyima ne kadi’mba katelēpo bantu mutyima, ne myanda mikwabo mivule mine. Tukalombola’mba tudi na kikokeji kya kulemeka bijila byandi shi tumubingija ne shi tuyukija bantu amba Yehova udiko bine, amba udi na tunangu, i moloke, mwinebukomobonso, ne amba i Leza wabuswe; kadi’mba uloñanga mwanda ne mwanda pa kitatyi kitungwe; ebiya pakafikanga kitatyi kyetungile, ukafudijanga bubi bonso ne ukālamunanga ntanda yonso ke paladisa. (Musapudi 3:1) Kino kitulomba kukwatakanya kitatyi kyonso kyotumona mukenga mwanda wa kupāna bukamoni butala pa dijina dya Yehova ne pa Bulopwe bwandi.

Kikokeji kya Kulemeka Bijila Byotupebwa na Bulongolodi bwa Yehova

⁹ Pano tubandaulei mwanda utala kikokeji kya kulemeka bijila byotupebwa na bulongolodi bwa Yehova bumweka na meso. Bine, tufwaninwe kukōkela ku buno bulongolodi, kubadila’mo ne “umpika wabinebine ne wamanwa,” kingidilwa kingidijibwa mwanda wa kudisha kipwilo kya bwine-kristu kumushipiditu. (Mateo 24:​45-47) Tutele kimfwa kudi mwanda kampanda ulombwelwe mu mikanda ilupulwa na Watch Tower oketumvwanijepo senene nansha oketwitabijepo ponka na ponka. I kika kyotukalonga’po? Lelo tukashikwa bulongolodi ne kutamba’mo? Kyo kyālongele bantu bamo-bamo kepāpite myaka mivule, pāshintulwile Kiteba kya Mulami mu kine kitatyi’kya amba kipwanino kipya kifunkila pa bantu bakekala na būmi umbula bwa Umbikalo wa Myaka Kanunu. Bakwabo nabo bāpela kwitabija myanda yālupwilwe mu Kiteba kya Mulami yādi isambila pa kuleka kwikuja mu myanda ya ino ntanda. Shi boba bākukele pamwanda wa ino myanda bādi na kikokeji kya kulemeka bijila byotupebwa na bulongolodi ne shi bādi bakōkele bana babo, longa bāelaije kitōkeji kya Yehova pa ino myanda, kyālupwile mu kitatyi kifwaninwe. Omwanda nanshi tufwaninwe kuyuka’mba kwelaija na butūkanye kufika ne pakāya kwivwanija kupotoloke kukayukijibwa na umpika wabinebine ne wamanwa, nako kubadilwa mu kikokeji kya kulemeka bijila.

¹⁰ Kikokeji kya kulemeka bijila bya bulongolodi bwa Yehova kushintulula monka kupela bupondo. Bakristu balemekele bijila kebasakangapo kuyuka myanda inena bantu ba uno muswelo. Eyo, bantu bengidijibwa na Yehova Leza mwanda wa kuludika bulongolodi bwandi pano pantanda i bakubulwa kubwaninina. Ino lelo Kinenwa kya Leza kitulomba kulonga kika? Le kitusapwila’mba tufwaninwe kutamba mu bulongolodi bwa Leza’ni? Ke amopo. Kisanso kya bu bana na bana kifwaninwe kwitutonwena ku kulemeka bijila bya buno bulongolodi, kadi tufwaninwe kwendelela na ‘kwisanswa batwe bene na bene ku mutyima tō.’​—1 Petelo 1:22.

Kikokeji kya Kulemeka Bakulumpe Balemekele Bijila

¹¹ Shi kudi mwanda kampanda unenwe nansha ulongelwe pa kipwilo oketumvwanijepo senene, kikokeji kya kulemeka bijila kiketukankaja kwisambila bibi pa uno mwanda, kadi kiketukwasha tujingulule’mba pakwabo i kusansanya kwetu ko kekudipo biyampe. Lelo kekikekalapo kiyampe nakampata kutala ngikadila milumbuluke ya bakulumpe batongwe ne balunda netu bakwabo ba mu lwitabijo kupitako kwimanina pa bilubo byabo? Eyo, tufwaninwe kulwa na milangwe yonso imbi ya uno muswelo, mwanda ilombola mushipiditu wakubulwa kulemeka bijila! Kikokeji kya kulemeka bijila kiketukwasha monka tute mutyima ku madingi a Polo unena’mba: “Ne kunena muntu bibi, nansha umo [mpika].”​—Tetusa 3:​1, 2.

¹² Kikokeji kya kulemeka bijila kiletelanga bakulumpe matompo. Mwanda umo mu ano matompo i kufinda myanda mifwame. Mwanetu umo pa kipwilo ukokeja kuyukija mukulumpe umo myanda yandi. Kikokeji kya kulemeka bijila pamwanda utala uno mwanetu, kikakankaja uno mukulumpe kujilula musoñanya wa kusokola myanda mifyame. Ukengidija madingi adi mu Nkindi 25:9 mobanene’mba: “Kokasokola kanda ka bufyafya ka mukwenu.” Kino kishintulula kuleka kuyukija mwanda wa muntu, nansha ke kudi wandi mukaji mwine!

¹³ Bakulumpe badi monka na myanda mikwabo ibatūla mu matompo pamwanda utala kikokeji kyabo kya kulemeka bijila. Lelo bakafwila enka kusangaja bantu’ni, nansha kadi bakalemununa na bukankamane ne na butūkanye boba basakilwa bukwashi, nansha shi i bantu bobabutulwa nabo nansha kadi balunda nabo? Kikokeji kya kulemeka bijila byotupebwa na bulongolodi bwa Yehova kikatonona bakulumpe umbukata mwetu batompe kupa bukwashi bwa kumushipiditu ku muntu yense usakilwa’bo. (Ngalatea 6:​1, 2) Kikokeji kya kulemeka bijila kiketupa butūkanye ino ketukapūtapo bubi bwa bakwetu bakulumpe, pamo’nka na mwēsambile Polo pakubulwa kafinda pamwanda utala Petelo. (Ngalatea 2:​11-14) Ku mutamba mukwabo, batadi bafwaninwe kudyumuka, kutyina’mba bakabulwa kwingidija tunangu nansha kwikala na mboloji mu butyibi bwabo, nansha kwingidija lupusa lwabo bibi, shi bitupu bantu bobaludika bakakolelwa kulemeka bijila byobapebwa na bulongolodi bwa Leza.​—Fidipai 4:5.

¹⁴ Kudi myanda mikwabo itala pa kikokeji kya kulemeka bijila byotupebwa na kipwilo pamo ne bakulumpe bekiludika. Shi kudi ngikadilo kampanda ileta kavutakanya mu kipwilo, kino kitupa muswelo wa kulombola kikokeji kyetu kya kulemeka bijila bya Yehova ne kulemeka boba bamwimanine. (Tala Kiteba kya Mulami kya mu Falanse kya 15 kweji 6, 1987, paje 15-​17.) Shi muntu kampanda waikele kupangwa pa kipwilo, kikokeji kya kulemeka bijila kitulomba tukwatyije bakulumpe, ketukitompai kukimba kufwatakanya myanda moyāpityile mwanda wa kujingulula shi kwadi buluji bwendelemo bwa kutyibila ino mbila.

¹⁵ Kikokeji kya kulemeka bijila byotupebwa mu kipwilo kitulomba monka kukwatyija kupwila konso kutano kukwatañana na manwa ne ngikadilo yetu. Kikokeji kya kulemeka bijila kekitusakilapo enka kutanwa ku kupwila kitatyi ne kitatyi, mhm, ino tufwaninwe monka ne kuteakanya kuno kupwila ne kuleta’ko malondololo ōbaka kumushipiditu.​—Bahebelu 10:​24, 25.

Kikokeji kya Kulemeka Bijila mu Busongi

¹⁶ I ani mukwabo otufwaninwe kulombola kikokeji kyetu kya kulemeka bijila? Shi tudi mu busongi, kukwatañana na mutyipo wetu wa busongi, tudi na kiselwa kya kunekenya matompo otutanwa nao mwanda wa kulombola kikokeji kya kulemeka bijila kudi mwikadi netu. Kulombola kikokeji kyetu kya kulemeka bijila kudi mwikadi netu kuketukankaja kwimwekeja bu balumbuluke kutabuka kumeso a bantu bakwabo, kupitako kwikala balumbuluke kumeso a wetu mulume nansha wetu mukaji. Kulombola kikokeji kyetu kya kulemeka bijila kudi mwikadi netu, kwitulomba monka kuleka kulupula patōka “bukōkekoke” nansha “bilubo” bya mwikadi netu ku bantu ba panja. Kikalanga kipēla kutompola ku meso a bakwetu kupitako kwisambila pamo na mwikadi netu, kwisambila pamo kyo kintu kyotufwaninwe kulonga kukwatañana na Kijila Kitabukile Buleme. (Mateo 7:12) Nabubine, kulombola kikokeji kya bwine-kristu kya kulemeka bijila mu busongi i mwanda mukomo bininge.

¹⁷ Shi tusaka kunekenya ano matompo atala pa kikokeji kya kulemeka bijila, ketufwaninwepo enka kwepuka mwiendelejo umbi kete, ino tufwaninwe monka kulwa na milangwe ne mīivwanino yetu. (Mitōto 19:14) Kimfwa, shi mutyima wetu wa kyongo udi na lwiso wabila kwisangaja na bintu byulula masenda mu ngitu, ketukejepo kukokwa na kilokoloko. Mulopwe Solomone wākankamikile balume mu muneneno wa kyelekejo amba balamate enka bakaji babo na kunena’mba: “Toma mema [a] mu kyumbu kya abe mwine.” (Nkindi 5:15) Yesu nandi wānene’mba: “Yewa wakutala mwana mukaji meso a mutyima wakumusaka, nankyo wapu kupya kala mambo nandi umutyima wandi.” (Mateo 5:28) Balume basangelanga kutala mafilime alombola bya busekese betula abo bene mu kyaka kya kuponena mu kulonga makoji, ebiya bakadimba babo bakaji ne kwikala bakubulwa kulemeka bijila ku meso abo. Pa uno mwanda umo onka, mukaji wipānanga mu kutala mafilime olula masenda mu ngitu mobalombola bantu balonga busekese, ukokeja kuponena mu kyaka kya kubulwa kulemeka bijila kumeso a mulumyandi. Inoko, shi tulombola kikokeji kyetu kya kulemeka bijila ku mwikadi netu, tukaningija kijimba kyetu kya busongi, kadi tukalonga bukomo bwa kwikwashako umo ne mukwabo mwanda wa kusangaja Yehova Leza.

Bukwashi Botupebwa Twikale na Kikokeji kya Kulemeka Bijila

¹⁸ I kika kikokeja kwitukwasha tulame kikokeji kyetu kya kulemeka bijila mu ino myanda iná: ko kunena’mba kwikala na kikokeji kya kulemeka bijila bya Yehova, kulemeka bijila byotupebwa na bulongolodi bwandi, bya mu kipwilo ne ku mwikadi netu? Bukwashi bubajinji i kuyuka’mba bulwi bwetu botulwa pa mwanda utala kikokeji kya kulemeka bijila bwimanine bininge pa kubingija bubikadi bwa Yehova. Eyo, shi tulemeka bijila tukalombola’mba Yehova ye Mfumwandya Balopwe udi peulu pa byonso. Mu uno muswelo, tukokeja kadi kwikala na bulemantu ne na lukulupilo lwa kukekala na būmi bwanyeke mu ntanda impya ya Yehova. Tukokeja kulama kikokeji kyetu kya kulemeka bijila na kulonda bimfwa bilumbuluke bya bantu bādi na kikokeji kya kulemeka bijila, kushilwila kudi Yehova kutūla ku boba bonso batelelwe mu Bible ne mu mikanda ilupulwanga na Watch Tower, kubadila’mo ne nsekununi idi mu Kitabu-Mwaka.

¹⁹ Lwitabijo lukomo mudi Yehova Leza ne kwivwana moyo wa kumulubila biketukwasha tulame kikokeji kyetu kya kulemeka bijila. Tuningishei lwitabijo lwetu ne kwakamwa Yehova na kwifunda Kinenwa kya Leza na bupyasakane ne kwipāna mu mwingilo wa bwine-kristu. Kino kiketukwasha twingidije madingi a Polo adi mu Efisesa 4:​23, 24 (MB) amba: “Kifwaninwe mwikale bapya mu mityima yenu ne mu milangwe yenu mine. Vwalai bumuntu bupya bupangwe mu kifwa kya Leza, umboloke ne [kulemeka bijila kwabinebine].”

²⁰ Kutendela ngikadila milumbuluke ya Yehova kuketukwasha tulemeke bijila. Nakampata, buswe botusenswe Tata wetu wa mūlu bwakubulwa kwisakila kamweno ne mutyima wa kumufwijako pamwanda wa bintu byonso byaetulongelanga, kumusanswa na mutyima wetu onso, na muya wetu onso, na ñeni yetu yonso, na bukomo bwetu bonso, biketukwasha tulemeke bijila. Pakwabo kadi, kulombola buswe bunena Yesu amba ko kayukeno ka kuyukila’po balondi bandi, kuketukwasha tulombole kikokeji kyetu kya kulemeka bijila ku bakristu bonso pa kipwilo ne ku bantu ba mu kyetu kisaka. Mu bishima bikwabo tukanena’mba, i mwanda witulombola shi twisakilanga kamweno ka batwe bene nansha shi ketwisakilanga’kopo. Kubulwa kikokeji kya kulemeka bijila kishintulula kwisakila kamweno. Kikokeji kya kulemeka bijila kishintulula kubulwa kwisakila kamweno.​—Mako 12:​30, 31; Yoano 13:​34, 35.

²¹ Mu kīpi tukanena’mba: Kikokeji kya kulemeka bijila i ngikadila milumbuluke yapabula ilombolanga Yehova Leza, Yesu Kristu, ne bengidi bonso babine ba Yehova. Shi tusaka kulama kipwano kilumbuluke na Yehova Leza, tufwaninwe kunekenya matompo otutanwa nao pamwanda wa kikokeji kyetu kya kulemeka bijila byandi na kwikala na būmi bukwatañene na misoñanya yandi myoloke, na kuleka kupwana na balwana nandi, ne na kubingija Yehova na kupāna bukamoni bwa ponka na ponka ne na kwendeja bifundwa bya Bible. Tufwaninwe kadi kunekenya matompo otutanwa nao pamwanda wa kulemeka bijila bya bulongolodi bwandi. Tufwaninwe kulombola’mba tulemekanga bijila pa kipwilo ne kudi bekadi netu. Shi tunekenye senene matompo otutanwa nao pamwanda wa kikokeji kyetu kya kulemeka bijila, tukabingija bubikadi bwa Yehova, kadi tukatonga kulamata nyeke ku mutamba wandi mu myanda yonso. Ebiya, tuketabijibwa nandi ne tukatambula mpalo, ke būmi bwanyeke kadi. Myanda yānene mutumibwa Polo pamwanda utala lulamato lwa kudi Leza ifunkila monka potudi, mwanda tunekenyanga matompo otutanwanga nao pamwanda wa kikokeji kyetu kya kulemeka bijila. Tukamwena’mo kamweno tamba’nka pano ne mu mafuku akāya kumeso.​—Mitōto 18:25; 1 Temote 4:8.

[Bipangujo]

1. Mwanda waka tufwaninwe kulombola Yehova Leza kikokeji kyetu kya kulemeka bijila?

2, 3. I kukwatañana’ka kudi pabukata bwa kikokeji kya kulemeka bijila ne boloke?

4, 5. Kikokeji kya kulemeka bijila kiketukinga ku kulonga myanda’ka imbi?

6. Kikokeji kya kulemeka bijila kiketukwasha twepuke kupwana na bāni?

7. Kikokeji kya kulemeka bijila kiketukwasha tulongele Yehova kika, ne Edihu wēkilombwele muswelo’ka?

8. Mwanda waka tufwaninwe kubingija Yehova?

9. I pa myanda’ka pājimije bamo-bamo kikokeji kyabo kya kulemeka bijila?

10. Kikokeji kya kulemeka bijila kiketukwasha tuleke kukimba kujingulula myanda’ka?

11. Kikokeji kya kulemeka bijila kiketukinga ku milangwe’ka imbi?

12, 13. I myanda’ka ifwaninwe kunekenya bakulumpe?

14, 15. I bintu’ka bikokeja kutula kikokeji kya kulemeka bijila kya bantu bamo-bamo pa kipwilo pa ditompo?

16, 17. Ba mulume ne mukaji bafwaninwe kunekenya myanda’ka pamwanda utala kikokeji kyabo kya kulemeka bijila?

18. I bika byotufwaninwe kusangela shi tusaka kulama kikokeji kyetu kya kulemeka bijila?

19. Lwitabijo lwitukwasha muswelo’ka twikale kulemeka bijila?

20. Pangala pa byonso, i ngikadila’ka milumbuluke ikokeja kwitukwasha tulemeke bijila bya Yehova ne kulemeka boba bonso botufwaninwe kulombola kikokeji kyetu kya kulemeka bijila?

21. I muswelo’ka otukokeja kushintulula mu kīpi muswelo otukokeja kunekenya matompo otutanwanga nao pamwanda wa kikokeji kyetu kya kulemeka bijila?

[Kapango pa paje 16]

Kulombola kikokeji kyetu kya kulemeka bijila ku bana betu pa kipwilo, kukakwasha bakulumpe baleke kusokola myanda mifyame

[Kapango pa paje 17]

Kikokeji kya kulemeka bijila mu busongi kikaningisha kijimba kya busongi

Ukalondolola Namani?

◻ I muswelo’ka otukokeja kunekenya matompo otutanwa nao pamwanda wa kikokeji kyetu kya kulemeka bijila bya Yehova Leza?

◻ Kikokeji kya kulemeka bijila bya bulongolodi bwa Yehova kitusakila kika?

◻ Bakulumpe bakokeja kulombola kikokeji kyabo kya kulemeka bijila muswelo’ka?

◻ Ba mulume ne mukaji bakristu batanwanga na matompo’ka pamwanda utala kikokeji kya kulemeka bijila?

◻ I ngikadila’ka milumbuluke iketukwasha tunekenye matompo otutanwa nao pamwanda wa kikokeji kyetu kya kulemeka bijila?