Yehova Ukakuvuluka Namani?

“MVULUKE, a Leza wami.” Nehemia wālombele Leza misunsa mivule na bino bishima. (Nehemia 5:19; 13:14, 31) Divule dine, bantu pobatanwanga na tusua tukatampe, babijanga Leza, bamulomba mu bishima bya uno muswelo.

Lelo bano bantu balañanga bika pobalombanga Leza ebavuluke? I kimweke patōka amba bekalanga bakulupile amba Leza usa kwibalongela kintu kampanda, ke kuvulukapo majina abo bitupu. Eyo, bakulupile monka mwādi mukulupidile yewa nonga-bibi wāipailwe kubwipi na Yesu. Uno muntu wādi mwishile na mukwabo, mwanda aye wālombele Yesu amba: “Umvuluka Mfumwami, popa pōkāya mu bulopwe bobe.” Wādi usaka Yesu akamuvuluke. Ino ke kumuvulukapo bitupu amba wādi kankenge, mhm, i kumulongela kintu kampanda—ke kumusangula kadi.—Luka 23:42.

Bible ulombola pavule amba “kuvulukwa” na Leza kushintulula kulongelwa biyampe nandi. Kifwa, ntanda poyālobele mafuku 150 mu mema, “Leza wavuluka Noa, . . . wapukumija luvula panopanshi, ne mema keendaenda ōnga.” (Ngalwilo 8:1) Myaka tutwa pa kupita’po, Samishoni nandi wālombela, aye papo musabwe meso, koku mukutwe mu nkano na bene Fidishitia, kanena’mba: “A! Mwine Leza nakwisashila, mvuluke bidi ne kunkomeja, nakwisashila, ino enka kino kitatyi kino’ki kete.” Yehova wāvuluka Samishoni na kumupa bukomo butabukile bwa bana ba bantu amba alubule kinongo pa balwana na Leza. (Batyibi 16:28-30) Ino Nehemia aye wāeselwe na Yehova pangala pa bukomo bwandi bwaālongele, wājokeja mutōtelo utōka mu Yelusalema.

Pa kino, mutumibwa Polo unena’mba: “Byonsololo byasonekelwe kala byasonekelwe mwanda wa kwitufundija’mba, pa kutūkija mutyima, ne pa kusengibwa na bisonekwa, twikale ne kukulupila.” (Loma 15:4) Wivwane tuvuluke Yehova na kukimba kulonga kiswa-mutyima kyandi, na mwālongele’kyo bengidi bandi bakikōkeji pa kala, tukokeja kukulupila netu amba Yehova uketuvuluka na kwitukwasha tumone bisakibwa byetu bya mobukila mobukila, na kwitukwatakanya mu matompo, ne na kwitunyongolola pasa kuleta butyibi bwandi pa bantu bakubulwa bwine Leza.—Mateo 6:33; 2 Petelo 2:9.