Bine bana-bakaji abafītwa pa kumona amba mu kibundu i mutupu muntu! Madia mwine Makadala waenda lubilo kudi “Shimona Petelo ne kudi mwanā bwanga mukwabo, obadi basenswe kudi Yesu kisanso kikatampe”​—ke mutumibwa Yoano kadi. (Yoano 20:2) Inoko bana-bakaji bakwabo abamone mwikeulu ku kibundu. Kadi munda mwa kibundu kivulukwa mudi mwikeulu mukwabo, “uvwele munkukumba utōka tō.”​—Mako 16:5.

Mwikeulu umo webasapwila’mba: “Kemwakikwatwai moyo, mwanda ndyukile’mba mukimbanga Yesu wapopelwe ku mutyi. Kadi’mopo muno, mwanda i musanguke, monka mwaanenene. Iyai, talai pene paadi ulēle. Nanshi endai lubilo mukalombolei bandi bana ba bwanga’mba wasanguka mu bafwe, mwanda talai! wemubadikila mu Ngadilea.” (Mateo 28:5-7) Ebiya bana-bakaji abaenda lubilo “papo bazakala ne kutendela bikatampe,” abakasapwila bana ba bwanga.​—Mako 16:8.

Na pano kala, Madia watana ba Petelo ne Yoano. Wanena ufomakana’mba: “Mfumwetu abamusela’mo mu kibundu, kadi ketuyukilepo kobakamulādika.” (Yoano 20:2) Ba Petelo ne Yoano abanyemena’ko lubilo. Yoano byadi na lubilo bininge wafika mubajinji ku kibundu. Weinya’mo mudi’nka bisandi, inoko katwelele’mopo.

Petelo pa kufika aye watwelelela’mo. Wamone bivwalwa bya bukonge ne kisandi kyobadi bamupūtyile ku mutwe. Yoano nandi watwela ne kwitabija byebalombolanga Madia. Nansha byapwile kwibasapwila Yesu mafuku kunyuma, ino i kutupu mobadi witabije amba i musanguke. (Mateo 16:21) Abaenda ku mobo, ñeni mibavutakane. Ino Madia washala bidi konka.

Papo, kudi bana-bakaji bakwabo badi mwishinda benda kukasapwila bana ba bwanga amba Yesu wasanguka. Pobenda lubilo, Yesu webasambakana kanena’mba: “Mwakomapoi!” Bafwena bamukwata ku maulu kebamufukatyila. Penepo Yesu webanena’mba: “Kemwakikwatwai moyo! Endai, kasapwilei banabetu amba bende ku Ngadilea, e kobakamona ami.”​—Mateo 28:9, 10.

Padi pabatenkana ntanda kadi bamwikeulu abamweka ku kibundu, basola badi’ko badi abazakala “kebekele’tu bwa bafwe.” Abo pa kupumputumuka, abaendanga mu kibundi ne kusapwila “babitobo bakulu byonso byalongekanga.” Babitobo ko kwisamba na bakulumpe ba Bayuda. Abakwata mulangwe wa kutyiba milomo basola bafye mwanda’wa ino banene amba: “Bandi bana ba bwanga abaiyanga bufuku abamwibe batwe papo tulēle.”​—Mateo 28:4, 11, 13.

Basola bene Loma babwanya kwipaibwa shi’tu abalāla kobengila, o mwanda babitobo abebalaya amba: “Shi mwanda [bubela bwabo bwa amba abalālanga] ubapone mu matwi a mbikavu, tusa kumushintulwila’byo papo kekukekalapo kyomuselela mutyima kūlu.” (Mateo 28:14) Basola abaitabija kuketwa milomo kadi abalonga byebanena babitobo. Enka nenki myanda ya bubela bwa amba umbidi wa Yesu ubaibwe ibasambakana mu Bayuda.

Madia mwine Makadala ukidila ku kibundu. Aye pa kufwena kutala mu kibundu, wamone bamwikeulu babidi bavwele bitōka! Umo ushikete kwadi mutwe wa umbidi wa Yesu ne mukwabo nandi ku maulu. Abamwipangula’mba: “A mwana-mukaji, le i bika byodila?” Madia webanena’mba: “Abasela Mfumwami, kadi nkiyukilepo kobakamulādika.” Madia pa kuvundamuka nenki, wamone muntu mukwabo. Yao muntu nandi wamwipangula’nka kipangujo kyamwipangulanga bamwikeulu kadi wabweja’ko amba: “I ani okimba?” Aye pa kulanga’mba i mudimi, wamunena’mba: “Mfumwami, shi i abe wamutekunanga, nombole komulādikile, nkamusele’ko.”​—Yoano 20:13-15.

Ino na bubine, Madia wisambanga na Yesu musanguke, ino wakomenwa kumujingulula. Aye pa kumwita’mba, “Madia!” ponka’po wayuka’mba i Yesu, wajingulula mwaadi umwityilanga. Madia wamwite na nsangaji amba: “Laboni!” (ko kunena’mba, “Mufundiji!”). Byadi na moyo amba kaenda mūlu, Madia kakimbe kumukwata. Ponka’po Yesu wamupeleja amba: “Leka kunkwata, mwanda nkyakandile kwa Tata. Ino enda kudi banabetu ukebalombole amba, ‘Kenkanda kwa Tata kadi ye Shenu, kwa Leza wami kadi ye Leza wenu.’”​—Yoano 20:16, 17.

Madia waenda lubilo kwibungile batumibwa ne bana ba bwanga bakwabo. Webasapwila’mba: “Namone Mfumwetu!” Wabweja’ko bukamoni ku byebalombolanga bana-bakaji bakwabo. (Yoano 20:18) Nansha nankyo, ‘abamone bu i bya bubela.’​—Luka 24:11.

Mu Dya Yenga dya Nisane 16, bana ba bwanga i bakōke mu ñeni. Kebevwanijepo mwanda waka mu kibundu i mutupu muntu. (Mateo 28:9, 10; Luka 24:11) Mu difuku dilonda’ko, Keleopasa ne mwanā bwanga mukwabo abatambe mu Yelusalema abaenda ku Emese, kibundi kidi ku makilometele 11.

Pobenda mu dishinda, besambanga myanda ilongekele. Ponka’po muntu ungi webapeta. Webepangula’mba: “Le ino myanda yomwenda mwisamba i myanda’ka?” Keleopasa wamunena’mba: “Le abe wi mweni ushikatanga kwa bunka mu Yelusalema ne kuyukilepo bintu bilongekele’mo ano mafuku?” Muntu ungi’wa webepangula’mba: “Le i bintu’ka le?”​—Luka 24:17-19.

Abamulondolola’mba: “Bintu bitala Yesu mwine Nazala. . . . Twadi tukulupile amba uno muntu ye wadi wa kunyongolola Isalela.”​—Luka 24:19-21.

Keleopasa ne mwendi nandi kebamusekunwina bintu byalongeka enka dine difuku’dya. Abanena’mba bana-bakaji bamo abaendanga ku kibundu kwadi kujīkilwe Yesu kebamutene’ko ne amba bano bana bakaji abemwenanga bintu bitulumukwa​—bamwikeulu abebamwekela ne kwibasapwila amba Yesu i mūmi. Abanena kadi amba bakwabo nabo abaendanga’ko “abatana’nka mwanenenanga bana-bakaji’ba.”​—Luka 24:24.

Bana ba bwanga babidi i basele mutyima kūlu pa bintu byalongeka. Muntu ungi’wa webalondolola na lupusa ne kulēmununa milangwe yabo mibi mu muswelo ukunka mityima yabo amba: “Yō, banwe bampikwa ñeni ne ba mityima ya lukoko pa kwitabija byonso byānenene bapolofeto! Lelo kekyadipo kifwaninwe Kidishitu kutanwa na bino bintu ne kutwela mu ntumbo yandi?” (Luka 24:25, 26) Webashintulwila mikanda mivule ya mu Bisonekwa īsambila padi Kidishitu.

Ku mfulo bonso basatu abafika ku Emese. Bana ba bwanga babidi abasake kuyukila’ko bikwabo, abamuzenze amba: “Ikala netu mwanda ke kyolwa ne difuku kedisa kala kufula.” Aye pa kwitabija, abaleta bidibwa. Muntu ungi’wa walombela, watyumuna mukate ne kwibapa’o, ebiya abamujingulula, nandi ne kujimina wajimina. (Luka 24:29-31) Pano abayukididila amba bine Yesu i mūmi!

Bana ba bwanga babidi kebanena na nsangaji byobaivwana’mba: “Le mityima yetu keyadipo itēma mudilo munda mwetu paadi wisamba netu mwishinda, paadi witupūtwila ne pa mfulo Bisonekwa?” (Luka 24:32) Abajokela bukidi ku Yelusalema abatana batumibwa ne bakwabo bobadi nabo. Kumeso kwa ba Keleopasa ne mwendi nandi kulombola byalongeka, bakwabo kala abebalombola’mba: “Bine ne bine ponka Mfumwetu i musanguke, kadi wamwekelanga Shimona!” (Luka 24:34) Ebiya bano babidi nabo kebasapula mwebamwekelanga Yesu. Abo nabo i batumoni bemwenine na meso.

Pano kadi ababezemuka pebamwekela Yesu mu kyumba! Abakomenwa kwitabija kala, mwanda badi bakomene ku kibelo mwanda wa kutyina kobatyina Bayuda. Nansha nankyo, Yesu au wimene umbukata mwabo. Webatalaja’mba: “Ndoe ikale nenu.” Ino abo abakwatwa moyo. Enka na mobalongele dikwabo, “balanga’mba abamone mushipiditu.”​—Luka 24:36, 37; Mateo 14:25-27.

Yesu pa kusaka kulombola’mba ke kimonwapo bitupu kyobamona nansha kintu kya kufwatakanya, ino i aye mu ngitu ya bumuntu, webalombola makasa andi ne maulu andi amba: “Mwanda waka mubavutakanibwa ñeni, kadi i kika kyomutatena mu mityima yenu? Talai makasa ne binyantyilo byami, ye ami uno; ntengei mumone, mwanda mushipiditu keudipo na ngitu nansha na mikupa na momwaumwena nabyo’mu.” (Luka 24:36-39) Abasangala ne kutulumuka bininge inoko bakidi na kakutatana.

Pa kukimba kwibakulupija bamone amba i aye, webalombe amba: “Lelo mudi’ko na ka kudya?” Penepo abamutambika kipindi kya mwita wa lui moshe. Penepa webanena’mba: “Bino byo binenwa byami byonemunenene ponadi nakidi nenu [ponadi nkyafwile] amba, byonso bisonekelwe pa mwanda wami mu Bijila bya Mosesa ne mu Bapolofeto ne mu Ñimbo ya Mitōto bifwaninwe kufikidila.”​—Luka 24:41-44.

Yesu wakwashanga Keleopasa ne mwendi nandi bevwanije Bisonekwa, kadi pano byo byalonga pobebungile abo bonso amba: “Kino kyo kilembelwe amba: Kidishitu ukasusuka ne kusanguka mu bafwe mu difuku dya busatu, kadi mu dijina dyandi, kwisāsa mwanda wa kulekelwa bubi kukasapulwa mu mizo yonso​—kushilwila mu Yelusalema. Banwe mukekala batumoni ba bino bintu’bi.”​—Luka 24:46-48.

Ketuyukilepo kekikadile’popo mutumibwa Tomase. Abo bukya, bakwabo abamusapwila na nsangaji amba: “Tubamone Mfumwetu!” Ino webanena’mba: “Shi nkimwenepo biyukeno bya misumadi mu makasa andi ne kutenga munwe mu biyukeno bya misumadi’mwa kadi ne kutenga dikasa mu mpamvu yandi, nabya nkiketabija’byopo nansha dimo.”​—Yoano 20:25.

Mafuku atano pa kupita’po, bana ba bwanga abebunge monka kwinjibo kukomene, ino uno musunsa Tomase udi’mo. Yesu webamwekela na ngitu ya mashi ne mema ne kwibemuna’mba: “Ndoe ikale nenu.” Kupwa Yesu wanena Tomase amba: “Ela munwe obe pano, mona makasa ami, kadi tekuna dikasa dyobe untenge mu mpamvu, ne kadi leka kutatana, ino itabija.” Tomase watulumuka’mba: “Mfumwami, Leza wami!” (Yoano 20:26-28) Bine, pano kakidipo na kutatana, wamone’mba Yesu i mūmi bu kipangwa kya ku mushipiditu kimanine Yehova Leza.

Yesu wamunena’mba: “Ubaitabija mwanda ubaumone? Ba katōkwe i boba kebamwenepo ino baitabija.”​—Yoano 20:29.