Watchtower KIBĪKO PA ENTELENETE

Bubine Butala Bamwikeulu

Kiteba kya Mulami (Kya Bantu Bonso)—2017 | No. 5
- Lelo Bamwikeulu Ba Leza I balongololwe Namani?
  
  Mwikeulu mukatampe, Mikele ye mukatampe wa bamwikeulu mu mwanda utala bukomo ne lupusa. Bisonekwa bilombola patōkelela’mba Mikele i dijina dikwabo dya Yesu Kidishitu.—1 Tesalonika 4:16; Yude 9.
  
  Baselafimi i mulongo wa bamwikeulu badi na dyese dya kwingila mwingilo wa peulu ne wa ntumbo, kadi bajokolokele lupona lwa Leza.—Isaya 6:1-3.
  
  Bakelubi nabo badi mu mulongo wa peulu kadi bengilanga mingilo ya pa bula pabwipi na muntu wa ntumbo kadi Mwinē Bukomo Bonso. Divule balombolwanga bemene mu kifuko kyandi.—Ngalwilo 3:24; Ezekyele 9:3; 11:22.
  
  Tununu makumi twa tununu makumi twa bamwikeulu basedi ba myanda bengilanga bu bengidi ba Mwine wa Mūlu Mwine pa kufikidija kiswa-mutyima kyandi.b—Bahebelu 1:7, 14.

Lelo Udi na Mwikeulu Mulami?

Kiteba kya Mulami (Kya Bantu Bonso)—2017 | No. 5
- MUTWE WA MWANDA WA PA KIBALU | BAMWIKEULU—LELO BADI’KO BINE? KYOWIKADILE MWANDA WA MVUBU
  
  Lelo Udi na Mwikeulu Mulami?
  
  Bible kafundijangapo amba muntu ne muntu udi na mwikeulu wa kumulama. Shako, Yesu wānenene amba: “Tadijai kutyina’mba mwakafutulula umo wa mu bano batyetyetyetye [bana ba bwanga ba Kidishitu], mwanda nemulombola’mba bamwikeulu babo momwa mūlu babandilanga nyeke mpala ya Tata udi mūlu.” (Mateo 18:10) Yesu kādipo usaka kunena’mba muntu ne muntu udi na mwikeulu mulami, ino wādi usaka’tu kunena’mba bamwikeulu batele mutyima bana bandi ba bwanga umo ne umo. Nanshi, batōtyi ba bine kebafwaninwepo kulonga bintu pampikwa tunangu ne kwitūla mu kyaka na kulanga’mba bamwikeulu ba Leza basa kwibakinga.
  
  Le kino kishintulula’mba bamwikeulu kebakwashangapo bantu? Aa, ke amopo. (Ñimbo ya Mitōto 91:11) Bantu bamo bakankamananga bininge pa kujingulula’mba Leza webakingile ne kwibaludika kupityila ku bamwikeulu. Kenneth, utelelwe mu kishinte kibajinji, nandi i mwimwene uno mwanda. Nanshi, ketubwanyapo kumupatanya, ubwanya kwikala na bubinga. Divule Batumoni ba Yehova bemwenanga bukwashi bwa bamwikeulu pobadi mu busapudi. Inoko, bamwikeulu byokebamwekangapo, o mwanda ketubwanyapo kwisambila pa kanda ne kanda mwibengidijijanga Yehova pa kukwasha muntu ne muntu mu myanda palapala. Nanshi, i biyampe tufwije’ko Mwinē Bukomo Bonso pa bukwashi bo-bonso bwaetukwasha nabo.—Kolose 3:15; Yakoba 1:17, 18.