Bya Kulonga shi Ubabela Misongo ya mu Kitulumukila

Le bukomo bobe bwa ngitu bwabipile’ko mu kitulumukila? Nabya uyukile misongo moipungijijanga muntu mu ñeni ne kupwa lupeto. Le ubwanya kwiyuminina namani? Le i muswelo’ka obwanya kukwasha muntu wa mu kisaka nansha mulunda nobe ubela? Nansha Bible byakadipo dibuku dya kiñanga, ino mudi misoñanya ya kamweno ikokeja kukukwasha ūminine makambakano obe biyampe.

Madingi a kukukwasha ūminine misongo

• Enda bakakundape

  Binena Bible: “Bakomo kebadipo kyobasakila muñanga, poso boba babela.”—Mateo 9:12.

  Mwa kwikingidijija: Shi bibwanika kimba bamuñanga ba kukundapa.

  Tompa ano manwa: Kimba bundapi buyampe bobwanya kusokola. Kyaba kimo i biyampe kupimwa na bamuñanga beshileshile. (Nkindi 14:15) Wisambe pampikwa kafinda na bamuñanga, longa bukomo bwa kwibevwana, kadi tala shi abaivwanija bine bikukambakanya. (Nkindi 15:22) Kimba kuyuka myanda itala misongo yobe, kubadila’mo ne bundapi bonso bosaka. Shi ubaivwanija bine byosaka, uketeakanya biyampe mu ñeni mwanda wa kūminina ngikadilo yodi’mo kadi ukakwata butyibi buyampe bwa mwa kundapilwa.

• Ikala nyeke na bibidiji biyampe

  Binena Bible: “Makayo a kukomeja ngitu i mayampe.”—1 Temote 4:8, Dibuku Dijila.

  Mwa kwikingidijija: Ukamwena’mo shi wikale nyeke na bibidiji biyampe, kimfwa kwitamuna bidyoma kitatyi ne kitatyi.

  Tompa ano manwa: Kokaleka kibidiji kyobe kya kwitamuna bidyoma difuku ne difuku, dyá nyeke byakudya bya bumeni, kadi lāla bininge. Nansha byobwanya kulonda ngikadilo mipya yotanwa’mo, bashayuka betabija’mba shi ulonga bukomo bwa kwikala na bibidiji biyampe, ukabwanya. Bine, i biyampe kutala shi byonso byokimba kulonga bikwatañene na bukomo bobe bwa ngitu ne shi kebijilulapo bijila byobakupele mu bundapi.

• Nena bakwenu bakukwashe

  Binena Bible: “Mulunda wa bine ulombolanga buswe kitatyi kyonso kadi i mwanenu mubutulwe mwanda wa bitatyi bya tusua.”—Nkindi 17:17.

  Mwa kwikingidijija: Balunda nobe babwanya kukukwasha ūminine bitatyi bya makambakano.

  Tompa ano manwa: Lombola’mo mulunda ukulupilwa obwanya kupēlelwa kulombola mowiivwanina. Kulonga namino kubwanya kukukwasha uleke kuvutakanibwa ñeni bininge kadi wiivwane biyampe. Padi balunda ne bantu ba mu kisaka basakanga kukukwasha mu miswelo mikwabo, inoko babwanya kukomenwa bya kulonga. O mwanda wibalombole pampikwa kafunda bine byobabwanya kulonga pa kukukwasha. Kokebalomba bipitepite, kadi fwija’ko nyeke pa bukwashi bobakukwasha. Kadi vuluka’mba nansha bisaka kukukwasha balunda nobe, kyaba kimo babwanya kulonga bintu bikusansa, o mwanda ufwaninwe kwitūdila’ko mikalo, kimfwa pa muswelo wa kukupempula ne kitatyi kya kukupempula.

• Ikala na mumweno muyampe

  Binena Bible: “Mutyima wa nsangaji i bwanga buyampe, ino mushipiditu muvingakane utyepejanga bukomo bwa muntu.”—Nkindi 17:22.

  Mwa kwikingidijija: Mumweno muyampe ubwanye kukukwasha wikale nyeke talala mwanda wa ūminine misongo.

  Tompa ano manwa: Kitatyi kyoibidila ngikadilo mipya yodi’mo, longa’nka byobwanya kulonga, kokalonga bintu byokubwanyapo kulonga. Leka kwidingakanya na bakwenu nansha na muswelo owadi ulonga bintu powadi kwabelele. (Bene Ngalatea 6:4) Witungile bitungo byendele’mo kadi byowanya kufikila’po, kulonga namino kubwanya kukukwasha wikale na mumweno muyampe. (Nkindi 24:10) Longela bakwenu bintu ponso pobibwanika. Nsangaji itambanga ku kupana ibwanya kukukwasha uleke kwikala na milangwe mibi.—Bilongwa 20:35.

Lelo Leza ukakukwasha ūminine misongo yobe?

Bible ulombola’mba Lezaa ubwanya kukwasha muntu ōminine misongo. Nansha byoketubwanyapo kutengela Leza etundape mu kingelengele, inoko Leza ubwanya kupa boba bamutōta:

Ndoe. Yehova ubwanya kuleta “ndoe ya Leza itabukile ñeni yonso.” (Bene Fidipai 4:6, 7) Ino ndoe, nansha ndoe ya mutyima, ibwanya kukwasha muntu aleke kuzumbija mutyima bininge. Leza upanga ino ndoe bantu bamulomba ne kumulombola muswelo obazumbija mutyima.—1 Petelo 5:7.

Tunangu. Yehova ubwanya kwitupa tunangu mwanda wa tukwate butyibi buyampe. (Yakoba 1:5) Shi muntu wifunda ne kwingidija misoñanya idi mu Bible ukekala na tuno tunangu.

Lukulupilo lukankamika lwa mu mafuku a kumeso. Yehova i mulaye kitatyi kya kumeso ‘kekikanenapo mwikadi amba: Nabela.’ (Isaya 33:24) Luno lukulupilo lukwashanga bantu bavule bekale nyeke na mumweno muyampe nansha shi ababela misongo mikomo.—Yelemia 29:11, 12.