Kubwipi na Babele kwādi kibundi kimo kitwa bu Ulu, bantu bādi batōta’mo baleza bakwabo bavule pa kyaba kya Yehova. Inoko mu Ulu mwādi muntu umo wādi utōta’nka Yehova kete. Dijina dyandi i Abalahama.

Yehova wāsapwidile Abalahama amba: ‘Taluka mu yenu ntanda ne mu babutule bobe, wende ku ntanda yonkakulombola.’ Kupwa, Leza wāmulaya’mba: ‘Ukekalanga muzo mukatampe, kadi nkalongelanga bantu bavule bintu biyampe pa mwanda obe.’

Abalahama kādipo uyukile kwine kwāmutumine Yehova, inoko wākulupile Yehova. Ebiya Abalahama, wandi mukaji Sala, shandi Tela, ne Lota, mwanā mwanabo bāomeka bintu byabo kebenda lwendo lulampe.

Abalahama wādi na myaka 75 paāfikile pamo ne kisaka kyandi mu ntanda yādi ibasakila Yehova kumona. Ino ntanda yādi ītwa bu Kenani. Kwine’kwa, Leza wēsambile’ko na Abalahama wāmulaya’mba: ‘Ino ntanda yonso yomwene’i, nkapānanga’yo ku bobe bana.’ Inoko ba Abalahama ne Sala bādi ke banunu kadi kebādipo na bana. Penepo Yehova wādi wa kufikidija namani uno mulao wandi?

Ba Abalahama ne Sala bādi ke balonge myaka mivule mu kwisonga. Bāshile njibo yabo miyampe mu Ulu, bākekala mu pema. Inoko Sala kātompwelepo, mwanda wādi ukulupile Yehova.

Sala wādi wabila bininge kubutula mwana, wālombola Abalahama amba: ‘Shi mwingidi wami Hakala abutule mwana, ukekala pamo’nka bwa wami.’ Mwenda mafuku, Hakala wābutula mwana mwana-mulume. Dijina dyandi i Ishemele.

Myaka mivule pa kupita’po, papo Abalahama wādi kadi na myaka 99 Sala nandi na myaka 89, bāfikilwa na beni basatu. Abalahama wāita bano beni bakōkolokwe’ko munshi mwa mutyi ne kudya’ko byakudya. Le uyukile bano beni? Bādi bamwikeulu! Bāsapwidile Abalahama amba: ‘Mwaka wiya’ko enka mu kino kitatyi’ki, abe ne obe mukaji mukabutula mwana mwana-mulume.’ Sala wādi mu pema wibateja. Wāsepa munda mwandi ne kwineneja’mba: ‘Le bine mbwanya kubutula mwana ami muntu kendi mununu?’

Mwaka wālondele’po, Sala wābutula mwana mwana-mulume, monka mwāmulaile’kyo mwikeulu wa Yehova. Abalahama wāmwinika bu Izake, dijina dishintulula’mba “Tusepo.”

Izake paābwenye myaka isenselela ku itano, Sala wāmona Ishemele umuzawila. Pa kusaka kukinga wandi mwana, Sala wālomba Abalahama apange Hakala ne Ishemele. Dibajinji bidi, Abalahama wāpelele. Ino Yehova wālombola Abalahama amba: ‘Teja Sala. Nsa kukwatakanya Ishemele. Inoko nsa kufikidija mulao wami kupityila kudi Izake.’