Izake wādi na myaka 40 pāasongele Lebeka. Wādi usenswe Lebeka bininge. Mwenda mafuku, bābutula bana babidi—bana ba mapasa bana-balume.

Mukulu wādi Esau, nkasampe nandi Yakoba. Esau wādi usenswe kupwasakana, kadi wādi kiluwe mukatampe wa banyema. Inoko Yakoba wādi usenswe kushala ku njibo.

Mu mene mafuku’a, mwana mukulu ye wādi upebwa kipindi kikatampe kya ntanda ne lupeto shi shandi wafu. Bino byādi bītwa bu bupyani. Mu kisaka kya Izake, mu bupyani mwādi ne kubadilwa mu milao yālaile Yehova kudi Abalahama. Esau kādipo umwene na mvubu ino milao, inoko Yakoba wādi uyukile amba ino milao i ya mvubu mpata.

Difuku dimo, Esau wāile ku njibo mukōke utamba kwaādi ukapoile bya nshikije-dyuba. Waivwana luvumba luyampe lwa byakudya byādi bitēka Yakoba, wāmunena’mba: ‘Nafu nzala! Mpe’ko bwabo busuku butyila’bo!’ Yakoba wāmunena’mba: ‘Nsa kukupa, ntyipile bidi amba usa kumpa bupyani bobe.’ Esau wanena’mba: ‘Bupyani bwami kekudipo kyobunongela! Ubwanya kuyata’bo. Ami kyonsaka’tu i kudya.’ Le ulanga’mba kino kintu kyālongele Esau kyādi kya tunangu? Aa, kekyādipo kya tunangu. Esau wājimije kintu kilumbuluke bininge, pa mwanda’tu wa nsāni umo wa busuku butyite.

Izake pa kununupa bininge, kitatyi kyābwene kya kwesela wandi mwana mukulu. Ino Lebeka wākwasha Yakoba mwana nkasampe ayate dino dyese. Esau pa kuyuka’o, wāloba bininge kakimbe kwipaya wa dipasa nandi. Ba Izake ne Lebeka pa kusaka kukinga Yakoba, bāmusoñanya’mba: ‘Enda ukashikate kwa muyomba obe Lebane, kufika ne bisa kwitūkija Esau.’ Yakoba wātejeje madingi a bambutwile bandi wānyema mwanda wa kwipandija.

Yehova wālaile Yakoba amba ukamukinga monka mwaākingile ba Abalahama ne Izake. Yakoba wākashikete mu kifuko kitwa bu Halane, kwine kwaāsongele mukaji, wāikala’ko na kisaka kikatampe, ne kwikala mpeta mukatampe.

Mwenda mafuku, Yehova wāsapwidile Yakoba amba: ‘Kajokele ku yenu ntanda.’ Ebiya Yakoba ne kisaka kyandi bāshilula lwendo lulampe lwa kukajoka. Pobādi mu dishinda, bantu bamo bāile kusapwila Yakoba amba: ‘Mwanenu Esau yao wiya, kadi udi na bantu 400!’ Yakoba wāzakele amba Esau usakanga kwiya kumusanshija aye ne kisaka kyandi. Wālomba Yehova amba: ‘Nakwisāshila mpandije kudi mwanetu.’ Difuku dyālondele’po, Yakoba wātumina Esau kyabuntu kya banyema bavule, mikōko, bambuji, bañombe, bangamedia, ne bampunda.

Mu dine difuku’dya bufuku, Yakoba paādi pa bunka wāmona mwikeulu umo! Mwikeulu waānza kulwa nandi. Bālwile kufika’nka ne ku lubanga. Nansha Yakoba byobāmusanshije, aye kākōkelepo. Mwikeulu wāmunenene amba: ‘Ndeke ñende.’ Yakoba nandi amba: ‘Aa, nkikulekelelangapo, poso’nka ungesele.’

Ku mfulo, mwikeulu wāesela Yakoba. Pano Yakoba wāyukile’mba Yehova kakalekapo Esau amusanshije.

Mu lwine lubanga’lwa, Yakoba wāmona Esau dya kulampe ne bantu 400. Yakoba wāpita kumeso kwa kyandi kisaka kāevukwila ku meso a mwanabo misunsa isamba-ibidi. Esau wākatundaila Yakoba lubilo, wāmupamba bīpa. Abo bonso bubidi kebadila basūmija impolo ne kulonga ndoe. Le ulanga Yehova wēivwene namani pa muswelo wāpwijije Yakoba uno mwanda?

Kupwa, Esau wākajokela kwandi, Yakoba nandi wāenda kwandi. Yakoba wābutwile bana bana-balume 12. Majina abo i: Lubeni, Shimioni, Levi, Yuda, Dani, Nafatale, Ngade, Ashela, Isakala, Zebuluna, Yosefa, ne Benjemani. Wandi mwana umo mwana-mulume—Yosefa—Yehova wāmwingidije mwanda wa kupandija bantu Bandi. Le uyukile muswelo waāmwingidije? Tusa kwiuyuka mu kifundwa kilonda’ko.