Yosefa wādi mwana nkasampe wa Yakoba. Batutu wandi bāmwene amba, shabo usenswe Yosefa. Le ulanga bēivwene namani? Bāivwanine Yosefa mukao, bāmushikwa. Yosefa paālotele bilotwa bitulumuja, wālombwele’byo banababo. Bālanga’mba bino bilotwa bishintulula’mba difuku dimo, bakevukwilanga kudi Yosefa. Po pene bāmushikwa bininge!

Difuku dimo, banababo na Yosefa bādi balama mikōko kubwipi na kibundi kya Shekema. Yakoba wātuma Yosefa akatale mobekadile. Bāmwena Yosefa dya kulampe, kebanena abo bene na bene amba: ‘Mulotyi wa bilotwa yewa wiya. Tumwipayei!’ Bāmukwata bāmwela mu kīna kilampe. Inoko, Yuda mwanabo umo wānena’mba: ‘Kemwakimwipayai! Tumupotejei bu umpika.’ Ebiya bāpoteja Yosefa ku bibese 20 bya ndalama kudi bansunga bene Midyana bādi benda ku Edipito.

Kupwa, banababo na Yosefa bātubika kotyi wandi mu mashi a mbuji, bātumina shabo uno kotyi, kebanena’mba: ‘Le uno kotyi i wa obe mwana?’ Ponka’po Yakoba wāmona’mba nyema wa ntanda waipaya Yosefa. Yakoba wātyumukilwe mutyima. I kutupu muntu wābwenye kumusenga.

Mu Edipito, bāpoteje Yosefa bu umpika kudi mwingidi mulēme witwa bu Potifela. Inoko, Yehova wādi na Yosefa. Potifela wāmona’mba Yosefa wingilanga mwingilo wandi senene kadi i muntu ukulupilwa. Kepejije, bāpa Yosefa mwingilo wa kutala bintu byonso bya Potifela.

Mukaja Potifela wāmona’mba Yosefa wanengela ne kupuma. Wādi unena Yosefa difuku ne difuku alāle nandi. Le Yosefa wālongele’po namani? Wāpelele, wanena’mba: ‘Aa! Byabyo i bibi. Mfumwami unkulupile, kadi abe wi wandi mukaji. Shi ndāle nobe, nsa kupya mambo kudi Leza!’

Difuku dimo, mukaja Potifela wātompa kuningila Yosefa alāle nandi. Wāmukwata mu bisandi, ino Yosefa wāmunyema. Potifela pa kujokela ku njibo, wandi mukaji wāmusapwila’mba Yosefa wamutwelelanga. Uno mwana-mukaji wābepele bubela. Potifela wāloba bininge, wāela Yosefa mu kifungo. Inoko, Yehova kāidilwepo Yosefa.

Yosefa paādi mu kifungo, Felo, mulopwe wa Edipito, wālotele bilotwa byākomenwe kushintulula muntu nansha umo. Mwingidi wa Felo umo wāmulombola’mba, Yosefa ubwanya kukushintulwila bilotwa byobe. Bukidi bonka, Felo wāityija Yosefa.

Felo wāmwipangula’mba: ‘Le ubwanya kushintulula bilotwa byami?’ Yosefa wāmulondolola’mba: ‘Mu Edipito musa kwikala byakudya bingi mu myaka isamba-ibidi, kupwa, kukalonda myaka isamba-ibidi ya nzala. Tonga’ko muntu wa tunangu wa kukongakanya byakudya, kutyina bantu bobe bakafwa nzala.’ Felo wānena’mba: ‘Nakutonge’nka abe’ye! Ukekala muntu wa bubidi wa lupusa lukatampe mu Edipito!’ Le Yosefa wābwenye namani kushintulula bilotwa bya Felo? Yehova wākweshe Yosefa.

Mu bula bwa myaka isamba-ibidi, Yosefa wākongakenye byakudya mu bibīko. Penepo kwaikala nzala pa ntanda yonso, monka mwānenene’kyo Yosefa. Bantu bādi batamba koku ne koku, mwanda wa kwiya kupota byakudya kudi Yosefa. Yakoba, shandya Yosefa, wāivwene amba mu Edipito mudi byakudya, wātuma bandi bana dikumi bana-balume bakapote’ko byakudya.

Bana ba Yakoba bāendele kudi Yosefa, mwine wēbayukile bukidibukidi. Inoko banababo na Yosefa kebāmuyukilepo amba i Yosefa. Kēbevukwila kwadi, monka mwaālotele paādi ukidi nkasampe. Yosefa wāsakile bidi kuyuka shi banababo bakidi na mushikwa. Ebiya wēbanena’mba: ‘Banwe’bo mwi batubedibedi. Mukimbanga kuyuka mutamba muzoze wa yetu ntanda.’ Nabo banena’mba: ‘Mhm! Batwe twi bana 12 ba mu Kenani. Mwanetu umo ke mufwe, mukala nandi ushele na tata.’ Ebiya Yosefa wēbanena’mba: ‘Nkanselelei mwanenu mukala nabya ngitabije byomwanena’byo.’ Penepo bākajokela kudi shabo.

Byakudya bya kisaka pobyāpwile, Yakoba wātuma monka bandi bana ku Edipito. Pano abasela ne mukala wabo Benjemani. Yosefa pa kusaka kutompa banababo, wāela kitomeno kyandi kya ndalama mu mufuko wa byakudya wa Benjemani, mwanda wa kulambika banababo amba abaibe kitomeno. Bengidi ba Yosefa pa kutana kitomeno mu mufuko wa Benjemani, banababo bāfītwa. Bālomba Yosefa ebape mfuto pa kyaba kya Benjemani.

Pano Yosefa wayuka’mba banababo ke bashinte. Yosefa kābwenyepo monka kwikankamika’ko. Wāsaba kiyoa kadila’mba: ‘I ami Yosefa mwanenu. Le tata ukidi mūmi?’ Banababo batulumuka bininge. Wēbasapwila’mba: ‘Kemwakītopekai pa mwanda wa byomwāunongele. I Leza wantumine kuno mwanda wa kupandija būmi bwenu. Endai bukidi mukasele tata mwiye nandi.’

Bāenda kwabo kukasapwila shabo ino myanda miyampe ne kumuselela ku Edipito. Pa kupwa kwishiya mu bula bwa myaka mivule, pano Yosefa ne shandi abetana monka.