Mosesa wāikele myaka 40 mu Midyana. Wāsongele’mo mukaji wābutula ne bana. Difuku dimo paādi ukumba mikōko kubwipi na Lūlu lwa Shinai, wāmona kintu kitulumukwa. Kimuna kitēma mudilo, inoko kutupu kulota! Mosesa pa kufwena amone biyampe, wāivwana diwi ditamba mu kimuna kedinena’mba: ‘Mosesa! Kokifwena kubwipi. Vūla bikwabilo byobe mwanda wimene pa nshi ijila.’ I Yehova wādi wisamba kupityila kudi mwikeulu.

Mosesa wākwetwe moyo, wēfya mpala yandi. Diwi kedinena’mba: ‘Namone masusu a bene Isalela. Nsa kwibanyongolola ku bene Edipito ne kwibatwala mu ntanda miyampe. Abe ye ukebalupula mu Edipito.’ Kumwenepo amba uno mwanda ye uno wātulumwije Mosesa?

Mosesa wāipangula’mba: ‘Le nkanena namani shi bantu abangipangula mwine wantuma?’ Leza wālondolola’mba: ‘Wibasapwile’mba Yehova, Leza wa Abalahama, Leza wa Izake, ne Leza wa Yakoba ye wakutuma.’ Penepo Mosesa wānena’mba: ‘Le bikekala namani shi bantu abapele kunteja?’ Yehova wāpa Mosesa bukamoni bulombola’mba usa kumukwasha. Wāsoñanya Mosesa ele mukombo wandi panshi. Kupwa, mukombo wāalamuka ke nyoka! Mosesa pa kukwata uno nyoka ku muzenze, wāalamuka ke mukombo monka. Yehova wānena’mba: ‘Posa kukalonga kino kiyukeno, kikalombola’mba i ami wakutuma.’

Mosesa wānena’mba: ‘Nkisambangapo biyampe.’ Yehova wāmulaya’mba: ‘Nkakulombola bya kunena, kadi nsa kutuma mwanenu Alone akukwashe.’ Mosesa pa kuyuka’mba Yehova udi nandi, wāsela wandi mukaji ne bana kebenda ku Edipito.

Bene Isalela bādi bengidijibwa mingilo ya ku bukomo bu bapika. Yehova wātumine ba Mosesa ne Alone bakasapwile Felo amba: ‘Leka bantu bami bende bakantōte mu ntanda mutuputupu.’ Felo wālondolola na kibengo amba: ‘Nkisapo kulonda byabyo byanena Yehova, nkisapo kuleka bene Isalela bende.’ Po pene Felo wēbabweja’ko ne mingilo mikwabo. Yehova kudi kyaādi usaka kufundija Felo. Muswelo’ka? Wāletele Mpupo Dikumi pa Edipito. Yehova wāsapwidile Mosesa amba: ‘Felo kantejejepo. Lubanga, Felo usa kwikala ku Munonga wa Nile. Enda ukamulombole’mba byaapela kuleka bantu bami bende, mema onso a Nile asa kwalamuka ke mashi.’ Mosesa wākōkela wāenda kudi Felo. Felo wādi umwene pākupile Alone mukombo mu Nile, munonga wāalamuka ke mashi. Munonga wāshilula kununka bibi, mwita wāfwa, kadi kekwāshelepo mema mayampe a kutoma mu Nile. Nansha nankyo, Felo wāpelele kuleka bene Isalela bende.

Mafuku asamba-abidi pa kupita’po, Yehova wātuma monka Mosesa akasapwile Felo amba: ‘Shi kulekelepo bantu bami bende, Edipito usa kuyula byula.’ Alone wāolola mukombo wandi, byula byāanza kuyula pa ntanda. Bantu bādi batana byula mu mobo abo, pa matanda abo, ne mu bisuku. Konsokonso kwādi’nka byula! Felo wānena Mosesa alombe Yehova atalule kino kipupo. Felo walaa’mba usa kuleka bene Isalela bende. Ebiya Yehova wātalula kino kipupo, bene Edipito babunga byula milwi ne milwi. Ntanda yāshilula kununka luvumba lubi. Inoko, ne pano pene, Felo wapele kuleka bantu bende.

Kupwa Yehova wālombola Mosesa amba: ‘Alone akupile mukombo wandi panshi, luvumbi lwalamuke ke tumwe.’ Ponka’pa kwāikala tumwe tungi. Bengidi bamo ba Felo bamulombola’mba: ‘Kino kipupo kitamba kudi Leza.’ Inoko ne pano pene, Felo wāpela kuleka bene Isalela bende.