Ba Mosesa ne Alone bāendele kukalombola Felo byēbasapwidile Leza amba: ‘Shi kulekelepo bantu bami bende, nsa kutuma mpekepeke pa ntanda.’ Bibumbo bya mpekepeke byātwela mu mobo a bene Edipito, bampeta ne balanda. Ntanda yonso yāyudile mpekepeke. Inoko mu ntanda ya Ngoshena mwādi mushikata bene Isalela, keyādi’mopo. Kushilwila pa kino kipupo kya buná, mpupo yonso yādi keitenga’nka bene Edipito. Felo wālomba amba: ‘Zenza Yehova etutalule ino mpekepeke. Bantu bobe bende.’ Inoko Yehova pa kutalula mpekepeke, Felo wāshinta. Le ne pano Felo kefundile’ko kintu?

Yehova wānena’mba: ‘Shi Felo wapele kuleka bantu bami bende, banyema ba bene Edipito basa kubela ne kufwa.’ Difuku dyālondele’po, banyema bāshilula kufwa. Inoko banyema ba bene Isalela kebāfwilepo. Ne pano pene Felo ukyūmije’nka mutyima, kutupu kwibaleka bende.

upwa, Yehova wāsapwila Mosesa akajokele kudi Felo, ne kusela buto ele’bo mu luvula. Buto bwāikala ke luvumbi luyule mu luvula, lwāzambalala pa Edipito ponso. Luno luvumbi lwāmeneje bene Edipito bonso ne banyema babo bipote bisansa. Ne pano pene, Felo wāpelele kuleka bene Isalela bende.

Yehova wātuma monka Mosesa akasapwile Felo amba: ‘Le ukipelele ne pano kutuma bantu bami bende? Kesha kusa kunoka mvula wa mabwe pa ino ntanda.’ Difuku dyālondele’po, Yehova wātuma mvula wa mabwe, mikungulo, ne mudilo. Kyādi kivula kibi bininge kekyalongekele kashā mu Edipito. Mityi yonso ne bikunanwa byāoneka, inoko kekyāpukuminepo mu Ngoshena. Felo wānena’mba: ‘Lomba Yehova emike kino kivula! Ebiya ke mwenda.’ Inoko aye’tu mvula wa mabwe uketeka, Felo wāshinta.

Kupwa Mosesa wānena’mba: ‘Pano njie isa kudya munamuna yonso yashele ku mvula wa mabwe.’ Njie mivulevule yādya bintu byonso byāshele mu madimi ne ku mityi. Felo wālomba amba: ‘Zenza Yehova atalule ino njie.’ Inoko nansha Yehova byaātalwile ino njie, Felo wāumije mutyima monka.

Yehova wāsapwila Mosesa amba: ‘Olola kuboko kobe mūlu.’ Ponka na ponka, kwāikala mfindi fututu. Mu bula bwa mafuku asatu, bene Edipito kebādipo bamona kintu nansha kimo nansha bantu. Enka bene Isalela kete ye bādi na kitōkeji mu mobo abo.

Felo wānena Mosesa amba: ‘Endai, abe ne bantu bobe. Inoko shiyai banyema benu muno.’ Mosesa wānena’mba: ‘Tufwaninwe kwenda na betu banyema mwanda wa kukalambula Leza wetu byamulambu.’ Felo wālobele bininge. Wāela lubila’mba: ‘Ntaluke mu meso! Shi nkumone monka, nsa kukwipaya.’

Mosesa wālaile Felo amba kakyendapo kukamumona monka. Inoko kumeso kwa kutaluka, wāsapwidile Felo amba: ‘Pa bukata bwa bufuku, bana babajinji bonso ba bene Edipito basa kufwa, kushilwila ku mwanā Felo kutūla ne ku bana ba bapika.’

Yehova wāsapwidile bene Isalela badye bidibwa bya pa bula. Wēbanenene’mba: ‘Ipayai mukōko mulume nansha mbuji mulume wa mwaka umo, mushinge mashi amo pa kibelo. Oshai mwita, mudye’o na mikate yampikwa kiyujo. Vwalai bisandi, ne bikwabilo, mwikale beteakanye mwa kwendela. Mu buno bufuku’bu nsa kwimunyongolola.’ Langa’po mwāsangedile bene Isalela!

Pa bukata bwa bufuku, mwikeulu umo wa Yehova wāpita ku njibo yonso ya mu Edipito. Ku mobo kwādi kwampikwa kutūla kayukeno ka mashi pa kibelo, kwādi kufwa mwana mubajinji. Inoko mwikeulu wātabukile mobo ādi’po kayukeno ka mashi. Kisaka kyonso kya bene Edipito, kya bampeta ne kya balanda, kyāfwidilwe mwana. Inoko kekwāfwilepo mwana nansha umo mwine Isalela.

Enka ne mwanā Felo mwine wāfwile. Felo kākankejepo monka bene Isalela. Bukidi bonka wāsapwila ba Mosesa ne Alone amba: ‘Talukai. Tambai muno. Endai mukatōte Leza wenu. Selai ne banyema benu mwende!’

Bene Isalela bātambile mu Edipito kitatyi kikalanga kweji ke mutuntulu, balongololwe mungya bisaka. Bādi bana-balume 600 000 ne bana-bakaji bavule ne bana. Kadi, kwādi ne bantu bakwabo bavule bāendele na bene Isalela mwanda wa nabo bakatōte Yehova. Mfulo mfulō bene Isalela bānyongololwa!

Pa kusaka kuvuluka mwēbanyongolwedile Yehova, bādi ba kudya bino bidibwa bya pa bula mwaka ne mwaka. Bino bidibwa byādi bitwa bu Pashika.