Yehova wāsapwidile Mosesa amba: ‘Kandila kuno ku lūlu kondi. Nsa kulemba bijila byami pa bipāpo bya mabwe ne kukupa’byo.’ Mosesa wākanda pa lūlu wāikala’po mafuku 40 dyuba ne bufuku. Paādi pa lūlu, Yehova wālembele Mbila Dikumi pa bipāpo bibidi bya mabwe wāpa’byo Mosesa.

Kitatyi pa kupita’po, bene Isalela bāla- nga’mba Mosesa wēbanyema. Bālombola Alone amba: ‘Tusaka wa kwitwendeja. Witulongele leza!’ Alone wēbanena’mba: ‘Letai olo yenu.’ Wāsungulula ino olo wāpunga nayo nkishi wa kyana kya ñombe. Bantu kebānena’mba: ‘Kino kyana kya ñombe ye Leza wetutambije mu Edipito!’ Bāshilula kutōta kyana kya ñombe kya olo, ne kwikisobela masobo. Le bālongele bibi? En-en, mwanda bano bantu bālaile amba bakatōta’nka Yehova kete. Inoko pano abatunya kulonga byobālaile.

Yehova wāmwene byobādi balonga, wāsapwila Mosesa amba: ‘Tūkila kudi bantu. Abatunya kunkōkela kebatōta leza wa bubela.’ Mosesa wātūka ku lūlu, uselele bipāpo bibidi.

Mosesa pa kufwena kubwipi na nkambi, wāivwana bantu bemba. Kupwa wēbamona bajīla kyana kya ñombe ne kwikifukatyila. Mosesa wāloba bininge. Wāela bipāpo bibidi bya mabwe panshi, byāladika tubesetubese. Wāonakanya ponka na ponka nkishi’wa. Kupwa wāipangula Alone amba: ‘Le bano bantu abakunekenyanga’tu namani ulonge kino kintu kibi mpata?’ Alone wānena’mba: ‘Kokiloba. Uyukile kala mwikadile bano bantu. Badi abasake leza, nami naela olo yabo mu mudilo kubatambe kino kyana kya ñombe!’ Alone kādipo ufwaninwe kulonga kino kintu. Mosesa wākajokela monka ku lūlu mwanda wa kuzenza Yehova afwile bano bantu lusa.

Yehova wāfwidile lusa boba bāitabije kumukōkela. Le ubamone mwanda waka byādi na mvubu bene Isalela balonde bwendeji bwa Mosesa?

Mosesa paādi pa Lūlu lwa Shinai, Yehova wāmusapwidile ōbake pema wa pa bula, witwa bu kipema, mwine mwādi mwa kumutōtela bene Isalela. Kino kipema kyādi kibwanya kuselwa ne kwenda nakyo.

Yehova wāsoñenye Mosesa amba: ‘Nena bantu balete byobadi nabyo mwanda wa kukwasha ku lūbako lwa kipema.’ Bene Isalela bāletele olo, ndalama, mukuba, mabwe malēme, ne bidyangulwa. Bāleta ne myoya, bukonge, biseba bya banyema, ne bintu bikwabo bivule. Bāletele bintu bivule bininge byālengeja ne Mosesa ebalombole amba: ‘Bibabwana! Kemukiletai bintu bikwabo.’

Bana-balume ne bana-bakaji bavule ba bwino bākweshe ku kūbaka kino kipema. Yehova wēbapele tunangu twa kwingila uno mwingilo. Bamo bādi bajinga nyushi, basuka mbwija, nansha kwiitungula. Bakwabo bādi basōnga mabwe, bengila na olo, ne kusōnga mityi.

Bantu bāubakile kipema monka mwēbasoñaninye Yehova. Bālongele mpashila miyampe bininge ya kwabanya nayo kipema mu bipindi bibidi, Kijila ne Kijila Nakampata. Mu Kijila Nakampata mwādi sanduku wa kipwano, mupungwe na mutyi wa akashia ne olo. Mu Kijila mwādi kitūlwa-binanu kya olo, meza, ne kisōkelo pa kusōkela ensense. Mu kipango mwādi kyoilo kya mukuba ne kisōkelo kikatampe. Sanduku wa kipwano wādi uvuluja bene Isalela mulao obālaile Yehova wa kumukōkela. Le uyukile kipwano? I mulao wa pa bula.

Yehova wātongele Alone ne bandi bana bengile bu babitobo ku kipema. Bādi bafwaninwe kukwatakanya kipema ne kulambula byamulambu kudi Yehova. Alone kete, kitobo mukatampe, ye wādi na lupusa lwa kutwela mu Kijila Nakampata. Wādi utwela’mo dimo pa mwaka kukela kitapwa pa mwanda wa bubi bwandi, bubi bwa kyandi kisaka, ne bubi bwa muzo onso wa Isalela.

Bene Isalela bāpwile kūbaka kipema mwaka umo na pobātambile mu Edipito. Pano abaikala na kifuko mwa kutōtela Yehova.

Yehova wāyujije ntumbo yandi mu kipema wātūla ne dikumbi pangala pa kipema. Kitatyi kyonso kyādi kimene dikumbi pangala pa kipema, bene Isalela bādi bekala ponka. Inoko kitatyi kyādi kitaluka dikumbi, bādi bayuka’mba ke kitatyi kya kutaluka kwenda. Bādi bafwaninwe kusela kipema kebalonda dikumbi.