Bene Isalela bātalukile ku Lūlu lwa Shinai bāpita mu ntanda mutuputupu ya Palana bāenda ku kifuko kitwa bu Kadesha. Kwine’kwa, Yehova wāsapwila Mosesa amba: ‘Tuma bana-balume 12, ku kisaka ne kisaka muntu umo, bakabele nansha’mba bakatale ntanda ya Kenani, yonsa kupa bene Isalela.’ Penepo Mosesa wātonga bana-balume 12, wēbalombola’mba: ‘Endai ku Kenani, mukatale shi ino ntanda idi na nshi miyampe ya byakudya. Mutale ne bantu shi i bazoze nansha bakomo ne shi bashikete mu mapema nansha mu bibundi.’ Kupwa, bano batubedibedi 12 bāenda ku Kenani, mu bano batubedibedi mwādi ne ba Yoshua ne Kalebu.

Pa kupwa kwa mafuku 40, batubedibedi bājoka, bāiya na bipa bya bikuyu, mangelenade, ne mañanza. Batubedibedi bāletele musapu amba: ‘I ntanda miyampe, inoko bantu badi’mo i bakomo kadi mumbu ya bibundi i milampe.’ Ebiya Kalebu wānena’mba: ‘Tubwanya kwibashinda. Batwe twendei’tu!’ Uyukile mwanda waka Kalebu wānenene namino? I mwanda aye ne Yoshua bādi bakulupile Yehova. Ino batubedibedi bakwabo dikumi bānena’mba: ‘Aa! Bantu badi’mo i bakata kadi balampe, pamo bwa batumpangala! Twamwekele’nka bwa batēte kobadi.’

Bene Isalela bātyumukilwe mutyima. Bāanza kwitompwela abo bene amba: ‘Tutongei mwendeji mukwabo etujokejeje ku Edipito. I kika le kine kyotwendela’ko baketwipaye?’ Ba Yoshua ne Kalebu bānena’mba: ‘Lekai kutombokela Yehova, kadi kemwakikwatwai moyo. Yehova usa kwitukinga.’ Ino bene Isalela kebēbatejejepo. Bāsakile’nka ne kwipaya ba Yoshua ne Kalebu!

Le Yehova wālongele’po namani? Wālombwele Mosesa amba: ‘Bene Isalela bakipela kunkōkela, nansha byonebalongela bintu bivule uno muswelo. Basa kushala mu ntanda mutuputupu myaka 40, enka ne byobafwa. Enka babo bana ne ba Yoshua ne Kalebu kete bo bakatwela mu ntanda yonalaile kwibapa.’

Kitatyi pa kupita’po, papo bene Isalela bakidi mu ntanda mutuputupu, ba Kola, Datani, ne bantu bakwabo 250 bātombokela Mosesa. Bāmulombola’mba: ‘Banwe’bo mubetukōkeja! Mwanda waka ubetūla abe bu mwendeji wetu, Alone nandi bu kitobo mukatampe? Yehova udi netu batwe bonso, kadipo’nka na abe ne Alone kete.’ Bino kebyāsangejepo Yehova. Mungya Yehova, bāmutombokēle!

Mosesa wāsapwila Kola ne boba bādi bamwitabīle amba: ‘Kesha mufwaninwe kwiya ku kipema, muselai ne bininga byenu bya mudilo biyule ensense. Yehova usa kwitulombola i ani watongele.’

Difuku dyālondele’po, Kola ne bantu 250 bāketana na Mosesa ku kipema. Kwine’kwa, bāsōka ensense pamo bwa abo babitobo. Yehova wāsapwila Mosesa ne Alone amba: ‘Sansanai na Kola ne bantu bandi.’

Nansha Kola byawāendele ku kipema kudi Mosesa, inoko ba Datani, Abilama, ne bisaka byabo bāpelele kwenda’ko. Yehova wāsapwila bene Isalela basonsolokele kulampe na mapema a ba Kola, Datani, ne Abilama. Ponka na ponka, bene Isalela bāsonsoloka’ko. Ba Datani, Abilama, ne bisaka byabo bāimana panja pa mapema abo. Nshi yāladika mu kitulumukila, yēbamina! Ku kipema nako, kwāaka mudilo wāsōka Kola ne bandi bantu 250.

Yehova wāsapwidile Mosesa amba: ‘Yata mukombo wa mwendeji wa kisaka ne kisaka, ulembe’po dijina dyandi. Inoko pa mukombo wa kisaka kya Levi, lemba’po dijina dya Alone. Utūle’yo mu kipema, mukombo wa muntu onsa kutonga, usa kumena maluba.’

Difuku dyālondele’po, Mosesa wālupula mikombo yonso wālombola’yo bendeji. Mukombo wa Alone wādi mumene maluba ne kupa bipa bya alemonde byele. Mu uno muswelo, Yehova wālombwele’mba watonge Alone ekale kitobo mukatampe.