Batubedibedi bene Isalela pobāendele ku kibundi kya Yediko, bāfikīle ku njibo ya mwana-mukaji umo witwa bu Lehaba. Mulopwe wa Yediko pa kuyuka uno mwanda, wātuma basola ku njibo ya Lehaba. Lehaba wāfile bano batubedibedi babidi mu musaka ne kwendeja basola mutamba ungi. Wāsapwidile batubedibedi amba: ‘Nsa kwimukwasha mwanda ndyukile’mba Yehova udi ku wenu mutamba ne amba musa kukwata ino ntanda. Nemwisāshila, ndaei amba musa kumpandija ami ne kisaka kyetu.’

Batubedibedi bāsapwila Lehaba amba: ‘Tubakulaa amba i kutupu muntu nansha umo wa mu njibo yobe otukasanshija.’ Bāmulombola’mba: ‘Kuta monji utyila pa dyobe dididisha, nabya kisaka kyobe kikapanda.’

Lehaba wātūkijije batubedibedi pa dyandi dididisha na monji. Bāenda ku ngulu kukafyama’ko mafuku asatu kumeso kwa kukajokela kudi Yoshua. Kupwa bene Isalela bāabuka Munonga wa Yodano, kebeteakanya mwa kukwatyila ntanda. Yediko kyo kyādi kibundi kyabo kibajinji kukwata. Yehova wēbasapwidile bajokoloke kino kibundi musunsa umo ku difuku mu bula bwa mafuku asamba. Mu difuku dya busamba-bubidi, bājokolokele kino kibundi misunsa isamba-ibidi. Kupwa babitobo bāvumija bimpungidi, basola nabo bātūta kyungwe kikatampe. Mumbu ya kibundi yāpona panshi kakangabanga! Inoko njibo ya Lehaba, mine yādi ilamete ku lubumbu, yāshele imene. Lehaba ne kisaka kyabo bāpandile mwanda Lehaba wākulupile mudi Yehova.

Myanda ya Yediko ibazambalala ne ku mizo mikwabo ya mu Kenani. Balopwe ba ino mizo, abasake kwiitabila bakalwe na bene Isalela. Inoko bene Ngibeone abo bākwete’ko mulangwe mwishile. Bāvwele bisandi bisasamuke, bāenda kudi Yoshua kebanena’mba: ‘Tutambanga ku ntanda ya kulampe. Twaivwene myanda ya Yehova ne byonso byaemulongēle mu Edipito ne mu Moabu. Mwitutyipilei amba kemuketutambepo divita, kadi tukekala bengidi benu.’

Yoshua wēbakulupile wāitabija’mba kakebatambepo divita. Mafuku asatu pa kupita’po, Yoshua wāyuka’mba kebatambilepo ku ntanda ya kulampe. I batambe mu ntanda ya Kenani. Yoshua wāipangula bene Ngibeone amba: ‘Mwanda waka mwetubepele?’ Nabo bālondolola’mba: ‘Twakwetwe moyo! Tuyukile amba Yehova Leza wenu wimulwilanga. Bine, kemwaketwipayai.’ Yoshua wālamine mulao wāebalaile, wāleka kwibepaya.

Mafuku pa kupita’po, balopwe batano bene Kenani ne bibumbo byabo bya divita bāzakaja bene Ngibeone. Yoshua ne kibumbo kyandi kya divita bāendele bufuku bonso butuntulu mwanda wa kukakūla bene Ngibeone. Lubanga na futwi bāshilula kulwa divita. Bene Kenani bāanza kunyemena ku mitamba yonso. Konso kobādi banyemena, Yehova wēbanokejeje’ko mabwe a mvula. Kupwa, Yoshua wālomba Yehova emike dyuba. Mwanda waka wālombele Yehova emike dyuba, adyo dintu dyādi kedyaimene difuku nansha dimo? I mwanda Yoshua wādi ukulupile Yehova. Dyuba kēdyashetukilepo mu bula bwa difuku dituntulu, kufika’nka ne byobānekenye balopwe bene Kenani ne bibumbo byabo bya divita kudi bene Isalela.