Yoshua pa kupwa kwendeja bantu ba Yehova mu myaka mivule, wāfwile na myaka 110. Ponso paādi mūmi, bene Isalela bādi batōta Yehova. Inoko Yoshua pa kufwa, bāshilula kutōta bilezaleza pamo bwa bene Kenani. Bene Isalela byōkebaendelelepo kulonda Yehova, Yehova wālekele mulopwe mwine Kenani witwa bu Yabine ebasusule. Bantu bāzenzele Yehova ebakwashe. Penepo Yehova wēbapa Balaka, mwendeji mupya. Wākweshe bantu bajokele kudi Yehova.

Debola, mupolofeto mukaji, wātumine musapu kudi Balaka. Debola wādi na musapu wa Balaka utamba kudi Yehova wa amba: ‘Sela bana-balume 10 000, wende ukasambakane kibumbo kya divita kya Yabine ku kamunonga ka Kishone. Ku kano kamunonga usa kunekenya’ko Shisela, mukatampe wa kibumbo kya divita kya Yabine.’ Balaka wāsapwila Debola amba: ‘Nsa kwenda’ko, inoko poso’nka wende nami.’ Debola nandi amba: ‘Nsa kwenda nobe. Ino yuka’mba ke abepo usa kwipaya Shisela. Yehova wanena’mba, i mwana-mukaji umo usa kumwipaya.’

Debola wākanda na Balaka ne kibumbo kyandi kya divita ku lūlu lwa Tabola kwiteakanya mwanda wa kukalwa. Shisela pa kwivwana uno mwanda, wākongakanya makalo andi a divita ne basola munshi mwa musanza. Debola wāsapwila Balaka amba: ‘Dyalelo dyo difuku disa kukupa Yehova bushindañani.’ Balaka ne bana-balume bandi 10 000 bātūka ku lūlu kukasambakana kibumbo kikomokomo kya divita kya Shisela.

Penepo, Yehova wālengeja kamunonga ka Kishone kayule mema. Makalo a divita a Shisela ejīka mu ntoto. Shisela wāshiya dikalo dyandi waanza kunyema. Balaka ne basola bandi bānekenye kibumbo kya divita kya Shisela, inoko Shisela mwine wānyema! Wānyemēne kulampe wākefya mu pema wa mwana-mukaji umo witwa bu Yaile. Yaile wāmupa mabele a kutoma, kupwa wāmupūta bulangetyi. Uno wa bulwi wādi mukōke wāpona mu tulo. Ebiya Yaile wākalabila bityebitye kwadi, wāmupopa kikomo kya pema ku mutwe. Wāfwa.

Balaka wāiya kukimba Shisela. Yaile wātamba panja pa pema wandi, wamwita amba: ‘Twela muno. Nsa kukulombola muntu okimba’ye.’ Balaka pa kutwela wāmona Shisela ulēle mufwe. Balaka ne Debola bātendele Yehova mu lwimbo pa kupa kwaāpele bene Isalela bushindañani pa balwana nabo. Mu myaka 40 yālondele’po, Isalela wādi mu ndoe.

Pokwāikele kipupo kya nzala mu Isalela, mwine Isalela umo witwa bu Naomi wāvilukīle mu ntanda ya Moabu, na wandi mulume ne babo bana babidi bana-balume. Mwenda mafuku, mulumya Naomi wāfwa. Bandi bana bāsongele bana-bakaji bene Moabu, ba Luta ne Olepa. Kya bulanda, mwenda mafuku, bana ba Naomi nabo bāfwa.

Naomi pa kwivwana’mba kipupo kya nzala kibapu mu Isalela, wātongele kujokela kwabo. Ba Luta ne Olepa bāendele nandi, inoko pobādi mu dishinda, Naomi wēbasapwila’mba: ‘Mwadi bakaji bayampe ba bami bana kadi mwi bako bami bayampe.’ Nsaka banwe bonso bemusonge monka. Jokelai ku Moabu.’ Bano bana-bakaji bāmunena’mba: ‘Tukusenswe! Ketusakepo kukushiya.’ Naomi wēbaningila’nka kwibaningila bakajoke. Ku mfulo, Olepa wākajoka, inoko Luta wāshala. Naomi wāsapwila Luta amba: ‘Olepa yewa wakajokela ku bandi bantu ne ku bandi baleza. Enda nandi ne kujokela ku njibo ya inobe.’ Inoko Luta wānena’mba: ‘Ami nkikakushiyepo. Bobe bantu bakekalanga bami bantu, kadi Leza obe ukekalanga Leza wami.’ Le Naomi ye uno wēivwene namani pāmunenene Luta namino?

Ba Luta ne Naomi bāfikile mu Isalela ku ngalwilo kwa mwangulo wa mebele a buluba. Difuku dimo, Luta wāenda kukaboya miseke mu budimi bwa mwana-mulume umo witwa bu Boaza, mwanā Lehaba. Boaza wāivwana’mba Luta i mwana-mukaji mwine Moabu walamete Naomi. Boaza wāsapwila bengidi bandi bashiye’mo ne miseke mikwabo mwanda wa Luta aboye’yo.

Kyolwa, Naomi wāipangula Luta amba: ‘I mu budimi bwa ani mowakengilanga dyalelo?’ Luta wālondolola’mba: ‘I mu budimi bwa mwana-mulume umo witwa bu Boaza.’ Naomi wamusapwila’mba: ‘Boaza ubutulwanga na wami mulume. Endelela kwingila’nka mu bwandi budimi na bansongwakaji bakwabo. Kwako usa kwikala mukingwe.’

Luta wāendelele kwingila mu budimi bwa Boaza enka ne byāpwile mwangulo. Boaza wājingulula’mba Luta wingilanga bininge kadi i mwana-mukaji mulumbuluke. Mu kine kitatyi’kya, shi mwana-mulume wafu pampikwa kubutula bana, muntu obabutulwa nandi wādi usonga mukaji waashiya. O mwanda Boaza wāsongele Luta. Bābutwile mwana mwana-mulume bamwinika bu Obeda, mwine wāikele mwenda mafuku bu nkambo wandya Mulopwe Davida. Balunda ba Naomi bāsangele. Bānena’mba: ‘Dibajinji, Yehova wakupele Luta, mwine ukusenswe bininge, pano kadi ubaikala na munkana. Yehova atendelwe.’