Mulopwe Mubajinji wa Isalela

Yehova wāpele bene Isalela batyibi ba kwibendeja, inoko abo bāsaka mulopwe. Bāsapwidile Samwele amba: ‘Mizo yonso itujokolokele idi na balopwe. Netu tusaka mulopwe.’ Samwele wāmwene amba i bibi, o mwanda wālombwele Yehova uno mwanda mu milombelo. Yehova wālombola Samwele amba: ‘Bantu kebakupelelepo abe. I ami obapela. Wibasapwile’mba basa kwikala na mulopwe, inoko yao mulopwe usa kwibalomba bintu bivule.’ Nansha byobēbasapwidile nabya, bantu bānenene amba: ‘Kepadi mwanda. Batwe otusaka i mulopwe!’

Yehova wāsapwidile Samwele amba mwana-mulume umo witwa bu Solo ye usa kwikala mulopwe mubajinji. Solo paākemwine Samwele ku Lama, Samwele wāshinga Solo māni bu mulopwe na kumupungulwila māni pa mutwe wandi.

Kupwa, Samwele wākongakenya pamo bene Isalela mwanda wa kwibalombola mulopwe wabo mupya. Inoko kebāmwenepo Solo. Uyukile i mwanda waka? I mwanda Solo wāfyeme mu bivwe. Pobāsokwele Solo, bāiya nandi bāmwimika mu bukata bwa bantu. Solo wādi mulampe bininge kupita bantu bonso kadi wādi muyampe mpala bininge. Samwele wānena’mba: ‘Uno ye muntu obatonga kudi Yehova.’ Bantu bātūta kyungwe amba: ‘Mulopwe ufwa bununu!’

Ku ngalwilo, Solo wādi uteja Samwele kadi wādi ukōkela Yehova. Inoko wāshintyile. Kimfwa, mulopwe kādipo unenwe kulambula bitapwa. Difuku dimo, Samwele wālombwele Solo amwilaije’nka ne byafika, ino Samwele wāijije. Penepo Solo wātonga kulambula bitapwa aye mwine. Le Samwele wālongele’po namani? Wālombwele Solo amba: ‘Kwadipo ufwaninwe kutombokela Yehova.’ Le Solo wēfundile kintu kampanda pa uno mwanda?

Mwenda mafuku, Solo paākalwile na bene Amaleke, Samwele wālombwele Solo epaye bantu bonso pampikwa kushiya’ko nansha umo mūmi. Inoko Solo wāleka kwipaya Mulopwe Akaka. Yehova wāsapwila Samwele amba: ‘Solo waungela, kadi kantejejepo.’ Samwele wāfītyilwe bininge, wāsapwila Solo amba: ‘Byowapela kukōkela Yehova, nandi usa kutonga mulopwe mukwabo.’ Samwele pa kwalamuka kaenda, Solo wāmukwata ku milomo ya kotyi, kotyi wāsanika. Penepo Samwele wāsapwila Solo amba: ‘Yehova wāsana bulopwe bobe.’ Yehova usa kupāna bulopwe ku muntu ungi umusenswe kadi umukōkele.