Yehova wāsapwidile Samwele amba: ‘Enda ku njibo ya Yese. Wandi mwana umo, ye ukapingakena mulopwe wa Isalela.’ Penepa Samwele wāenda ku njibo ya Yese. Samwele pa kumona mwana mukulu, kāeneneja’mba: ‘Uno nsongwalume, ye aye.’ Inoko Yehova wāsapwila Samwele amba ke ayepo. Yehova wānena’mba: ‘Ami monanga bidi mu mutyima wa muntu, ke mumwekelopo wa panja.’

Yese wāletela Samwele bandi bana bakwabo basamba. Ino Samwele wānena’mba: ‘Yehova katongelepo’po nansha umo. Le kudipo na bana bakwabo bana-balume?’ Yese wālondolola’mba: ‘Kubashala umo, Davida, nkasampe ku bonso. Ulamanga mikōko yami.’ Davida pa kutwela, Yehova wāsapwila Samwele amba: ‘Yao ye aye!’ Samwele wāpungulwila Davida māni pa mutwe, wāmushinga māni bu mulopwe wa kukabikala pa Isalela.

Kitatyi pa kupita’po, bene Isalela bākalwile divita na bene Fidishitia, bene bādi na kampangala wa bulwi wa kwibalwila wa dijina dya bu Ngodiata. Ngodiata wādi uzawila bene Isalela difuku ne difuku. Wādi wela mabila’mba: ‘Tumai muntu wa kulwa nami. Shi waunekenya, tukekala bapika benu. Inoko shi namunekenya, nenu mukekala bapika betu.’

Difuku dimo, Davida wāendele kukapa banababo basola byakudya ku nkambi ya kibumbo kya divita kya bene Isalela. Aye pa kwivwana Ngodiata, Davida wānena’mba: ‘Ami nsa kukalwa nandi!’ Mulopwe Solo wāmunena’mba: ‘Inoko ukidi’tu mwanuke.’ Davida nandi amba: ‘Yehova usa kunkwasha.’

Solo wātompele kuvwika Davida byandi bya bulwi, ino Davida wānena’mba: ‘Nkibwanyapo kulwa na bino bya bulwi.’ Davida wāsela topito wāenda ku kamunonga. Wātonga mabwe atano masenene biyampe wēela mu kafuko. Kupwa, Davida wāenda lubilo kudi Ngodiata. Kampangala wāela lubila’mba: ‘Wikāye kuno, kanwe kanuke katyetye. Nsa kukudisha na byoni bya mūlu ne na banyema ba ntanda.’ Davida kāzakelepo. Nandi wāela lubila’mba: ‘Abe wiyanga na kipete ne mukobe, inoko ami ngiyanga mu dijina dya Yehova. Ke batwepo bolwa nabo; i Leza olwa nandi. Bantu bonso badi pano basa kuyuka’mba Yehova i mukomo bininge kupita kipete nansha mukobe. Usa kwimupāna banwe bonso mu kuboko kwetu.’

Davida wāela dibwe mu topito wāmwasa’dyo na bukomo bwandi bonso. Na bukwashi bwa Yehova, dibwe dyaasa Ngodiata pa mpala dyātwela. Kampangala wāpona panshi mufwididile. Penepo bene Fidishitia bānyema lubilo mwanda wa kwipandija. Le nobe ukulupile mudi Yehova pamo bwa Davida?

Davida pa kupwa kwipaya Ngodiata, Mulopwe Solo wāmutūdile bu wa kutala kibumbo kyandi kya divita. Davida wānekenye malwi mangi, wātumba bininge. Ponso pādi pajoka Davida ku divita, bana-bakaji bādi bāya baja ne kwimba amba: ‘Solo waipaya tununu, Davida nandi waipaya makumi a tununu!’ Solo wākwatyilwe Davida mukao kākimbe kumwipaya.

Davida wādi uyukile komba senene lunsense. Difuku dimo, Davida paādi ombela Solo lunsense, mulopwe Solo wāmwasa mukobe bu āmutape. Davida wāepa’o, mukobe wākasa mu lubumbu. Kupwa papo, Solo wākimbile misunsa mivule kwipaya Davida. Mwenda mafuku, Davida wānyemena kulampe, wākafyama mu ntanda mudi zolē.

Solo wāsela kibumbo kya divita kya bana-balume 3 000, bākakimba Davida mwanda wa bamwipaye. Solo wākatwelele mu mutá mwādi mufyeme Davida ne bantu bandi. Bantu ba Davida bāmunena mu mīsongwe amba: ‘Uno o mukenga obe wa kwipaya Solo.’ Davida wāenda ukalaba kudi Solo, wāketa kipēta kya ku kotyi wa Solo. Solo kāyukilepo. Kupwa, Davida wēalakanya amba wabulwe kulēmeka mulopwe mushingwe māni wa Yehova. Wāpeleje bantu bandi kulonga Solo kibi. Wāelele’nka ne Solo lubila’mba: Nadi wa kukwipaya ponamonanga mukenga. Le Solo wāshintyile milangwe yandi padi Davida?

Aa. Solo wāendelele kukimba kwipaya Davida. Difuku dimo bufuku, Davida ne mwipwa wandi Abishai bākatwelele mu nkambi ya Solo. Enka ne Abinele, mulami wa Solo, wādi ulēle mu tulo. Abishai wālombola Davida amba: ‘Uno o mukenga! Leka mwipaye.’ Davida wālondolola’mba: ‘Yehova mwine usa kwipwija na Solo. Tusele’tu’nka mukobe wandi ne kalondo kandi ka mema twende.’

Davida wākanda pa lūlu lwa pabwipi lwādi lwitadidile na nkambi ya Solo. Davida wāela lubila’mba: ‘Abinele, mwanda waka kwadipo ukingile mulopwe wenu? Le kalondo ka Solo ne mukobe wandi bidi kwepi?’ Solo pa kuyuka’mba i diwi dya Davida, wānena’mba: ‘Wadi ubwanya kungipaya, ino kungipailepo. Nayuka’mba usa kwikala mulopwe wa Isalela.’ Penepo Solo wākajokela kwandi. Inoko, ke bantupo bonso ba mu kisaka kya Solo bādi bashikilwe Davida.