Bulopwe bwa bisaka dikumi bwa Isalela, bwāikele na balopwe bavule babi, inoko Ahaba wādi mulopwe mubi kupita bonso. Wāsongele mwana-mukaji umo mubi utōta Bāla. Dijina dyandi i Yezebele. Ba Ahaba ne Yezebele bāyujije ntanda yonso na butōtyi bwa Bāla ne kwipaya bapolofeto ba Yehova. Le Yehova wālongele’po namani? Wātumine mupolofeto Ediya akasapwile Ahaba musapu.

Ediya wāsapwidile Mulopwe Ahaba amba byowalonga bintu bibi, mu Isalela kemukanokepo mvula. Mu bula bwa myaka isatu ne musubu, kekwāikelepo byangulwa kadi bantu bāikele mu nzala. Kupwa, Yehova wātuma monka Ediya kudi Ahaba. Mulopwe wānena Ediya amba: ‘Abe’ye uletanga kavutakanya! I abe waleteja uno mulanga.’ Ediya nandi amba: ‘Ke amipo waleteja uno mulanga. I abe walengeja’o na kutōta kotōta Bāla. Tusa kupikana. Kongakenya muzo onso ne bapolofeto ba Bāla pa nsongo ya Lūlu lwa Kalamela.’

Bantu bākebungile pa lūlu. Ediya wānena’mba: ‘Langulukai. Shi Yehova ye Leza wa bine, mulondei. Shi i Bāla, nankyo kadi mulondei. Tulongei namino: Bapolofeto ba Bāla 450 bafwaninwe kuteakanya kyamulambu kyabo bete wabo leza, ami nami nsa kuteakanya kyamulambu ngite Yehova. Leza usa kulondolola na kuleta mudilo, ye Leza wa bine.’ Bantu bāitabija.

Bapolofeto ba Bāla bāteakanya kyamulambu. Bāita wabo leza difuku dituntulu amba: ‘A Bāla, witwitabe!’ Bāla byākaitabilepo, Ediya wāanza kumuzawila. Kānena’mba: ‘Itai bininge. Padi ye uno mupone mu tulo, usakilwa muntu wa kumulangula.’ Bapolofeto ba Bāla bādi bamwita’nka kumwita kufika ne kyolwa. Inoko, aye kēbalondolwelepo.

Ediya wātūla kyamulambu kyandi pa kisōkelo, wātūta’po ne mema. Kupwa wālombela’mba: ‘A Yehova, nakwisāshila bantu bayuke amba abe ye Leza wa bine.’ Ponka na ponka, Yehova wātuma mudilo mūlu wāloteja kyamulambu. Bantu bāela mabila’mba: ‘Yehova ye Leza wa bine!’ Ediya wānena’mba: ‘Kemwakinyemejai bapolofeto ba Bāla!’ Mu dine difuku’dya, kwāipaibwa bapolofeto ba Bāla 450.

Kadikumbi pa kumweka pangala pa dijiba, Ediya wāsapwila Ahaba amba: ‘Kimpumpu kyakyo kīya. Teakanya dikalo dyobe, wende kobe.’ Dikumbi dyāfinda fututu mūlu, kivula kēkipukuma, mvula mukatampe waanza kunoka. Ku mfulo, mulanga wāpwa. Ahaba wēsakuna lubilo lukatampe na dyandi dikalo. Ino na bukwashi bwa Yehova, Ediya wānyema bininge, wāpita dikalo ku lubilo! Ino le myanda ya Ediya yonso yāpwidile pano? Tutale.

Yezebele pa kwivwana’mba abaipaya bapolofeto ba Bāla, wālobele bininge. Wātumina Ediya musapu amba: ‘Kesha, nobe usa kufwa pamo bwa bapolofeto ba Bāla.’ Ediya wāzakala bininge, wānyemena mu ntanda mutuputupu. Wālombela’mba: ‘Yehova, kubapu. Ndeke mfwe.’ Ediya byaādi mukōke bininge, wālāla tulo twa bukū munshi mwa mutyi.

Mwikeulu wāmulangula’mba: ‘Languka udye.’ Ediya wāmona mukate mujokoloke mutūle pa mabwe makabe ne kalondo ka mema. Wādya ne kutoma kupwa wālāla monka. Mwikeulu wāmulangula monka ne kumunena’mba: ‘Dyá. Mwanda usakilwa bukomo mwa kwendela.’ Ediya wādya’mo monka. Kupwa wāenda lwendo lwa mafuku 40 dyuba ne bufuku, wāfika ku Lūlu lwa Holeba. Ediya pa kufika’ko, wātwela mu mutá wālāla. Inoko Yehova wēsambile nandi. Wāipangula Ediya amba: ‘Ediya, i bika byolonga kuno?’ Ediya wāmulondolola’mba: ‘Bene Isalela abaleka kufikidija mulao obakulaile. Abaonakanya bisōkelo byobe ne kwipaya bapolofeto bobe. Pano kebakimbe ne kungipaya ami.’

Yehova wāmusapwila’mba: ‘Enda ukemane pa lūlu.’ Dibajinji bidi, kwāpukuma kivula kikatampe panja pa mutá. Nshi yātenkena, kupwa mudilo wātūka. Ku mfulo, Ediya wāivwana diwi dityetye kadi ditūke. Wēpūta kotyi wandi mu mpala wāimana panja pa mutá. Kupwa, Yehova wāmwipangula kine kyaanyemena. Ediya wāmulondolola’mba: ‘Mu bengidi bobe bonso enka ami ye washala.’ Ino Yehova wāmunena’mba: ‘Kudipo bunka. Kukidi bantu 7 000 mu Isalela bantōta. Enda ukatonge Edisha bu mupolofeto pa kyobe kyaba.’ Ponka na ponka, Ediya wāenda kukalonga byāmusapwidile Yehova. Le ulanga Yehova ubwanya kukukwasha nobe kitatyi kyolonga bintu byasaka? I amo. Leka tutale byālongekele mu kitatyi kya mulanga.