Mu kitatyi kya mulanga, Yehova wāsapwidile Ediya amba: ‘Enda ku Zelefata. Shi ubafika’ko, mwana-mukaji umo wa kishala usa kukupa byakudya.’ Ediya pa kufika ku bibelo bya kibundi, wāmona mwana-mukaji umo wa kishala mulanda utyaba nkuni. Ediya wāmulomba mema a kutoma. Uno wa kishala aye wenda kukamupaila’o, Ediya wāmwita’mba: ‘Nakwisāshila, mpaile’ko ne kipindi kya mukate.’ Ino mwana-mukaji wāmunena’mba: ‘Nkidipo na mukate wa kukupa. Ndi’nka na tubukula tubwane ne māni bya kutēka kakudya ka wami mwana ne kami.’ Ediya wāmusapwila’mba: ‘Yehova i mundaye amba shi unongele mukate, bukula bobe ne māni kebikapupo kufika ne bikanoka mvula monka.’

Penepo mwana-mukaji wa kishala’wa wāenda ku njibo, wālongela mupolofeto wa Yehova mukate. Monka mwālaile’kyo Yehova, uno wa kishala ne wandi mwana, bāikala nyeke na byakudya mu kitatyi kya mulanga. Mulondo wandi wa bukula ne katyibi ka māni byādi’nka biyule bā.

Inoko kwālongekele kintu kimo kibi mpata. Mwana-mukaji wa kishala’wa, wandi mwana wābela bininge wāfwa. Wāzenza Ediya amukwashe. Ediya wāmuyata mwana ku makasa, wākanda nandi mu kyumba kya pangala. Wālādika mwana’wa pa butanda kālombela’mba: ‘Yehova, nakwisāshila, leka būmi bwa uno mwana bujokele mwadi.’ Le uyukile mwanda waka kino kintu kyālombele Ediya kudi Yehova kyādi kitulumukwa? I mwanda, motuyukile i kutupu muntu wādi ke mujokele monka ku būmi kumeso kwa kine kitatyi’kya. Ne kadi uno mwana-mukaji wa kishala ne wandi mwana kebādipo bene Isalela.

Nansha nankyo, būmi bwa uno mwana mwana-mulume bwājokele mwadi, waānza kwesa! Ediya wālombola mwana-mukaji wa kishala amba: ‘Tala! Obe mwana ke mūmi.’ Uno wa kishala wāsangele bininge kānena Ediya amba: ‘Na bubine wi muntu wa Leza. Kyonayukila’po i mwanda unenanga’nka bikusapwila Yehova kunena.’

Mulopwe Ahaba paādi utadila pa dididisha dya njibo yandi mikatakata mu Yezelele, wāmwene budimi bwa mañanza bwa muntu umo witwa bu Nabote. Ahaba wāabīle buno budimi, kākimbe Nabote amupoteje’bo. Inoko Nabote wāpelele kumupoteja’bo, mwanda Bijila bya Yehova byādi bipeleja kupoteja ntanda ya bupyani. Le Ahaba wālēmekele Nabote pa kuno kupela kuyampe? Aa. Ahaba wālobele bininge. Wāfītwa bininge wapela kulanguka pa butanda, wāpela ne kudya kwine.

Yezebele mulopwe mukaji mubi, mukaja Ahaba, wānena wandi mulume amba: ‘Abe ye mulopwe wa Isalela. Ubwanya kwikala na bintu byonso byosaka. Nsa kukuyatyila bwabo budimi’bo.’ Yezebele wālembela bakulumpe ba kibundi mikanda, ibalombola’mba Nabote wafinge Leza, ufwaninwe kwaswa mabwe afwe. Bakulumpe bālonga mwēbasoñaninye Yezebele, kupwa Yezebele wāsapwila Ahaba amba: ‘Nabote wafu. Budimi bwa mañanza’bwa ke bobe.’

Yezebele kāipailepo’nka Nabote kete muntu moloke. Wāipaile bantu bavule basenswe Yehova. Wādi utōta bilezaleza ne kulonga bintu bikwabo bibi. Yehova wāmwene bintu byonso bibi byādi bilonga Yezebele. Le Yehova wāmulongele bika?

Ahaba pa kufwa, wandi mwana Yeholama wābikala bu mulopwe. Yehova wātumine mwana-mulume umo witwa bu Yehu, akape Yezebele ne kisaka kyandi mfuto.

Yehu wākanda mu dikalo dyandi kāenda ku Yezelele, ye kwādi kwikala Yezebele. Yeholama nandi wāsela dikalo wākasambakana Yehu, wāmwipa- ngula’mba: ‘Le kudi ndoe pa abe ne batwe?’ Yehu wāmulondolola’mba: ‘Kekukekalapo ndoe pakyendelela inobe Yezebele kulonga bintu bibi.’ Yeholama kākimbe kwalamuna dikalo dyandi anyeme. Yehu wāasa Yeholama muketo, ne kufwa wāfwa.

Kupwa, Yehu wāenda ku njibo mikatakata ya Yezebele. Yezebele pa kwivwana’mba Yehu yao wiya, wēpenta, wēlongolola nywene, kāmwilaijije pa dididisha dya kyumba kyandi kya pangala. Yehu pa kufika, Yezebele wāmwimuna bya kibengo. Yehu wāela lubila kudi bengidi ba Yezebele bādi nandi pabwipi amba: “Mwelei pa nshi!” Bāsukumina Yezebele pa dididisha, wāpona pa nshi mufwididile.

Kupwa, Yehu wāipaya bana ba Ahaba 70 bana-balume, wātōkeja ntanda ku butōtyi bwa Bāla. Mwene ubamone amba Yehova uyukanga bintu byonso bilongeka, ne amba upanga bantu bonso balonga bibi mfuto pa kitatyi kifwaninwe?