Bipangujo Bya Batangi

Lelo Binenwa bya Davida bidi mu Ñimbo 37:25 ne bya Yesu bidi mu Mateo 6:33 bishintulula’mba, Yehova kakalekapo nansha dimo mwine Kidishitu abulwe byakudya bifwaninwe?

Davida wāsonekele amba, “nkyamwenepo moloke kulekelelwa, nansha lukunwa lwandi kulomba bidibwa.” Mu uno muswelo wānene binenwa bivudile kunenwa kukwatañana na bintu byāemwenine aye mwine. Wādi uyukile biyampe’mba Leza utele nyeke bantu mutyima. (Ñim. 37:25) Inoko, binenwa bya Davida kebishintululapo’mba mutōtyi ukabulwa nyeke bintu byasakilwa nansha kwendelela kwibibulwa.

Kyaba kimo Davida wātenwe mu ngikadilo mikomo. Wātenwe’mo kitatyi kimo paādi unyema Solo. Mpao ya Davida yātyepele, ebiya wālomba mukate wandi ne wa bantu baādi nabo. (1 Sa. 21:1-6) Nanshi mu kino kitatyi, Davida ‘wālombele bidibwa.’ Inoko, mu ino ngikadilo mikomo wadi uyukile’mba Yehova kamwelelepo. Bubine i buno amba, i kutupu potutanga’mba Davida wālombele mwanda wa kusokola bidibwa byaādi usakilwa pa kwikala mūmi.

Yesu witukulupija mu Mateo 6:33 amba, Leza ukavuija bisakibwa bya bengidi bandi ba kikōkeji batūdile tumweno twa Bulopwe pa kifuko kibajinji mu būmi. Yesu wānenene amba, “kimbai bidi nyeke Bulopwe ne boloke bwandi, ebiya bino bikwabo byonso [kubadila’mo bidibwa, bitomibwa ne bivwalwa] bikemutentekelwa’ko.” Inoko Yesu wānene kadi amba, pa mwanda wa kupangwapangwa, “banababo” bādi ba kwikala ne nzala. (Mat. 25:35, 37, 40) Kino kyokyāfikīle ne mutumibwa Polo. Wāivwene kyaba kimo nzala ne kyumwa.—2 Ko. 11:27.

Yehova witulombola’mba, tukapangwapangwa mu miswelo mishileshile. Ubwanya kwituleka tubulwe kantu mwanda wa tukwashe mu kuleta malondololo ku matope a Dyabola. (Yoba 2:3-5) Kimfwa, banabetu bamo bene Kidishitu pamo bwa boba bakutyilwe mu komponi ka masusu ka Nazi, batenwe mu masusu mwanda wa kupangwapangwa. Kuleka kupa Batumoni byakudya byendele’mo kwadi bu manwa a dyabola āingidijibwe mwanda wa kutyumuna bululame bwabo. Batumoni ba kikōkeji badi nyeke bakōkele kudi Yehova; kadi nandi kebedilwepo. Webalekele batanwe na ano matompo, monka mwalekēle bene Kidishitu bonso batanwe na matompo a miswelo palapala. Inoko, Yehova ukwashanga bine bonso basusuka pa mwanda wa dijina dyandi. (1 Ko. 10:13) Tubwanya kuvuluka binenwa bidi mu Fidipai 1:29 bya amba: “Mwi bapebwe dyese pa mwanda wa Kidishitu, ke’nkapo dya kwikala na lwitabijo mwadi, ino i ne kususuka pa mwanda wandi.”

Yehova i mulaye kwikala na bengidi bandi. Kimfwa, Isaya 54:17 unena amba: “Nansha kipungwa, shi kyepi, shi kyepi, kyabundwa kibundilwa abe padi abe kekikafikapo biyampe.” Uno mulao ne milao mikwabo idingakene nao, witukulupija’mba bantu bonso ba Leza bakekala na mutyima-ntenke. Inoko mwine Kidishitu yense ubwanya kutanwa na matompo, enka ne kufika ku lufu.