Sokola Dishinda

LELO WIMONANGA BU MUNTU WA NSANGAJI? Shi i amo, le i bika bikulengeje wikale na nsangaji? Le i kyobe kisaka, kobe kaji, nansha nkulupilo ya kyenu kipwilo? Padi utengēle kintu kampanda kibwanya kukuletela nsangaji, kimfwa kupwa masomo, kusokola kaji kayampe, nansha kupota motoka mupya.

Bantu bavule bevwananga nsangaji shi abafikidija kitungo kampanda, nansha shi abasokola kintu kyobadi babila. Ino le ino nsangaji ya mu kitulumukila ibwanya kwija mu bula bwa bitatyi binga? Divule, ikalanga’tu ya lupito, ne kino kibwanya kulengeja kutyumukwa mutyima.

Nsangaji i mwiivwanino muyampe wija, kuloelelwa kutwala ku katōkwe kakatampe ka kusangela bininge būmi, ne kyumwa kya kwendelela kwikala nayo.

Byoudi mwiivwanino muyampe wa endaenda, o mwanda nsangaji keishintulwilwepo bu kuntu kwa kwenda nansha bu kitungo, inoko i mishintululwe bu lwendo. Kunena’mba, “Nsa kwikala na nsangaji shi . . .” na bubine, kuno i kutundulula nsangaji.

Tulete kimfwa, tudingakanye bidi nsangaji na bukomo bwa ngitu buyampe. Le i muswelo’ka wa kwikala na bukomo bwa ngitu buyampe? I na kudya bidibwa biyampe, kwitamuna bidyoma, ne kuta mutyima ku bintu bikwabo bya mu būmi. Ne nsangaji nayo mo monka, itambanga ku kulonda bibidiji biyampe bya mu būmi, ko kunena’mba kulonda misoñanya ya mvubu.

Lelo i misoñanya’ka nansha ngikadila iketukwasha tusokole dishinda dya būmi bwa nsangaji? Nansha imo byoidi na mvubu kupita mikwabo, mikatampe bidi i ino:

• KULOELELWA NE BUNTU

• BUKOMO BWA NGITU NE KŪMININA

• BUSWE

• LULEKELO

• KITUNGO MU BŪMI

• LUKULUPILO

Dibuku dimo dya tunangu dilēmekibwe bininge dinena’mba: “Kebo ba katōkwe kabo, shabo! boba babwanininye mu dishinda.” (Ñimbo ya Mitōto 119:1) Lekai pano tubandaule dino dishinda.