Buswe

BANTU BABILANGA KUSANSHIBWA. I kutupu busongi, kisaka, nansha bulunda bubwanya kwendelela pampikwa buswe. O mwanda buswe budi na mvubu pa bukomo bwa mu ñeni ne pa kwikala na būmi bwa nsangaji. Penepa, le “buswe” bushintulula namani?

Buswe bwisambilwa’po pano, ke buswepo bwa bu mulume ne mukaji, shako nabo budi na mvubu. Ino, i buswe bukatampe butononanga muntu ate bakwabo mutyima bininge ne kwibasakila biyampe, ne kwibamona bu badi na mvubu kumupita. Buno i buswe buludikwa na misoñanya ya Leza kadi mu buno buswe mubadilwa ne kyanga ne mwiivwanino.

Nshintulwilo imo miyampe ya buswe i ino: “Buswe budi na kitūkijetyima ne kanye. Buswe kebudipo na mukao, kebwianyangapo, kebwitatulangapo, kebuloñangapo byampikwa kwendela’mo, kebukimbangapo tumweno twa abo bwine, kebukelwangapo bulobo. Kebubalangapo bibi bilongelwe. Kebusangelangapo bukondame, ino busangalanga pamo na bubine. Butyumwinanga byonso mu manwi, . . . bukulupilanga byonso, būmininanga byonso. Buswe kebukankalwangapo.”​—1 Kodinda 13:4-8.

Buswe bwa uno muswelo “kebukankalwangapo” ko kunena’mba i bwa endaenda. Na bubine, bubwanya kuvudila’ko mu bula bwa kitatyi. Kadi buswe byobudi na kitūkijetyima, kanye, ne lulekelo, “i kijimba kibwaninine kya bumo.” (Kolose 3:14) O mwanda, kipwano kibambakanibwe na buno buswe, kījanga kadi kikalanga kya nsangaji nansha boba bapwene byobadi bampikwa kubwaninina. Kimfwa, tala kipwano kya busongi.

BALUNGWE NA “KIJIMBA KIBWANININE KYA BUMO”

Yesu Kidishitu wāfundije misoñanya ya mvubu itala pa busongi. Kimfwa, wānenene amba: “ ‘Mwana-mulume ukashiya shandi ne inandi kadi ukalamata wandi mukaji, penepo abo babidi bakekala ngitu imo’ . . . Nanshi kyokya kyakuta Leza pamo mu lupungu, muntu nansha umo kakikalañanya’kyo.” (Mateo 19:5, 6) Ino’tu misoñanya ibidi idi na mvubu mikatampe.

“ABO BABIDI BAKEKALA NGITU IMO.” Busongi i kipwano kya binebine kipityile kipwano kyo-kyonso kibwanya kwikala na bantu, kadi buswe bubwanya kukinga ba mulume ne mukaji baleke kwitomboka​—ko kunena’mba kwikala “ngitu imo” na muntu mukwabo okebesongelepo nandi. (1 Kodinda 6:16; Bahebelu 13:4) Kwitomboka konanga kikulupiji kadi kubwanya kutyiba busongi. Shi badi ne na bana, nabya bibwanya kusansa bana bininge ne kwimona bu bampikwa kuswibwa, kwikala pampikwa mutyima-ntenke, enka ne kwikala na kiji ku mutyima.

“KYOKYA KYAKUTA LEZA PAMO MU LUPUNGU.” Kadi busongi i kijimba kijila. Ba mulume ne mukaji balēmekele uno mulangwe baloñanga bukomo bwa kukomeja busongi bwabo. Kebakimbangapo mikenga ya kwilubwila’po shi kubalupuka makambakano. Buswe bwabo bwikalanga buvule kadi bwa endaenda. Buswe bwa uno muswelo “butyumwinanga byonso mu manwi,” bukwashanga pa kupwija makambakano mwanda wa kulama bumo ne ndoe mu busongi.

Shi bambutwile badi na buswe bwa kwipāna, nabya mwana ne mwana mu kisaka ukamwena’mo mpata. Nkasampe umo mwana-mukaji witwa bu Jessica unena’mba: “Ba tata ne mama besenswe bya binebine kadi belēmekele. Pomona mama ulēmekele tata, nakampata shi batwe bana tudi’po, binsangajanga nami kensake kumwiula.”

Buswe yo ngikadila mikatampe ya Leza. O mwanda Bible unena’mba: “Leza i buswe.” (1 Yoano 4:8) Kadi ke kya kutulumukapo shi Yehova witwanga ne bu “Leza wa nsangaji.” (1 Temote 1:11) Netu tukekala na nsangaji shi tulonge bukomo bwa kwiula ngikadila ya Umpangi wetu​—nakampata buswe. Efisesa 5:1, 2 unena’mba: “Iulai Leza, pamo bwa bana baswedibwe, kadi nangilai nyeke mu buswe.”