Būmi bwa ku Mushipiditu
Enka mokinenenwe mu kishinte kibajinji, bantu bavule bamwene Bible bu dibuku dikola. Bamwene amba shi bamutange ne kwingidija bulombodi budi’mo, bakafwena bininge kudi Leza, ne kwivwanija kine kyobekadile’ko.
Bible i mwingidije bishima “bintu bya ku mushipiditu” mwanda wa kufunkila pa ngikadila ne mwikadilo wa mu būmi. (Yude 18, 19) Muntu ulangulukila pa bintu bya ku ngitu witele mutyima bininge aye mwine, ino bantu batele mutyima ku bintu bya ku mushipiditu abo balēmekele bininge misoñanya ya Leza.—Bene Efisesa 5:1.
LUKULUPILO
MUSOÑANYA WA MU BIBLE: “Shi utyumukwe mutyima mu bitatyi bya makambakano, bukomo bobe bukatyepa.”—Nkindi 24:10, kunshi kwa dyani.
MOUSHINTULWILA: Kutyumukwa mutyima kubwanya kwitupwa bukomo botusakilwa pa kūminina makambakano a mu būmi. Inoko lukulupilo lubwanya kwitupa bukomo botusakilwa pa kūminina. Tubwanya kusengibwa pa kuyuka’mba makambakano otwikonda nao i a lupito; na bubine ku makambakano kubwanya kulupuka kintu kiyampe.
BYOBWANYA KULONGA: Ikala na mumweno muyampe pa mafuku a kumeso. Pa kyaba kya kuzumbija mutyima pa bintu bibwanya kulongeka, nansha kusaka bintu byonso bikale’nka biyampe, longa bintu kukwatañana na bitungo byobe. Na bubine, “myanda yampikwa kulaa” ibwanya kufika. (Musapudi 9:11) Inoko, divule dine bintu bipitanga biyampe kupita ne motwadi tulangila. Bible i mwingidije muneneno wa babidimye panena’mba: “Kuna nkunwa yobe lubanga kadi kokaleka kuboko kobe kukōkolokwe kufika ne ku kyolwa; mwanda kuyukilepo i yepi ikekala biyampe, shi ino shi yoya, nansha shi ayo yonso ikatama.”—Musapudi 11:6.
MALONDOLOLO KU BIPANGUJO BYA MVUBU MU BŪMI
MUSOÑANYA WA MU BIBLE: “Mpe’ko ñeni . . . Kinenwa kyobe . . . i bubine.”—Ñimbo ya Mitōto 119:144, 160.
MOUSHINTULWILA: Bible ulondololanga kisengele ku bipangujo byonso bipangula bantu. Kimfwa, ulondololanga bino bipangujo
Le tutambile kwepi?
Le i kika kyotwikadile’ko?
Le shi muntu wafu wikalanga namani?
Le buno bo būmi bonso kete?
Bantu midiyo ne midiyo ntanda yonso i balumbulule būmi bwabo na kulangulukila pa malondololo aleta Bible ku bino bipangujo ne bikwabo.
BYOBWANYA KULONGA: Bandaula abe mwine byobya bifundija Bible. Nena Kamoni wa Yehova e-ense akukwashe wivwanije Bible. Twela pa diteba dyetu dya jw.org, nansha kutanwa ku kupwila kwetu, kutanwanga bantu bonso ku bitupu.
MISOÑANYA MIKWABO YA MU BIBLE
Tala video inena’mba Mwanda Waka Twifunde Bible? pa jw.org. Itanwa’po mu ndimi 880 ne kupita
JINGULULA BYOSAKILWA KU MUSHIPIDITU.
“Ba nsangaji i boba bayukile amba kudi byobasakilwa ku mushipiditu.”—MATEO 5:3.
WIFUNDE MYANDA MIVULE YA LEZA UTELELWE MU BIBLE.
“Bakimbe Leza . . . ne kumusokola binebine . . . Byakadipo . . . kulampe na batwe bonso.”—BILONGWA 17:27.
TANGA MUSAPU WA MU BIBLE NE KULANGULUKILA’PO.
“Aye uloelelwe bijila bya Yehova,a kadi ulangulukilanga pa bijila Byandi dyuba ne bufuku. . . . Bintu byonso byalonga bikendeka.”—ÑIMBO YA MITŌTO 1:2, 3, kunshi kwa dyani.
a Yehova i dijina dya Leza monka modilombwedilwe mu Bible.