BYA KULONGA SHI ÑENI IBAKUVUTAKANA
Bibwanika Kwikala na Būmi Bwampikwa Kuvutakanibwa Ñeni
Tunangu tudi mu Bible tubwanya kwitukwasha tuleke kuvutakanibwa ñeni bya bituputupu. Ketubwanyapo kutalula’ko bintu byonso bibwanya kwituvutakanya ñeni. Inoko Umpangi wetu ubwanya kwibitalula’ko. Ke mutonge’ko kala muntu wa kwitukwasha. Uno muntu i Yesu Kidishitu. Panopano ponka, usa kulonga bintu bivule bya kutendelwa kutabuka byaālongele paādi pano pa ntanda. Kimfwa:
YESU USA KUBELULA BABELA, NA MWAĀLONGELE KALA.
“Bamuletela bonso badi basusuka na misongo palapala . . . , nandi webakomeja.”—MATEO 4:24.
YESU UKAPA BANTU BONSO MWA KWIKALA NE BYAKUDYA.
“[Babikalwa ba Kidishitu] bakobakanga mobo ne kwikala’mo, kadi bakadimanga madimi a mañanza ne kudya bipa byao. Kebakobakapo amba muntu ungi ekale’mo, nansha kudima’mba bantu bakwabo badye.” —ISAYA 65:21, 22.
BULUDIKI BWA YESU BUKALETA NDOE NE MUTYIMA-NTENKE NTANDA YONSO.
“Mu mafuku andi, moloke ukamonanga biyampe, kadi ndoe ikavula kufika ne bijimina kweji. Aye ukekala na babikalwa tamba ku dijiba kutūla ne ku dijiba ne tamba ku Munonga kutūla ne ku mafulo a ntanda. . . . Balwana nandi bakalamba luvumbi.” —ÑIMBO YA MITŌTO 72:7-9.
YESU UKATALULA’KO BUKONDAME.
“Ukevwaninanga lusa mupēlulwe ne mulanda, kadi būmi bwa balanda ukebupandijanga. Ukebakūlanga ku malwa ne ku lūma.”—ÑIMBO YA MITŌTO 72:13, 14.
YESU UKATALULA’KO MASUSU NE LUFU.
“Lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka.”—KUSOKWELWA 21:4.